Ձեր վստահելի աղբյուրը

«Հայաստանի Հանրապետության կառավարության և Վրաստանի կառավարության միջև գաղտնի տեղեկատվության փոխանակման և փոխադարձ պաշտպանության մասին համաձայնագիր», որը ստորագրվել էր հունիս 19-ին ՀՀ նախագահ Սերժ Սարգսյանի՝ Վրաստանի Հանրապետություն կատարած այցի շրջանակներում, քննարկումների ու քննադատության առիթ է հանդիսացել վրացական լրատվամիջոցների, հասարակական ու փորձագիտական շրջանակներում:

Վրացի փորձագետների կարծիքով, այդ համաձայնագիրը խոչընդոտելու է Վրաստան-ՆԱՏՕ հարաբերությունների զարգացմանը, քանի որ Հայաստանն հանդիսանում է Ռուսաստանի Դաշնության ռազմավարական գործընկերը և համաձայնագրի ստորագրմամբ, Վրաստանից գաղտնի տեղեկատվության արտահոսքի հավանականությունը էապես մեծանում է: Հարցին անդրադարձել է «Apsny.ge» կայքը:

Գաղտնի տեղեկատվության փոխանակման մասին Հայաստանի հետ ստորագրված համաձայնագրի քննադատությամբ են հանդես եկել Միխեյիլ Սաակաշվիլիի նախագահության տարիներին նախարարական պորտֆելներ զբաղեցրած անձիք:

«Ֆրոնտ Նյուզ» գործակալության հետ զրույցում, Վրաստանի պաշտպանության նախկին նախարար Բաչո Ախալայը, ով ներկայումս գտնվում է ազատազրկման մեջ, մասնավորապես, ասել է. «Հայաստանի հետ գաղտնի տեղեկատվության մասին համաձայնագրի ստորագրումը, մեղմ ասած, հիմարություն է, եթե հաշվի առնենք այն հանգամանքը, որ նմանօրինակ համաձայնագիր Հայաստանը ստորագրել է նաև Ռուսաստանի հետ: Ենթադրում եմ, ինքներդ կգուշակեք, թե ինչու նման համաձայնագիրը մեզ ձեռնտու չէ: Հայաստանի հետ գաղտնի տեղեկատվության փոխանակում մեզ բոլորովին էլ պետք չէր, բացի որոշակի քանակությամբ, այն էլ Հայաստանի հետ բարեկամական և բարիդրացիական հարաբերությունների համատեքստում: Կոլեգիալ և անձնային հարաբերություններ՝ ահա այն ինչ պետք է անվտանգության ոլորտում Հայաստանի հետ, այլ ոչ թե համաձայնագիր»:

Հունիսի 21-ին հարցին անդրադարձել է նաև Վրաստանի կրթության նախկին նախարար Նիկա Ռուրուան, հայտարարելով, թե Հայաստանի հետ համաձայնագիրը փակում է Վրաստանի ճանապարհը դեպի ՆԱՏՕ. «Տեղեկություն է տարածվել այն մասին, որ ներկայիս իշխանությունները համաձայնագիր են ստորագրել Հայաստանի հետ գաղտնի տեղեկատվության փոխանակման վերաբերյալ: Եթե դա իրականությանը համապատասխանում է, ապա կարելի է արձանագրել, որ ՆԱՏՕ-ն գաղտնի տեղեկատվություն այլևս չի տրամադրի Վրաստանին, քանի որ Հայաստանը Ռուսաստանի հետ անդամակցում է Հավաքական անվտանգության կազմակերպության համաձայնագրին, այսինքն գտնվում է Ռուսաստանի հետ միևնույն ռազմական դաշինքում: Դա իրականում կփակի ՆԱՏՕ-ի դռները մեր առջև, ինչն անթույլատրելի է»:

Վրացական լրատվամիջոցները երեկ համաձայնագրի մանրամասները փորձել են ստանալ երկրի նախագահի աշխատակազմից:

«Ակցենտ» գործակալության հարցին, թե որոնք են Հայաստանի հետ ստորագրված համաձայնագրի դետալները և որքանով են դրանք խոչընդոտում Վրաստան-ՆԱՏՕ հարաբերությունների զարգացմանը, աշխատակազմից հայտնել են, թե «համաձայնագրի ձևակերպման մանրամասներն իրենց լիազորությունների մեջ չեն մտնում և հորդորել են դիմել կառավարությանը»:

Վրաստանի կառավարության անդամները լրատվամիջոցների ու ընդդիմության ներկայացուցիչների մտավախությունները փարատող մեկնաբանություններով դեռևս հանդես չեն եկել: