«Մեկ գյուղ» ծրագրին Orange Հիմնադրամը հատկացրել է 55 միլիոն դրամ
Orange Հիմնադրամն այսօր հայտարարել է համայնքային զարգացման «Մեկ գյուղ» լայնածավալ ծրագրի մեկնարկի մասին: «Մեկ գյուղ» նախաձեռնության հիմնական նպատակն է աջակցել գյուղական համայնքների համալիր զարգացմանը: Այն, մասնավորապես, ուղղված է լինելու ընտրված մեկ գյուղական համայնքի տնտեսական գործունեության կայուն զարգացմանը և աշխատատեղերի ստեղծմանը, ինչպես նաև կրթական ու առողջապահական ենթակառուցվածքների բարելավմանը:
Orange հիմնադրամի լրատվական բաժնից հաղորդում են, որ ծրագիրն իրականցվելու է Արագածոտնի մարզի Հարթավան գյուղում «Շեն» բարեգործական կազմակերպության կողմից: Այն նախատեսվում է ավարտել մեկ տարվա ընթացքում: «Մեկ գյուղ» ծրագրին Orange Հիմնադրամի հատկացված ֆինանսական աջակցությունը կազմել է 55 միլիոն դրամ:
«Մեկ գյուղ» ծրագիրն օգտագործելու է սպառողական կոոպերատիվի մոդելը, որը Հարթավան գյուղի բնակիչներին թույլ կտա բարելավել կաթնամթերքի արտադրությունն ու վաճառքից ստացված արդյունքները: Նորաստեղծ կոոպերատիվին աջակցելու նպատակով ստեղծվելու է կաթի հավաքագրման և վաճառքի մասնագիտացված ու նոր տեխնիկայով զինված կետ: Ծրագրի շրջանակներում ջրաբաշխման համակարգի վերանորոգման և 500 մետր երկարությամբ նոր խողովակաշարի կառուցման միջոցով՝ կբարելավվի նաև համայնքի ոռոգման համակարգի արդյունավետությունը: Ֆինանսական միջոցներ կհատկացվեն նաև գյուղի մանկապարտեզի վերանորոգմանն ու ընդլայնմանը, ինչը հնարավորություն կտա կրկնապատկել մանկապարտեզ հաճախող երեխաների թիվը: Կվերակառուցվեն նաև ֆուտբոլի և վոլեյբոլի խաղահրապարակները: Ծրագիրը նախատեսում է նաև համայնքի բուժկետի՝ նոր սարքավորմաբ համալրումն ու բուժանձնակազմի համար մասնագիտական վերապատրաստման դասընթացների կազմակեպումը:
«Գյուղական համայնքերն ու դրանց առօրյա խնդիրները մշտապես Orange Հիմնադրամի ուշադրության կենտրոնում են: Մեր գործընկերների հետ համատեղ մենք արդեն իրականացրել ենք գյուղական համայնքների սոցիալական ենթակառուցվածքների՝ սպորտային համալիրների, մանկապարտեզների, համակարգչային սրահների զարգացմանն ուղղված մի շարք արդյունավետ ծրագրեր: Վերջիններիս նպատակն էր խթանել գյուղական համայնքների տնտեսական զարգացման հնարավորությունները, ինչպես, օրինակ, Բերդավան գյուղում իրականացված պտղաբուծության զարգացման ծրագիրը: Այս անգամ մենք նախաձեռնել ենք էլ ավելի համապարփակ ծրագիր, որն ուղղված է լինելու Հարթավան գյուղի կաթնարդյունաբերության, ինչպես նաև ոռոգման համակարգի զարգացմանը և սպորտային խաղահրապարակների ու համայնքի բուժկետի տեխնիկական հագեցվածությանը: Ակնկալում ենք, որ մինչև տարեվերջ «Շեն» բարեգործական կազմակերպության հետ համատեղ իրականացվող այս նախաձեռնությունը դրական ազդեցություն կունենա և կբարելավի համայնքի բնակիչների կյանքի պայմանները», ասել է Orange Արմենիա Հիմնադրամի խորհրդի նախագահ Ֆրանսիս Ժելիբտերը:
Ծրագրի մեկնարկին իրենց մասնակցությունն են ունեցել նաև Հայաստանում Ֆրանսիայի արտակարգ և լիազոր դեսպանը, Արագածոտնի մարզպետը, Էկոնոմիկայի փոխնախարարը, ինչպես նաև Էկոնոմիկայի նախարարության Արդյունաբերության քաղաքականության վարչության ղեկավարը: Հյուրերն իրենց գոհունակությունն են հայտնել ծրագրի վերաբերյալ՝ նշելով զգալի ֆինանսական ներդրման, ինչպես նաև գյուղական համայնքի տարբեր հիմնախնդիրներին համալիր լուծում տվող այս յուրահատուկ մոտեցման կարևորությունը:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
