Ձեր վստահելի աղբյուրը

«Այս գրքով մենք ցանկանում ենք ցույց տալ այն խնդիրները, որոնք այսօր անհապաղ լուծման կարիք ունեն: Մինչև այդ խնդիրները չլուծվեն, ոչ մի խաղաղ պայմանագիր, Մինսկի խումբ, քաղաքական ակցիա չի կարող ապահովել Հայաստանի ու Ադրբեջանի հասարակությունների համատեղ համագործակցությունը»,- «Հայատյացությունը Ադրբեջանում» («Армянофобия в Азербайджане») գրքի շնորհանդեսի ժամանակ ասաց գրքի համահեղինակ, «Այլատյացության կանխման նախաձեռնություն» ՀԿ-ի ղեկավար Արմինե Ադիբեկյանը:

Նա նշեց, որ գիրքը գրելու համար ուսումնասիրել են ադրբեջանական մանկական, ուսումնական, գեղարվեստական գրականությունը, պաշտոնատար անձանց հայտարարությունները: «Այսինքն, գիրքը կազմել ենք՝ ուսումնասիրելով պաշտոնական մակարդակով արված հայտարարությունները, ադրբեջանական մամուլը և հասարակության շրջանում տարածվող հայատյացության դրսևորումները»,- ասաց գրքի համահեղինակ, քաղաքական գիտությունների թեկնածու, Հարավային Կովկասի աշխարհաքաղաքականության փորձագետ Անժելա Էլիբեգովան:

Նրա խոսքով, գրքում ներկայացված նյութերը հավաքել են հինգ տարվա ընթացքում ադրբեջանալեզու, ռուսալեզու, անգլալեզու աղբյուրներից. «Աշխատել ենք կոմպլեքսային տեղեկատվություն հավաքել ու պահպանել, քանի որ ադրբեջանցիները հաճախ վերացնում են հետքերը»:

Անժելա Էլիբեգովան նշեց, որ նման գիրք ստեղծելու հիմնական նպատակն այն է, որ հասարակությունները տեսնեն, ճանաչեն, հասկանան, թե ովքեր են ադրբեջանցիները, ում հետ են ուզում նստել մի սեղանի շուրջ և խաղարարար որևէ ծրագիր մշակել: «Գիրքն առաջին հերթին երրորդ կողմի հասարակության համար է, Մինսկի խմբի համար է, ով փորձում է առաջ բերել հումանիտար ծրագրեր, որպեսզի հասարակությունների մակարդակով փորձենք որևէ լուծում գտնել: Լուծում գտնելու համար առաջին հերթին պետք է հասկանալ, թե ինչ է կատարվում ադրբեջանական հասարակությունում: Այս գիրքը ցույց է տալիս այդ ամբողջ պատկերը»:

Գիրքը, նրա ներկայացմամբ, բաժանված է երեք մասի՝ պատմական ակնարկ (ինչպես է ադրբեջանցիների ինքնագիտակցությունը զարգացել և ձևավորվել հայերի հետ հակադրման հաշվին), ինչ է կատարվում Ադրբեջանում (սև ցուցակներ, արգելել հայերի մուտքը Ադրբեջան, արգելել երեխաներին տալ հայերի անուններ, արգելել հայերի մասին որևէ դրական խոսք ասել, իսկ ասողներին մեկուսացնել), երեխաների շրջանում տարվող քարոզ: «Այսօր Ադրբեջանում բացարձակ հայատյացության մեջ են դաստիարակում երեխաներին: Հայատյացության դրսևորումներ դասագրքերում, հեքիաթներում, հեռուստատեսությամբ, իսկ երեխաները պաշտպանվելու միջոց չունեն: Մեր երեխաների կողքին ապրելու են այդ սերնդի ներկայացուցիչները, ինչը մեզ համար վտանգավոր իրավիճակ է ստեղծում»,- դիտարկում արեց փորձագետը:

Նրա խոսքով, գրքում որևէ եզրակացություն չեն արել՝ թողնելով, որպեսզի ամեն մեկն ինքը բացահայտի, թե ինչ է կատարվում Ադրբեջանում: «Մենք այս գրքով նպատակ չենք հետապնդում սերմանել ադրբեջանաատյացություն, այլ պարզապես ներկայացրել ենք, թե ինչ է տիրում այդ հասարակության մեջ»,- ասաց Արմինե Ադիբեկյանը, ապա նշեց, որ, ճանաչելով ադրբեջանական կողմին, առաջիկայում կփորձեն, հավանաբար, պատասխան հարված հասցնել: «Դիմում եմ ադրբեջանցի իմ գործընկերներին, թող շատ ուշադիր կարդան գիրքը և եթե որոշեն պատասխան տալ, թող մեր գրքի նման գիրք պատրաստեն, որտեղ ամեն մի օրինակ, դրվագ նշված է համապատասխան աղբյուրով»,-ասաց նա:

Նշենք, որ գիրքը թարգմանվելու է նաև անգլերեն:
«Հայատյացությունը Ադրբեջանում» գիրքը լույս է տեսել ՀՀ Նախագահի աշխատակազմի «Հանրային կապերի և տեղեկատվության կենտրոնի» աջակցությամբ: