Ձեր վստահելի աղբյուրը

Եվրոպայի խորհրդի խորհրդարանական վեհաժողովի Սոցիալական, առողջապահության և կայուն զարգացման հանձնաժողովում նախօրեին քննարկվեց Սարսանգի ջրամբարի վերաբերյալ զեկույցը, որի զեկուցողն է Միլիցա Մարկովիչը։ Զեկույցը վերնագրված է «Ադրբեջանի սահմանամերձ շրջանների բնակիչները միտումնավոր զրկված են ջրից»։

Հակահայկական այս զեկույցի ընթացքի վերաբերյալ Panorama.am-ը զրուցել է ԵԽԽՎ-ում ՀՀ պատվիրակության ղեկավար, ՀՀ Ազգային ժողովի փոխնախագահ Հերմինե Նաղդալյանի հետ, ով ասաց, որ այս զեկույցը, Լեռնային Ղարաբաղի զեկույցի հետ միասին ադրբեջանական գրոհի տարբեր թևերն են, նույն պատկերով, նույն ձեռագրով զարգացող գործընթացներ, որն իրականացվում է ադրբեջանական լոբբիստների կողմից։

«Զեկույցի նպատակն է փորձել հիմք ստեղծել Ադրբեջանի համար նպաստավոր ձևակերպումներ ունենալու համար, զուգակցելով Հայաստանի վրա մեղադրանքներ բարդելու գործով: Այս Վեհաժողովում Ադրբեջանին ուղղված այնքան մեղադրանքներ կան՝ թե քաղաքական, թե իրավական, թե պարտավորությունների կատարման բնույթի, որ իրենց համար այսօր գերխնդիր է՝ ստեղծել այնպիսի իրավիճակ, որ կարողանան մեղադրանքներ հնչեցնել Հայաստանի վերաբերյալ։ Այս առումով ուզում եմ հիշեցնել ընդամենը 3 օր առաջ Բյուրոյի զեկույցի ժամանակ Սոցիալիստների խմբի ղեկավար Անդրեաս Գրոսի խոսքը, ով Վեհաժողովի հնագույն, ամենափորձառու ու հեղինակավոր պատգամավորներից է, սա ասում եմ, որ մեր ընթերցողը պատկերացնի, որ քաջատեղյակ մարդու մասին է խոսքը, ով կարճ նախադասությամբ ամփոփեց կարևոր մի միտք, որ Հայաստանը Եվրոպայի խորհրդի համար խնդրահարույց պետություն չէ, այսօր խնդրահարույց պետությունն Ադրբեջանն է»,-ասաց Հերմինե Նաղդալյանը։

Հերմինե Նաղդալյանը նշեց, որ բավական երկար ժամանակ զեկուցողը տարբեր մտացածին պատրվակներով ժամանակ է ձգում, և զեկույցի հաստատումից 1 տարի հետո է միայն դիմել Հայաստանի իշխանություններին՝ Հայաստան այց կազմակերպելու համար։

«Այս ողջ ընթացքում մենք իրեն ներկայացնում ենք, որ զեկույցը գրելու համար խիստ կարևոր է այցելել Ղարաբաղ և բացատրում ենք, որ Սարսանգի ջրամբարը գտնվում է ոչ թե Հայաստանում, ոչ թե Երևանում, այլ Ղարաբաղում։ Զեկուցողի կողմից Ղարաբաղ այցելելու ցանկություն չունենալը բացատրվում է նրանով, որ զեկուցողը, լինելով ուղղորդված Ադրբեջանի կողմից, համարում է, որ անթույլատրելի է ուղիղ կապ հաստատել Ղարաբաղի իշխանությունների հետ։ Սա քաղաքական բաղադրիչն է։ Եվ երկրորդն այն է, որ օգտվելով այդ հանգամանքից՝ չայցելել, չտեսնել իրական իրավիճակը, տուրք տալ Ադրբեջանի կողմից պատրաստած միակողմանի նյութերին և մեղադրանքներին ու պատրաստել միակողմանի փաստաթուղթ՝ Հայաստանի դեմ։ Սա է ամբողջ էությունը։ Մենք զեկուցողին բազմիցս ասել ենք, որ սիրով իրեն կընդունենք Հայաստանում, որտեղ կարող է տեսնել Սևանա լիճը, մեր ջրամբարները, իսկ Սարսանգի ջրամբարը տեսնելու համար պետք է գնալ Ղարաբաղ։ Զեկուցողի կողմից Ղարաբաղ այցը պարտադիր է, որի համար պետք է դիմել Ղարաբաղի իշխանություններին, քանի որ գրել մի բանի մասին, որը չես տեսել, չգիտես և ներկայացնել այս հեղինակավոր կազմակերպությանը՝ անհնար է։ Ահա այստեղ, այս պահին կանգնած ենք: Թեև մեզ համար տհաճ է զեկուցողի պատվիրված, անաչառությունից խիստ հեռու կեցվածքը, նրա չհակվածությունը համագործակցության և դուրս գալու այն կաղապարից, որով նրան սահմանափակել են «պատվիրատուները», ինչպես նաև հակումը անտեղի քաղաքականացնելու մարդասիրական, հումանիտար օրակարգի մաս հանդիսացող հարցերը, այնուամենայնիվ, պետք է ասեմ, որ մենք ինչպես բազմաթիվ այլ զեկույցների, այնպես էլ այս զեկույցի պարագայում, պետք է շարունակենք մեր աշխատանքը, փորձենք բացատրական և այլ աշխատանքներով հակազդել նման հարձակումներին»,-ասաց ՀՀ պատվիրակության ղեկավարը։

Հերմինե Նաղդալյանի խոսքերով, ներկայումս զեկույցի պատրաստումը գտնվում է կազմակերպչական՝ փաստահավաք առաքելությունների կազմակերպման փուլում, իսկ բովանդակային հարցերի քննարկում տեղի կունենա այն ժամանակ, երբ զեկուցողը այց կկատարի Ղարաբաղ։

Աննա Մկրտչյան, Ստրասբուրգ

Նախորդող հրապարակումներ`
Ադրբեջանցիները ԵԽԽՎ-ում բարձրացնում են Սարսանգի ջրամբարի հարցը
ԵԽԽՎ-ն վերանայո՞ւմ է իր մոտեցումը Հայաստանի նկատմամբ
Սարսանգի ջրամբար. ԵԽԽՎ-ն ԼՂՀ-ին չարձագանքեց, իսկ Ադրբեջանին չմերժեց
Այս ամենից, անկեղծ ասած, սկսում է երկակի ստանդարտների ու սուբյեկտիվության խիստ սուր հոտ գալ. Ն.Զոհրաբյան