Կարմրուկի երրորդ դեպքն է հաստատվել Երևանում. Վրաստանից եկողները սահմանին զննում են անցնում
Քիչ առաջ լաբորատոր հետազոտությունների արդյունքում հաստատվեց ևս մեկ կարմրուկի դեպք: Քաղաքացին ազգությամբ հայ է, եկել է Օդեսայից, որտեղ շփվել է կարմրուկով հիվանդ վրացու հետ: Այս պահի դրությամբ հանրապետությունում գրանցված է կարմրուկով հիվանդացության երեք դեպք, երեքն էլ` դրսից բերովի: Panorama.am-ին նման տվյալներ հայտնեց առողջապահության նախարարության իմունականխարգելման ազգային ծրագրի ղեկավար Գայանե Սահակյանը: Նրա խոսքով, քիչ անց կհրապարակվի առողջապահության նախարարի հրամանը` բոլոր դիմողներին պոլիկլինիկաներում անվճար պատվաստելու վերաբերյալ:
Հիշեցնենք, երկու օր առաջ ԱՆ-ն հայտնել էր, որ Վրաստանում այս տարվա ընթացքում գրանցվել է կարմրուկի 4533 դեպք, որից 1357-ը հոսպիտալացվել են, հիվանդության հետևանքով մահվան երկու դեպք է գրանցվել: Մայիսի 24-ին Հայաստանում գրանցվել է կարմրուկի բերովի մեկ դեպք՝ 5 տարեկան տղա երեխայի մոտ, ով Վրաստանի բնակիչ է և ընտանիքի մյուս անդամների հետ հյուրընկալվում է Հայաստանում: Գայանե Սահակյանի խոսքով, ավելի ուշ կարմուկով հիվանդացել է նաև երեխայի երեքամյա եղբայրը:
«Բոլոր դեպքերը մեր հսկողության տակ են, ճշտել ենք մեծ շրջանակով կոնտակտավորների ցանկը: Այս պահին միջոցառումներ են իրականցվում այդ մարդկանց հետ, ճշտում ենք պատվաստումային վիճակը, նախկինում հիվանդացե՞լ են, թե՞ ոչ, ու համապատասխան մոտեցում ենք ցուցաբերում»,-ասաց նախարարության ներկայացուցիչը, ավելացնելով, որ հիվանդների հետ շփված այն մարդիկ, ովքեր չեն պատվաստվել, հիվանդացել են, բայց լաբորատոր հետազոտություն չեն անցել, դիտարկվում են որպես պոտենցիալ վարակակիրներ և համապատասխան միջոցառումներ են իրականացվում, կանչվում են պատվաստման:
Գ. Սահակյանը հիշեցրեց, որ 2007-ից հետո միայն 2010 թվականին է Հայաստանում գրանցվել կարմրուկով հիվանդացության մեկ դեպք, այն էլ օտարերկրացու մոտ, հիվանդությունը տարածում չի գտել, հաջորդող տարիներին զրոյական մակարդակ է եղել:
«Այսօր մեր հանրապետության ստատուսն այդ առումով շատ բարվոք է, ի տարբերություն հարևան երկրների ու նաև հետխորհրդային հանրապետությունների»,-ասաց ծրագրի ղեկավարը:
Առողջապահության նախարարության ներկայացուչի խոսքով, այս պահին Վրաստան-Հայաստան սահմանի վրա Հայաստան բոլոր եկողների զննում է իրականացվում:
«Բայց դա չի կարող 100 տոկոսով արդյունավետություն ապահովել, քանի որ կարող է գաղտնի շրջանով մարդիկ անցնեն, կլինիկական որևէ դրսևորում չունենան, բայց մի շաբաթ անց կարող են ախտանիշներն ի հայտ գալ»,-ասաց մասնագետն ու խորհուրդ տվեց, սահմանը հատելուց առաջ ճշտել իրենց պատվաստումային վիճակը և 3-4 շաբաթ առաջ պատվաստվել:
Գ. Սահակյանը վստահեցնում է, որ պատվաստնյութը նոր է, պատվաստման դեպքում խնդիրներ չեն լինի:
«Ոչ պլանային պատվաստման ենթակա մարդիկ, որոնք որոշում են որ պետք է պատվաստվեն, կարող են դիմել պոլիկլինկաներ, և անվճար պատվաստվել: Նախարարն արդեն հրաման է ստորագրել, որ բոլոր պոլիկլինիկաները անվճար հիմունքով դա կազմակերպեն, որպեսզի մենք կարողանանք մեր բարվոք համաճարակային կարգավիճակը պահպանել»,-ասաց Գ. Սահակյանը:
Նա հիշեցրեց, որ եռավալենտ ԿԿԽ (կարմրուկ, կարմրախտ, խոզուկ) պատվաստանյութով պլանային պատվաստում են անցնում 1 և 6 տարեկան երեխաները, ուստի պետությունը տարեսկզբին մեկ տարվա համար ձեռք է բերել պատվաստանյութի որոշակի խմբաքանակ:
«Բայց քանի որ մենք չենք ուզում մեր հասարակությունը տուժի, մենք էլ Վրաստան դառնանք, ապա մենք այդ պատվաստանյութը կտրամադրենք նաև մյուսներին: Եթե այն երեխաների մոտ բարդություն չի առաջացնում, ապա մեծահասակների դեպքում էլ չի առաջացնի»,-ասաց նա:
Գ. Սահակյանը խորհուրդ է տալիս Վրաստան մեկնած ու վերադարձած մարդկանց հնարավորինս շուտ դիմել բժշկի` հնարավոր բարդություններից զերծ մնալու ու վարակը կանխելու համար:
«Տվյալ դեպքում մեր քաղաքացիների օգնությունը մեզ շատ պետք կգա»,-ասաց նա:
Հիշեցնենք, որ կարմրուկը սուր վիրուսային խիստ վարակիչ հիվանդություն է, որը բնորոշվում է ցիկլիկ ընթացքով, արտահայտված ինտոքսիկացիայով, կատառալ և ցանային համախտանիշով: Վարակի աղբյուրը միայն հիվանդ մարդն է` գաղտնի շրջանի վերջին օրերից, ողջ կատառալ և որոշ չափով ցանավորման շրջանում: Վարակը փոխանցվում է օդակաթիլային ճանապարհով: Վիրուսն արտաքին միջավայր է թափանցում հազալու, փռշտալու, խոսակցության ժամանակ:
Ընկալունակությունը կարմրուկի նկատմամբ չհիվանդացած և չպատվաստված անձանց մոտ համընդհանուր է՝ մոտենում է 100%-ի: Վարակվելուց 5-6 օր հետո հիվանդի ինքնազգացողությունը խանգարվում է՝ բարձրանում է ջերմությունը, սկսվում է հազ, աչքերը բորբոքվում են, լույսի նկատմամբ դառնում են ցավոտ: Մի քանի օր հետո մարմնի ջերմությունը նորից բարձրանում է մինչև 39-40 աստիճան: Հիվանդի վիճակը զգալիորեն վատանում է՝ դիտվում է ընդհանուր թուլություն, քնկոտություն, հրաժարում սննդից, ի հայտ է գալիս ցանը՝ սկզբում դեմքին, ապա տարածվելով ամբողջ մարմնի վրա: Կարմրուկից մահացությունը պայմանավորված է բարդություններով՝ վաղ հասակում հիմնականում թոքաբորբեր, կարմրուկային կրուպ՝ շնչառության կանգով, իսկ դեռահասների մոտ` Էնցեֆալիտ, մենինգիտ, էնցեֆալոպաթիա:
ԱՆ-ը հիշեցնում է, որ կարմրուկի դեմ պայքարի միակ հուսալի և արդյունավետ միջոցը պատվաստումն է :