Ձեր վստահելի աղբյուրը

Իրանի օդային տարածքում օգոստոսի 23-ին խոցված իսրայելական անօդաչու թռչող սարքը, որն ամենայն հավանականությամբ հետախուզական թռիչք է իրականացրել, թռիչքը մեկնարկել է Ադրբեջանի տարածքից: Այս մասին հայտնում են արևմտյան մի շարք լրատվամիջոցներ:

Օգոստոսի 24-ին մի շարք լրատվամիջոցներ, հղում անելով իրանական «Ալ Ալամ» հեռուստաընկերությանը, տեղեկացրել էին, որ Սպահան նահանգի Նաթանզ քաղաքի մերձակայքում գտնվող միջուկային օբյեկտների մերձակայքում խոցվել է իսրայելական անօդաչու թռչող սարք:

Փաստի առթիվ Իրանի արտաքին գործերի նախարարությունը հայտարարություն էր տարածել, որով դատապարտել էր երկրի օդային տարածքը խախտելու փաստը, տեղի ունեցածը որակել «թշնամական ակտ» և ընդգծել, որ կարող է միջադեպի առթիվ դիմել միջազգային արդարադատության ատյաններին:

Իսլամական հեղափոխության պահապանների կորպուսի ներկայացուցիչը մամուլին հայտնել էր, որ մասնագետներն առայժմ ուսումնասիրում են իսրայելական թռչող սարքը: Այս հայտարարությունը փորձագետներին տեղիք էր տվել ենթադրել, որ թռչող սարքը կառավարվել է Իրանի տարածքից: Ավելի ուշ հայտնի էր դարձել, որ խոցված սարքը Hermes-450 մոդելի իսրայելական արտադրության ԱԹՍ է:

Հաշվի առնելով հանգամանքը, որ նշված մոդելի ԱԹՍ-ի գործողության շառավիղը 800 կմ է, իսկ Իսրայելը միջադեպի վայրից հեռու է մոտ 1100 կմ, փորձագետները ենթադրել են, որ անօդաչու սարքը երկինք է բարձրացել հարևան երկրներից մեկի տարածքից: Մինչև այսօր շրջանառվում էր տարբերակը, որ հետախուզական գործողության թռիչքուղին եղել է Սաուդյան Արաբիան, սակայն օրվա ընթացքում արևմտյան և իսրայելական մի շարք լրատվամիջոցներ հայտնեցին, որ իսրայելական Hermes-ն օդ է բարձրացել և Իրանի տարածք մուտք է գործել Ադրբեջանից:

Հատկանշական է, որ «The Aviationist» մասնագիտացված բլոգի մեկնաբանները ևս համոզված են, որ իսրայելական ԱԹՍ-ն Ադրբեջանի Զինված ուժերի տրամադրության տակ եղած սարքերից մեկն է: Նրանք Իրանում խոցված Hermes-ը համեմատել են ԼՂՀ օդային տարածքում 2011-ին խոցված ԱԹՍ-ի հետ և բազմաթիվ նմանություններ գտել:

Նշենք, որ Ադրբեջանի Զինված ուժերի տրամադրության տակ հաշվվում էր մոտ 12 Hermes-450 մոդելի իսրայելական արտադրության սարքեր: Բացի այդ, որոշ տվյալներով, Ադրբեջանի տրամադրության տակ առկա են 12 հատ Hermes-900, անհայտ քանակությամբ Orbiter 2M, Heron TP, Searcher-2 և Aerostar մոդելների անօդաչու թռչող սարքեր: Նշված բոլոր մոդելների խնդիրը հետախուզության իրականացումն է: Ադրբեջանա-իսրայելական բազմամիլիարդանոց գործարքները, որոնց արդյունքում իսրայելական անօդաչու սարքերը հայտնվել էին Բաքվի տրամադրության տակ, ժամանակին մասնագետների կողմից լուրջ քննարկումների առարկա էին դարձել: Նշվում էր, որ Բաքվին տրամադրված սպառազինությունն իրականում ուղղված է լինելու ոչ թե Լեռնային Ղարաբաղի դեմ, այլ Ադրբեջանի տարածքը որպես պլացդարմ օգտագործվելով, կիրառվելու է Իրանի իսլամական Հանրապետության տարածքում: