Ձեր վստահելի աղբյուրը

Չեխական Ֆրիդեկ Միստեկ քաղաքի Կապիտոլա գրատանը մոտ մեկ ամիս այցելուների համար բաց էր Արցախին նվիրված լուսանկարչական ցուցահանդես` հայտնի չեխ բլոգեր-լուսանկարիչ Լադիսլավ Վետվիչկայի հեղինակությամ։ Եվ չնայած նրան, որ հունվարի 7-ին սույն ցուցահանդեսի բացումը հաջողությամբ է անցել, ադրբեջանական կողմն ապատեղեկատվություն է տարածում, թե իբր այցելուներ չեն եղե, իսկ ցուցահանդեսն առհասարակ տապալվել է: Այս մասին հաղորդում է եվրոպական անկախ «Օրեր»  ամսագիրը:

Ը ստ աղբյուրի, փետրվարի 3-ին ցուցահանդեսի փակման արարողությանը ներկա են եղել Չեխիայում Հայաստանի դեսպան Տիգրան Սեյրանյանը, ինչպես նաև Չեխիայի համայնքի ներկայացուցիչներ, գրատան մեծաթիվ այցելուներ։ Գրատան տնօրեն Յան Բեխերը զարմացել էր， թե որքան մեծ է հետաքրքրությունն իր համաքաղաքացիների շրջանում։

«Նման աշխույժ ու հետաքրքիր հանդիպում մեզ մոտ դեռ չէր եղել»,- նկատել է նա։

Այնուհանդերձ, ինչպես նշում է ամսագիրը, Չեխիայում Ադրբեջանի դեսպան Ֆարիդ Շաֆիևը հարցազրույց է տվել ադրբեջանական «Թրենդ» լրատվական գործակալությանը` հեգնանքով շեշտելով, թե լուսանկարներից պարզ չէ` «ցուցահանդեսը տանն է անցկացվել， թե հանրային վայրում, որտեղ այցելուներ չեն եղել»։ Նա նաև տեղեկացրել է, որ Ֆրիդեկ Միստեկի քաղաքային իշխանությունների հետ ճշտում է մանրամասները:

Ամսագիրն ընդգծում է, որ նման խոսքերով Ադրբեջանի դեսպանն իրականում փորձում է իր անիրազեկվածությունը մտացածին հորինվածքով շղարշել։

«Նորություն չէ, որ Լեռնային Ղարաբաղին նվիրված ցանկացած միջոցառում ադրբեջանական կողմը հակադարձում է ապատեղեկատվությամբ։ Իբրև վկայություն հրապարակում ենք ցուցահանդեսի բացման լուսանկարներից»,- եզրափակում է ամագիրը:

Մեր հերթին հավելենք, որ հրապարակված լուսանկարներում հստակ երևում են տարիքային տարբեր խմբերի պատկանող այցելուները, այդ թվում` մի կին մանկան հետ: Բացի այդ, չի կարելի չնկատել, որ վերոհիշյալ ցուցահանդեսի այցելուների մի մասն էլ հոտնկայս են կամ հարկադրված են եղել տեղեր զբաղեցնել վաճասեղանների վրա, քանի որ ազատ աթոռներ թերևս չեն եղել: