Հայաստանն առաջին անգամ մասնակցում է Book Expo America ցուցահանդեսին
Հայաստանն այս տարի առաջին անգամ մասնակցում է Հյուսիսային Ամերիկայի հրատարակչական ոլորտի ամենահեղինակավոր Book Expo America ցուցահանդեսին, որը տեղի կունենա Նյու Յորքում մայիսի 27-29-ը:
Ցուցահանդեսում կներկայացվեն վերջին տարիներին Հայաստանում և արտերկրում հրատարակված գրքերը: Նյու Յորքի գրքի միջազգային տոնավաճառում Հայաստանի տաղավարի պաշտոնական բացումը տեղի կունենա մայիսի 27-ին: Այս մասին տեղեկացնում են ՀՀ մշակույթի նախարարությունից:
Այդ օրը տեղի կունենան հետևյալ գրքերի շնորհանդեսները`
«Պատմական Հայաստան, 100 տարի անց» (հեղինակ` Մեթյու Քարանյան)
Գրքում ամբողջացված են վերջին գրեթե քսան տարվա ընթացքում Մեթյու Քարանյանի կողմից կատարված հայկական հուշարձանների 125 լուսանկարներն ու դրանց պատմությունը:
Գրքում հեղինակն առանձնահատուկ անդրադառնում է իր հանդիպած հայերի կամ հայկական արմատներ ունեցող մարդկանց պատմությանը: Մեթյու Կարանյանն իր գիրքը նվիրել է իր երկու տատերին եւ բոլոր հայ կանանց, ովքեր վերապրել են Ցեղասպանության անմարդկային զրկանքները:
«Հայկական սփյուռք նախագիծ» (հեղինակ` Սկաուտ Թուֆանկջյան)
Հեղինակը հայտնի է որպես Բարաք Օբամայի նախընտրական արշավի լուսանկարիչ: «Հայկական սփյուռք նախագիծը» ներկայացնում է Հայոց ցեղասպանությունը վերապրած եւ նոր երկրում նոր կյանք սկսած հայերին:
«Ինչպես ջուրը և քարը» (հեղինակ` Դանա Ուոլրըթ)
Հեղինակը Հայոց ցեղասպանությունից փրկված արևմտահայի ժառանգ է։ Այս չափածո վեպը պատմում է իր տատիկի` 100 տարի առաջ կատարած ճամփորդության մասին:
Գիրքն արժանացել է «Համաշխարհային հանրության համար հռչակավոր գիրք», «Բենք Սթրիթ քոլեջի կրթության լավագույն գիրք» մրցանակներին։ Անվանակարգվել է ԵԳՍԱ «Լավագույն գիրք» և CBC-ի տարվա մրցանակին։ «Գրական տապան. ապրիլ» միջազգային փառատոնի մասնակիցն է եղել:
«Ոչ մի տեղ՝ աքսորի մի պատմություն» (հեղ.` Աննա Աստվածատուրյան Թըրքոթ)
Գրքում արտացոլված է հեղինակի անձնական պատմությունն ու հուշերը` Բաքվի հայության դեմ իրականացված ոճրագործությունների վերաբերյալ: Որպես դեռահաս աղջիկ Աննան ականատես է լինում ողբերգության սարսափելի իրադարձությունների, իր ընտանիքի հետ միասին մազապուրծ փախչում Ադրբեջանից, դառնում փախստական և ստիպված լինում ԱՄՆ-ում ամեն ինչ սկսել նորից: Հեղինակը պատմում է վերապրածների ու համայն հայության վրա այդ ոճրագործությունների պատճառած ծանր հետևանքների մասին:
«Ողջ լույսը, որ այնտեղ կար» (հեղ.` Նենսի Կրիկորյան)
Այս անգամ նրա վեպի հերոսները Ցեղասպանությունից մազապուրծ հայերն են, որոնք հասել են Ֆրանսիա եւ որտեղ Երկրորդ համաշխարահայինի տարիներին պայքարում են իրնց գոյության համար: Պատմության մի հատվածում ներկայացվում է, թե ինչպես ծանր ժամանակներում անհատներին և համայնքներին օգնող արժեքները , ծուղակը գցել մարդուն:
«Սրբազան արդարադատություն» (հեղ.` Մարիան Մեսրոպյան ՄաքՔարդի)
«Սրբազան արդարադատությունը» բազմաժանր գիրք է, որտեղ օգտագործվել են պատմողական, չհրապարակված հուշագրություններ, որոնք պատմում են Նեմեսիս Գործողությունը կազմակերպած մի խումբ հայերի պատմությունը:
«Լիբրետո անապատի համար» (հեղ.` Սոնա Վան)
«Լիբրետո անապատի համար» ժողովածուն իր մեջ ներառում է պատերազմի և Հայոց ցեղասպանության մասին բանաստեղծություններ և նվիրված է Հայոց ցեղապսանության 100-րդ տարելիցին:
Ամերիկացի կոնգրեսական Ադամ Շիֆը` «Հայոց ցեղասպանություն. ճշմարտություն և արդարություն» բանաձևի հիմնական հեղինակը, որը Սոնա Վանին անվանել է ազգերին կապող գրական կամուրջ, այս գրքի մասին գրում է. «Պատմությունը մեզ միայն թվերի և փաստերի մասին է տեղեկացնում, և իրական գրողն է միայն, որ կարող է ցույց տալ մարդու իրական վիճակը` կապելով մեր սրտերը մարդկային տառապանքին»:
BookExpo America ցուցահանդեսին Հայաստանի մասնակցությունն իրանացվում է Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի աջակցությամբ: