Ձեր վստահելի աղբյուրը

Արդեն հինգերորդ տարին անընդմեջ Orange հիմնադրամի աջակցությամբ Երևանից և ՀՀ մարզերից 16 աուտիզմով երեխաներ իրենց խնամակալների և դաստիարակների ուղեկցությամբ իրենց ամառային հանգիստն անցկացնում են Ապարանի ամառային առողջարանային ճամբարում: Անհրաժեշտ բուժում ստանալուն զուգահեռ ճամբարում այս երեխաները վայելում են բազմազան խաղերով և միջոցառումներով լեցուն ժամանցային առօրյա: Այս մասին հաղորդում է Orange հիմնադրամի հասարակայնության հետ կապերի բաժինը:

«Orange հիմնադրամը մեծապես կարևորում է խոցելի երեխաների աջակցության խնդիրը: Մեր բարեգործական գործունեության ընթացքում իրականացվող ծրագրերի շրջանակներում 2010թ.-ից ի վեր համագործակցում ենք «Արաբկիր» Միացյալ մանկական բարեգործական հիմնադրամի հետ և այժմ ուրախ ենք արդեն հինգերորդ տարին անընդմեջ աուտիզմով երեխաների ամառային հանգիստը կազմակերպել Ապարանի ամառային առողջարանային ճամբարում: Այս կենտրոնի հետ համագործակցության կարևորագույն նպատակներից մեկն է աուտիզմով երեխաների համար ստեղծել համապատասխան միջավայր, որը կնպաստի այս երեխաների ինտեգրմանը հասարակություն», - ասել է Orange հիմնադրամի խորհրդի նախագահ Ֆրանսիս Ժելիբտերը:

Ամառային առողջարանային ճամբարում աուտիզմով երեխաների ամառային հանգստի կազմակերպումը Orange հիմնադրամի աջակցությամբ իրականացվող «Օգնենք աուտիզմով երեխաներին» ծրագրի միայն մի մասն է կազմում: Այս ծրագրի շրջանակներում նաև «Արաբկիր» Միացյալ մանկական բարեգործական հիմնադրամի կողմից կազմակերվում են հատուկ վերապատրաստման դասընթացներ բուժանձնակազմի, մանկավարժների, աշակերտների և աուտիզմով երեխաների ծնողների համար՝ նպատակ ունենալով ներդնել աուտիզմի վաղ ախտորոշման ու բուժման ժամանակակից մեթոդներ, ինչպիսիք են CHAT և ADOS թեստերը, ինչպես նաև բարձրացնել իրազեկությունն աուտիզմի մասին: «Օգնենք աուտիզմով երեխաներին» ծրագրի կարևորագույն բաղադրիչներից մեկն է աջակցել աուտիզմով ախտորոշված երեխաների ինտեգրմանը հասարակություն՝ ընձեռելով նրանց մասնագիտական կրթություն ստանալու հնարավորություններ: 2013թ. առաջին անգամ Հայաստանում Ֆրանսիայի դեսպանատան աջակցությամբ Երևանի ֆրանս-հայկական մասնագիտական ուսումնական կենտրոնում կազմակերպվեց աուտիզմով մեկ երեխայի մասնագիտական կրթությունը:

«Արդեն հինգ տարի է Orange հիմնադրամի աջակցությամբ իրականացնում ենք այս հրաշալի ծրագիրը, որը թույլ է տալիս համապատասխան պայմաններ ստեղծել աուտիզմով երեխաների սոցիալական ինտեգրման և նրանց կյանքի որակի բարելավման համար: Ծրագրի շնորհիվ կարևոր ներդրումներ արվեցին այս ոլորտում, որից ուզում եմ հատկապես նշել համայնքային մակարդակում ինտեգրացված առողջապահական-կրթական-սոցիալական մոդելի և աուտիզմով երիտասարդի մասնագիտական կրթության ներդրումը Հայաստանում: Ծրագրի ամենատպավորիչ բաղադրիչը աուտիզմով երեխաների հանգստի կազմակերպումն է Ապարանի ամառային ճամբարում: 16 երեխա ունի բացառիկ հնարավորություն` վայելելու ամառային հանգիստն այս գեղատեսիլ վայրում: Ճամբարային կյանքը հիանալի է ազդում երեխաների շփման վրա, իսկ խնդիրներ չունեցող երեխաները սովորում են ուշադիր լինել և հոգ տանել իրենց ընկերների մասին: Իհարկե, մեր երազանքն է ավելի մեծ թվով երեխաների հյուրընկալել ճամբարում, որը, հուսով եմ, կկարողանանք մի օր իրագործել», - ասել է «Արաբկիր» Միացյալ մանկական բարեգործական հիմնադրամի Հոգաբարձուների խորհրդի անդամ և «Արաբկիր» ԲՀ-ի գիտական խորհրդատու, պրոֆեսոր Արա Բաբլոյանը:

2014 թվականին «Օգնենք աուտիզմով երեխաներին» ծրագրի շրջանակներում աուտիզմով և հաղորդակցման այլ խանգարումներով երեխաների համար նախատեսվում է ստեղծել ինտեգրված ծառայությունների մի համապարփակ համայնքային մոդել: Մալաթիա- Սեբաստիա համայնքի մանկապարտեզն ու դպրոցը ներկայումս համապատասխանեցվում են նման երեխաների կարիքներին՝ համալրվելով անհրաժեշտ պարագաներով, ինչպես նաև համապատասխան գիտելիքներ և փորձ փոխանցելով աուտիզմով երեխաների կրթական գործընթացում ներգրավված դաստիարակներին և մանկավարժներին: