«Ձմե՛ռ պապ, բե՛ր մեզ պատժամիջոցներ». վանկարկել են Ադրբեջանում ընդդիմադիր ուժերի հանրահավաքին
Դեկտեմբերի 14-ին Բաքվի Յասամալի շրջանի «Մեհսուլ» մարզադաշտում անցկացվել է հանրահավաք, որտեղ պահանջել են ազատ արձակել քաղբանտարկյալներին: Հանրահավաքի նախաձեռնողը «Մուսավաթ» ընդդիմադիր կուսակցությունն էր: Հանրահավաքի օրը համընկնում էր դեկտեմբերի 10-ին նշվող Մարդու իրավունքների միջազգային օրվա հետ: Այս մասին հաղորդում է ադրբեջանական «Թուրան» լրատվական գործակալությունը:
Ինչպես նշվում է նյութում, հանրահավաքին մասնակցել է մոտ հազար հոգի: «Մուսավաթ» ընդդիմադիր կուսակցության նախկին առաջնորդ, ներկայումս Մտքի ազգային կենտրոնի ղեկավար Իսա Գամբարը, ելույթ ունենալով ունենալիս հայտարարել է, որ իշխանությունները համընդհանուր պայքար են մղում ընդդիմադիրների ու նրանց դեմ, ովքեր ճշմարտությունն են ասում: «Իշխանություններն անձամբ վախենում են մեզնից և դրա համար էլ փորձում են ձերբակալություններով ահաբեկել մեզ»,- նշում է Գամբարը:
Նա նաև հիշեցրել է, որ «Մուսավաթ»-ը դեռևս գարնանը որոշում էր ընդունել` եթե քաղբանտարկայներն ազատ չարձակվեն, ապա կուսակցությունը 2015-ին Բաքվում անցկացվելիք Եվրոպական խաղերը բոյկոտելու կոչ կանի:
Նյութում նշվում է, որ Գամբարի կարծիքով՝ իշխանություններն անցնում են բոլոր սահմանները՝ ձերբակալելով կանանց` իրավապաշտպան Լեյլա Յունուսին, լրագրող Խադիջա Իսմայիլովային:
«Ալիևի վարչակազմն իր ագահությունն ու անհագությունը դրսևորում է նաև քաղբանտարկյալների հարցում, որի ցուցանիշով Ադրբեջանն աշխարհում առաջատարներից է»,- ասել է Գամբարը՝ հավելով, որ Ադրբեջանի բանտերում ավելի քան 100 քաղբանտարկյալներ են տանջվում:
Համաձայն աղբյուրի տվյալների՝ «Մուսավաթ» կուսակցության ակտիվիստ Ռագիֆ Քերիմլին, ում երկու որդիները՝ Ֆարաջն և Սիրաջը, ձերբակալված են, հայտարարել է, որ քաղբանտարկյալների նկատմամբ ճնշումները ներում խնդրելու նպատակով է արվում: «Ազատությունը ողորմություն չեն տալիս: Այդ մարդիկ մեղավոր չեն: Ինչու՞ պետք է նրանք ներում խնդրեն», - ասել է Ռագիֆ Քերիմլին:
Նախկին քաղբանտարկյալ և «խղճի բանտարկյալ», իրավապաշտպան Վիդադի Իսկենդերլին վստահություն է հայտնել, որ իշխանությունները վաղ թե ուշ ստիպված են լինելու ազատել բոլոր քաղբանտարկյալներին՝ միջազգային հանրության ճնշումների ներքո:
«Մուսավաթ» կուսակցության ղեկավար Արիֆ Հաջիլիի կարծիքով՝ քաղբանտարկյալների և Ադրբեջանում ճնշումների դեմ բողոքողների թիվը չի սահմանափակվում հանրահավաքի մասնակիցների թվով:
Ըստ աղբյուրի՝ հանրահավաքի մասնակիցները վանկարկում էին «Ազատությու՜ն» կարգախոսը, պահել էին քաղբանտարկյալների նկարներ և տարբեր կարգախոսերով բազմաթիվ այլ պաստառներ: Օրինակ, պաստառներ վրա գրված էին «Ձմեռ՛ պապ, բե՛ր մեզ պատժամիջոցներ», «Պետք է վառել ոչ թե օլիմպիական խաղերի ջահը, այլ՝ ազատության ջահը» և այլն: Նյութում նշվում է, որ պաստառներից մեկի վրա էլ պատկերված էին օլիմպիական օղակներ՝ երկաթե ճաղերի հետևում:
«Թուրան»-ը գրում է, որ հանրահավաքի ավարտին բանաձև է ընդունվել, որի համաձայն` պահանջվում է դադարեցնել ճնշումները ժողովրդավարական ինստիտուտների նկատմամբ, չխախտել քաղաքացիների իրավունքները և ազատությունը՝ միջազգային կոնվենցիաների երաշխավորման համաձայն, անհապաղ և անվերապահորեն ազատել բոլոր «խղճի բանտարկյալներին» և քաղբանտարկյալներին:
Ադրբեջանական «Մինվալ.ազ» լրատվական կայքը ներկայացրել է ֆոտոռեպորտաժ` ընդիմադիր կուսակցության անցկացրած սույն հանրահավաքից:
Հանրահավաքը լուսաբանել է նաև «Կավկազսկի ուզել»-ը՝ փոխանցելով Իսա Գամբարի այն խոսքերը, թե քաղբանտարկյալներին չազատելու դեպքում իրենք միջազգային հանրությանը 2015-ին Բաքվում անցկացվելիք Եվրոպական օլիմպիական խաղերը բոյկոտելու կոչեր կանեն: Իսկ ահա «Կավկազ օնլայն» տեղեկատվական պորտալը, անդրադառնալով ցույցին, նշել է դրա 1500 մասնակիցների թվի մասին:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը
