Ձեր վստահելի աղբյուրը

«Տիգրան Մանսուրյանի մասին կարելի է խոսել առավոտից կեսգիշեր, կեսգիշերից՝ լուսաբաց: Տիգրանից մարդահոտ է գալիս: Սա շատ կարևոր բան է»,- Հայաստանի Ազգային գրադարանում «Տիգրան Մանսուրյան. Կենսամատենագրություն» գրքի շնորհանդեսին ասաց բեմադրիչ Երվանդ Ղազանչյանը:

Տիգրան Մանսուրյանի մասին խոսելիս նա օգտագործեց պարկեշտ, ազնիվ և ազնվագույն, հայ, խենթ բառերը. «Հայոց լեզվում հրաշալի բառեր ունենք, որոնք մոռացված են, քիչ ենք օգտագործում: Պարկեշտ բառը օրը, շաբաթը, ամիսը քանի՞ անգամ ենք հիշում: Հենց տեսնում եք Տիգրան Մանսուրյանին, անմիջապես պարկեշտ բառն ենք օգտագործում: Նույնը՝ ազնիվ, ազնավագույն Տիգրան:  Հայ բառը քանի՞ անգամ ենք օգտագործում: Շատ դժվար ենք օգտագործում այդ բառը, երբ տեսնում ենք Տիգրանին, անմիջապես հայ բառն եք հիշում:

Խենթ բառը... Խոսքը գժի մասին չէ: Գժեր շատ ունենք, փառք Աստծո, ապահովված ենք: Գիժ շատ ենք ասում, խենթ՝ քիչ: Հենց տեսնում ենք Տիգրանին, ասում ենք՝ խենթը եկավ, քանի որ խենթերն են կյանքն առաջ տանում, նրանք անսովոր մարդիկ են»:

 

Կոմպոզիտորների միության նախագահ Արամ Սաթյանն էլ ասաց. «Ուրախ եմ մի բանում՝ Տիգրանին բոլորը սիրում են: Մի հատկանիշ է, որ ամեն մեկին տրված չէ, կարողանում է մարդկանց սրտերը գրավել՝ լինի երաժշտությամբ, թե խոսքով»:

Երիտասարդ կոմպոզիտոր Արթուր Ավանեսովն իր խոսքում նշեց. «Բազմաթիվ ճանապարհորդությունների ընթացում մտնում էի տարբեր երկրների երաժշտական խանութներ, փնտրում հայ երաժշտություն, գտնում՝ Մանսուրյան: Ինչի համար էի գտնում, որովհետև եզակի հնարավորություն է՝ լինելով հայ, պահպանել ազգային ինքնությունը, ամբողջ աշխարհի հետ խոսել հայերեն»:

Դերասան Աշոտ Ադամյանն էլ ասաց. «Տիգրան Մանսուրյան... Դե ինչպես կարելի է չհրճվել: Շնորհակալ եմ ճակատագրին, որ բախտ եմ ունեցել բարեկամանական, լավ հարաբերություններ ունենալ մեծ վարպետի հետ, որին ճանաչում է նաև ամբողջ աշխահը: Եվ հլը թող փորձվեն չճանաչել: Ոնց թե՞: Ոնց թե՞: Որովհետև դա հանակարծակի պատուհասում է բոլորին,  որը կոչվում է Տիգրան Մանսուրյան»:

 
«Տիգրան Մանսուրյան. Կենսամատենագրություն» գիրքը (ՀՀ մշակույթի նախարարություն, Հայաստանի Ազգային գրադարան) հրատարակվել է կոմպոզիտորի 75-ամյակի առթիվ: Այն իր մեջ ներառում է Մանսուրյանի տպագրված նոտաների, հոդվածների, հարցազրույցների, նրա մասին գրքերի, տպագիր մամուլում և ժողովածուներում հրապարակված նյութերի, կոմպոզիտորին նվիրված գեղարվեստական գործերի մատենագիտական նկարագրությունները:

«Վստահ ենք, հուսով ենք, որ Տիգրան Մանսուրյանն ակտիվորեն կշարունակի իր ստեղծագործական կյանքը: Նա գրել է երաժշտություն 20-րդ դարում, 21-րդ դարում, վստահ ենք, որ այդ երաժշտությունն ակտուալ, պահանջված ու ընկալելի կլինի 22-րդ դարում և հետագայում»-,- ասաց Ազգային գրադարանի տնօրեն Տիգրան Զարգարյանը:



«Մի քանի տարիների աշխատանք է, որ գրադարանի աշխատակիցներն են արել: Փառավոր աշխատանք է, ամբողջական տեսքի բերված և կարող է ծառայել իր նպատակին: Եթե վաղը մեկն ու մեկը ցանկանա իմ գործունեության այս կամ այն դրվագի հետ փաստերով ծանոթանալ, շատ լավ ուղեցույց կարող է լինել այս գիրքը:

Մեծ պարունակություն ունեցող գիրք է: Հսկայական ձայների, հնչյուննեի, աղմուկների շտեմարան է: Սրա հետևից գնալով, այդ ձայները հեշտությամբ կգտնեք: Այս գրքում ամբողջ կյանք է ամբարված: Հույս ունեմ՝ այնքան կաշխատեմ, որ սրա մեջ ուղղումներ մտցնելու ուժ և կարողանություն կգտնեմ իմ մեջ»,- ասաց Տիգրան Մանսուրյանը: 

Շարունակով խոսքը, կոմպոզիտորը նշեց. «Ես աշխատասեր եմ, աշխատող մարդ եմ և աշխատում եմ: Լինում են լավ շրջաններ, պայթուցիկ տարիներ, հանդարտ տարիներ, բայց յուրաքանչյուրի մեջ առավելություններ կան, կյանք է, հետքերը մնում են ու տարբեր են լինում: Ամբողջը տարօրինակորեն կարծես նախանշված է, կարծես մի ձեռք ինձ տանում է ամբողջ կյանքի ընթացքում: Բոլորի համար շնորհակալ եմ»:

Ավելի մանրամասն և Տիգրան Մանսուրյանի անզուգական կատարումը՝ տեսանյութում: