Ձեր վստահելի աղբյուրը

«Հայաստան-Իրան էլեկտրահաղորդման երրորդ գծի կառուցումը մեծ նշանակություն ունի մեր երկրի համար»,-այդ մասին իրանական «ԻՌԻԲ» լրատվական գործակալության հաղորդմամբ՝ հայտարարել է ՀՀ էներգետիկայի և բնական պաշարների նախարար Երվանդ Զախարյանը:

Համաձայն հաղորդագրության՝ Երվանդ Զախարյանը Թեհրանում Իրանի արտահանման զարգացման բանկի տնօրեն Բահման Վաքիլիի հետ ունեցած հանդիպման ընթացքում, անդրադառնալով էլեկտրահաղորդման երրորդ գծի կառուցման ֆինանսավորման խնդրին, նշել է, որ դրա կառուցման արդյունքում երկու երկրների միջև էլեկտրէներգիայի փոխանակման ծավալները երկուսից երեք անգամ կմեծանան:

Նշենք, որ Հայաստանն Իրանից գազ է ներկրում, փոխարենը՝ Իրան է արտահանում էլեկտրաէներգիա:

Իրանի արտահանման զարգացման բանկի տնօրենն ասել է, որ իր բանկի ֆինանսական ակտիվների մի մասի սառեցման պատճառով երկու տարով դադարեցվեցին Արաքս գետի վրա համատեղ ՀԷԿ-ի կառուցման նախագծային աշխատանքները:

Հիշեցնենք, որ նախօրեին վարչապետ Հովիկ Աբրահամյանի գլխավորած պատվիրակությունը մեկնել է Իրանի Իսլամական Հանրապետություն, որտեղ հանդիպում է ունեցել նախագահ Հասան Ռոհանիի, նախագահի առաջին տեղակալ Էսհաղ Ջահանգիրիի և ԱԳ նախարար Մոհամմադ Ջավադ Զարիֆի հետ: Նախատեսվում է, որ այսօր վարչապետը կմասնակցի Սպահանի հայկական Ս.Ամենափրկիչ հայկական եկեղեցու հիմնադրման 350-րդ տարեդարձի միջոցառումներին:

Հավելենք, որ ՀՀ կառավարության ծրագրում Հայաստանի անմիջական հարևաններ Իրանի և Վրաստանի վերաբերյալ հետևյալ դրույթներն են ամրագրված:

• Անմիջական հարևանների` Իրանի և Վրաստանի հետ հարաբերությունների առավել զարգացում:
• Իրանի ու Վրաստանի հետ համատեղ տարածաշրջանային զբոսաշրջային արդյունքի ձևավորում, համաշխարհային շուկայում ներկայացում և խթանում:
• Տարածաշրջանային գործընկեր պետությունների հետ, հատկապես՝ Վրաստանի և Իրանի, համագործակցության ակտիվացում՝ ապահովելով հայկական ապրանքների համար այդ երկրներ մուտք գործելու առավել բարենպաստ պայմաններ:
• Իրան-Հայաստան և Հայաստան-Վրաստան 400 կվ լարման էլեկտրահաղորդման օդային գծերի կառուցում, որը Հայաստանի Հանրապետությունից հարևան երկրներով էլեկտրաէներգիայի տարանցիկ մատակարարման և արտահանման հնարավորություն կստեղծի: