Ձեր վստահելի աղբյուրը

Իզմիրի հայկական եկեղեցին օգտագործվում է որպես ախոռ: Այս մասին հայտնում է թուրքական «Միլլիյեթ» պարբերականի էլ. կայքը:

Տեղի բնակիչները, որոնք իրենց ձիերն ու կովերն են այստեղ բերում, բողոքել են եկեղեցին իրենց որջը դարձրած թմրամոլներից ու հարբեցողներից: Հայկական գրիգորյանական այդ եկեղեցին գտնվում է Իզմիրի Մենեմեն վարչական շրջանում: Ենթադրվում է, որ 19-րդ դարին պատկանող կառույց է, թեև այդ մասին վկայող արձանագրություն չի պահպանվել: Եկեղեցին ցավալի վիճակում է գտնվում, կառույցի ներսը լցված է գոմաղբով և այլ աղտոտություններով:

Տեղի բնակիչները բողոքում են, որ տարածքը վտանգավոր թմրամոլների և հարբեցողների վայր է դարձել: Գտնվում է ոստիկանների վերահսկողության ներքո, երեխաները չեն կարողանում հանգիստ խաղալ այդ տարածքում, անծանոթ մարդիկ են եկեղեցու շրջակայքում պտտվում:

Թաղամասի բնակիչներից Նուրթեն Յըլմազը հայտնում է, որ սա պատմական հայկական եկեղեցի է. «Թուրքիան, ցավոք, կարևորություն չի տալիս պատմական կառույցներին: Մարդն ինչ կրոնի էլ պատկանի, հոգևոր արժեքներին տեր պետք է կանգնել: Այսպիսի կառույցներն արդեն շատ քիչ են մնացել: Հիմա այս պատմական կառույցը ախոռի է վերածվել: Թմրամոլներն են այստեղ շրջում: Պետք է տեր կանգնել այս վայրին»:

Պատմական այս կառույցը որպես եկեղեցի ծառայել է մինչև 1922 թվականը: Երբ հայերը հեռացել են Մենեմենից, եկեղեցին բարձիթողի վիճակում է հայտնվել:

«Մինչև վերջերս այն օգտագործվում էր որպես զինվորական պահեստ, սակայն հիմա այն դատարկ է: Երեք տարի առաջ Մենեմենի քաղաքապետարանի նախաձեռնությամբ վերանորոգվել է տեղի հունական Ագիոս Կոնստանտինոս եկեղեցին, որը նույնպես 19-րդ դարի կառույց է: Այն ժամանակ խոստացվել է, որ հայկական եկեղեցին նույնպես կվերանորգվի, սակայն մինչև այժմ որևէ աշխատանք այդ ուղղությամբ չի կատարվել»,- տեղեկացնում է «Միլլիյեթ»-ը:

Ախոռի վերածված հայկական եկեղեցու մասին միաժամանակ ահազանգում են շուրջ մեկ տասնյակ թուրքական լրատվամիջոցներ: Տեղեկությունը լայնորեն տարածվում է ինտերնետային կայքերում: