NYT. ««Իսլամական պետությունը» Թուրքիայից կայուն հավաքագրում է իրականացնում»
Ամերիկյան The New York Times թերթը «Իսլամական պետությունը Թուրքիայից կայուն հավաքագրում է իրականացնում» վերնագրով հոդված է տպել, որում անդրադարձ է կատարել Թուրքիայի կողմից մեծ թվով ջիհադիտներ հավաքագրելուն, մարզելուն և նրանց նկատմամբ բաց սահմանների քաղաքականություն վարելուն, որը աղետալի հետևանքեր ունեցավ հարևան երկրների համար, ինչպես նաև մի երիտասարդի մասին, ով կռվել է խմբավորման շարքերում, սակայն հետագայում զղջացել դրա համար:
Հոդվածը ներկայացնում ենք որոշ կրճատումներով.
«Իր ողջ երիտասարդությունը որպես թմրամոլ անցկացնելով Թուրքիայի մայրաքաղաքի ամենաաղքատ թաղամասերից մեկում` Ջանը չէր կարծում, որ կորցնելու շատ բան ունի, երբ Սիրիայում կռվում էր իր մանկության ընկերների հետ` միանալով աշխարհում ամենածայրահեղական խմբավորմանը:
15 օր Սիրիայի Ռաքքա քաղաքում մարզվելուց հետո, որը դե ֆակտո խմբավորման կենտրոնն է, 27-ամյա Ջանը միացել է նրանց: Ջանը սպանել է երկու մարդու և մասնակցել հանրային մահապատիժներին: Միայն այն բանից հետո, երբ կենդանի թաղել է մի մարդու, դարձել է «Իրաքի և Լևանտի իսլամական պետության» լիիրավ անդամ:
«Երբ դու կռվում ես այնտեղ, դա նման է տրանսի: Բոլորը գոռում են` Աստված մեծ է, որը քեզ տալիս է թշնամուն սպանելու աստվածային ուժ` առանց վախենալու արյունից կամ աղիների դուրսպրծումից»,-թերթին տված հարցազրույցում ասել է Ջանը:
Հոդվածի հեղինակը նշում է, որ խմբավորմանը միացել են հարյուրավոր օտարերկրացի զինյալներ Եվրոպայից և ԱՄՆ-ից, սակայն գրոհայինների հավաքագրմամբ մեծապես զբաղվում է հարևան Թուրքիան` ՆԱՏՕ-ի անդամ երկիրը:
Ըստ թուրքական մամուլի և պետական պաշտոնյաների` ԻԼԻՊ-ին է միացել ավելի քան 1000 թուրք: ԱՄՆ-ն մեծ ճնշում է գործադրել Թուրքիայի նախագահ Ռեջեփ Թայիփ Էրդողանի վրա, որպեսզի կանխի օտարերկրացի զինյալների հոսքը և դադարեցնի խմբավորման կողմից` Սիրիայի ու Իրաքի իր գրավյալ տարածքներից նավթի արտահանումը:
Բացի այդ, Թուրքիան հրաժարվեց ստորագրել կոմյունիկեն, որով նախատեսվում էր նոր միջոցներ կիրառել ԻԼԻՊ-ի դեմ:
Թուրքիային շատ են քննդադատել և երկրի ներսում, և նրա սահմաններից դուրս` Սիրիայի ապստամբության առաջին օրերին բաց սահմանների քաղաքականություն վարելու համար, որը մեծացրեց ԻԼԻՊ-ի դերը:
Թուրքիայում առաջիններից, ով միացել է ԻԼԻՊ-ին, Օզգուզհան Գոզլեմջիօղլուն է, ով երեք տարվա ընթացքում Ռաքքայում դարձել է շրջանային հրամանատար: Տեղացիները նշում են, որ նա հաճախակի է մեկնում Անկարա, և ամեն անգամ վերադառնալիս նոր զինյալներ է իր հետ բերում:
Թուրքիայում ԻԼԻՊ-ի նկատմամբ հետաքրքրություն ունեն նաև երեխաները, ովքեր զենքերը գերադասում են խաղալիքներից և մեծ ցնծությամբ են ընդունում «դավաճանների» ոչնչացման վերաբերյալ ցանկացած լուր:
Սակայն Ջանը, ով արդեն վերադարձել է Ռաքքայից, ափսոսում է իր արածների համար:
«ԻԼԻՊ-ը շատ դաժան է: Նրանք Ղուրանը մեկնաբանում են` ելնելով իրենց շահերից: Աստված երբեք մուսուլմանին չի հրամայել սպանել մուսուլմանին»,-ասել է Ջանը` ավելացնելով, որ շատերը միանում են խմբավորմանը ֆինանսական շարժառիթներով:
«Երբ դու կռվում ես, նրանք քեզ օրական 150 դոլար են վճարում: Այնուհետ ամեն ինչ անվճար է: Նույնիսկ խանութի սեփականատերերն են վախից քեզ անվճար ապրանք տալիս»,-նշել է խմբավորման նախկին անդամը»:
Լրահոս
Տեսանյութեր
Փաշինյանն ընդամենը մի տհաճ խոչընդոտ է հայրենիք ունենալու ճանապարհին. Զոհված զինծառայողի մայր