Ձեր վստահելի աղբյուրը

«1994 թվականին մենք ստորագրեցինք հրադադարի պայմանագիր, սակայն հակառակորդը անընդմեջ խախտում է այն՝ փորձելով հաջողություններ գրանցել բանակցություններում: Նույնիսկ սպաների կորուստը նրանց չի ստիպում հետ կանգնել: Հաշվի առնելով ժողովրդի մոտ ունեցած իրավիճակի պատկերացումները, մենք կամ պետք է խախտենք հրադադարի պայմանագիրը, կամ պետք է քայլեր անենք հակառակորդին կանգնեցնելու համար: Մենք այդ հնարավորությունները ունենք»,- հայտարարեց ՀՀ պաշտպանության նախարար Սեյրան Օհանյանը լրագրողների հետ հանդիպման ժամանակ:

Անդրադառնալով հայկական խոցված ուղղաթիռի հարցին՝ նախարարը նշեց, որ խոցման վերաբերյալ ՊՆ-ն տարբեր տեղեկություններ տվել է. «Եղել են նաև պաշտոններից ազատումներ, կա քրեական գործ, որը ընթացքի մեջ է: Մեղքը ոչ թե ուղղաթիռի անձնակազմինն է, այլ հակառակորդինը, որը խախտել է հրադադարը: Հունվար ամսվա ընթացքում ուղիղ յոթ զոհ ենք ունեցել և դրա պատասխանը բազմապատիկ անգամ տվել ենք»:

Ինչ վերաբերում է ադրբեջանական կողմից գրանցված ակտիվությանը, Սեյրան Օհանյանը նշեց. «Մենք մանրակրկիտ վերլուծել ենք և հասկացել, որ հակառակորդի կողմից լարվածությունն ունի և ներքաղաքական, և արտաքին նպատակներ: Լարվածությունն անընդհատ ցուց է տալիս նրանց գործելաոճը: Անում ենք ամեն ինչ, որպեսզի լարվածությունը չվերածվի լայնամասշտաբ գործողությունների: Այս պահին նման միտում չկա»:

Սեյրան Օհանյանը ևս մեկ անգամ հավաստիացրեց, որ ինչպես բազմիցս նշվել է՝ ՀՀ-ն ղարաբաղյան հակամարտության կարգավորումը տեսնում է ԵԱՀԿ Մինսկի խմբի շրջանակներում: Ինչ վերաբերում է ադրբեջանական կողմի դրսևորած ապակառուցողականությանը, այն դատապարտված է անհաջողության:

Անդրադառնալով Գյումրիում հունվարի տասներկուսին Ավետիսյանների ընտանիքի սպանության գործով մեղադրյալ Վալերի Պերմյակովի հարցին՝ Սեյրան Օհանյանն ընդգծեց, որ այն ոչ մի կերպ չի կարող ազդել հայ-ռուսական դաշնակցական հարաբերությունների վրա, քանի որ դրանք գտնվում են բարձր մակարդակի վրա:

Պաշտպանության նախարարն անդրադարձավ նաև զորակոչերին՝ նշելով, որ բանակում զինվոր ունեցող յուրաքանչյուր հայ ընտանիք իր «կցորդն» ունի հայկական զինված ուժերում: Ինչ վերաբերում է զորակոչի ժամանակ տեղ գտնող խախտումներին, Օհանյանը նշեց, որ գոյություն ունի բողոքարկման մեխանիզմ, որը թույլ է տալիս վերացնել տեղ գտած խախտումները:

Նախարարը նշեց նաև, որ առաջնագծում այսօր հրամանատարությունն ինքնուրույն է գործում ստացած առաջադրանքի շրջանակներում: Ըստ Օհանյանի՝ առաջնագծում հայկական կողմը հավուր պատշաճի է կատարում իր պարտականությունները: