Խադիջա Իսմայիլովայի ձերբակալության փաստը միջազգային հանրության ուշադրության կենտրոնում է
«Հետաքննող լրագրող Խադիջա Իսմայիլովայի ձերբակալությունն անցած ուրբաթ ադրբեջանական իշխանությունների կողմից և նրան ինքնասպանության դրդման հոդվածի հիման վրա փակելը մեկուսարանում յուրաքանչյուր ժողովրդավարական հասարակության համար առանցքային գործոն հանդիսացող խոսքի ազատության դեմ քայլ է»,- ասված է Եվրամիության արտաքին քաղաքականության և անվտանգության ծառայության կայքում:
Հայտարարության մեջ Եվրամիությունը կոչ է անում Ադրբեջանին` որպես ԵԱՀԿ ու Եվրոպայի խորհրդի անդամ, լիարժեքորեն հետևել իր ստանձնած միջազգային պարտավորություններին` ապահովելով ԶԼՄ-ների ազատությունը: Եվրամիությունը զգուշացնում է, որ ուշադիր կերպով հետևելու է Խադիջա Իսմայիլովայի գործում իրադարձությունների զարգացմանը:
Եվրախորհրդարանի ռումինացի պատգամավոր Մոնիկա Մաքովեյն իր հերթին նամակով դիմել է Ադրբեջանի նախագահ Իլհամ Ալիևին և երկրի արդարադատության նախարար Ֆիքրեք Մամեդովին` պահանջելով անհապաղ ազատ արձակել Խադիջա Իսմայիլովային: Նամակը հրապարակվել է պատգամավորի պաշտոնական կայքում: Իր նամակում նա պահանջում է դադարեցնել լրագրողին հետապնդելու ու երկրից դուրս գալն արգելելու արշավը` նախազգուշացնելով, թե քայլեր կձեռնարկի Իսմայիլովայի ազատման ուղղությամբ:
Միջազգային իրավապաշտպան հեղինակավոր կազմակերպության` Index on Censorship-ի կայքում ևս մի հոդված է հրապարակվել, որի հեղինակն իրավապաշտպան Ռեբեկա Վինսենթն է: Վերջինս նկատել է, որ ադրբեջանցի լրագրողի ձերբակալությունն ադրբեջանցի պաշտոնյաների ու իրենց համախոհների կողմից նրան լռեցնելու նոր մարտավարության դրսևորում է: Վինսենթը, որը դեռևս մեկ տարի առաջ Ադրբեջանում լրագրողների բռնաճնշումների մասին հոդված էր հրապարակել կազմակերպության կայքում, ներկայիս հրապարակման մեջ նշում է, թե իրավիճակը նկատելիորեն վատթարացել է:
Al Jazeera միջազգային հեռուստաընկերության կայքում էլ է տեղ գտել մի հոդված, որտեղ ներկայացված են լուսանկարներ ու տեսագրություններ Իսմայիլովային ի պաշտպանություն ընթացող բողոքի ցույցերից:
Ադրբեջանական «Թուրան» լրատվական գործակալության տվյալներով`«125-ի ակումբ» կազմակերպությունը, որի անդամները հասարակական ու քաղաքական գործիչներ են, նույնպես հայտարարություն է տարածել` պահանջելով ազատ արձակել Խադիջա Իսմայիլովային ու այլ ձերբակալված հասարակական-քաղաքական ակտիվիստներին:
«Նմանատիպ ձերբակալությունները խոչընդոտ են ժողովրդավարական զարգացման, ինչպես և երկրի միջազգային վարկանիշի համար»,- ասված է հայտարարության մեջ:
Նշենք, որ ադրբեջանցի հայտնի լրագրող Խադիջա Իսմայիլովային ձերբակալել են դեկտեմբերի 5-ին հարցաքննությունից հետո: Սաբայիլի շրջանի դատարանը որպես նրա նկատմամբ խափանման միջոց սահմանել է երկու ամիս ժամկետով նախնական կալանք: Լրագրողը մեղադրվում է ինքնասպանության դրդելու հոդվածով: Եթե նրա մեղքն ապացուցվի, ապա Իսմայիլովային սպասվում է 3-7 տարի ազատազրկում:
Խադիջա Իսմայիլովան բազմիցս եղել է Ադրբեջանի կառավարության թիրախն իր լրագրողական գործունեության պատճառով: Նա մի շարք լրագրողական հետաքննությունների հեղինակ է, որտեղ մերկացրել է Ադրբեջանի իշխանության բարձր օղակներում կաշառակերության մեծ չափերն ապացուցող փաստեր: Վերջին շրջանում նա թոք-շոու էր վարում «Ազատություն ռադիոկայանում»:
Նյութեր թեմայի շուրջ`
Միջազգային կազմակերպություններն ու մամուլը` ադրբեջանցի լրագրող Խադիջա Իսմայիլովայի ձերբակալության մասին
Արևմուտքը քննադատում է Ադրբեջանի իշխանություններին լրագրող Խադիջա Իսմայիլովայի ձերբակալության համար
Ադրբեջանը բացասական ուղերձ է հղում միջազգային հանրությանը». ԵԽ գլխավոր քարտուղարը` Իսմայիլովայի կալանքի մասին
Լրահոս
Տեսանյութեր
Փաշինյանն ընդամենը մի տհաճ խոչընդոտ է հայրենիք ունենալու ճանապարհին. Զոհված զինծառայողի մայր