Ձեր վստահելի աղբյուրը

Հայաստանի ատոմակայանն ունի բացարձակ անվտանգություն, օժտված է նույն անվտանգությամբ, ինչպիսիք են աշխարհի նմանատիպ մի շարք ատոմակայաններ։ Այս մասին այսօր ՀՀ Նախագահին կից ազգային էներգետիկայի անվտանգության խորհրդի (ԱԷԱԽ) նիստից հետո լրագրողների հետ հանդիպմանը հայտարարեց ԱԷԱԽ-ի նախագահ, Մյունխենի տեխնիկական համալսարանի ռեակտորների անվտանգության և դինամիկայի ամբիոնի ղեկավար Ադոլֆ Բիրկհոֆերը։

Նրա խոսքերով՝ ՀԱԷԿ-ը այդ անվտանգության մակարդակին հասել է երկար տարիների ընթացքում:

«Ատոմային էլեկտրակայանների շահագործման հայկական գիտահետազոտական ինստիտուտի» տնօրեն, Ատոմային էներգետիկայի անվտանգության խորհրդի քարտուղար Վահրամ Պետրոսյանն անդրադառնալով հայկական ատոմակայանի կյանքի երկարաձգման ու անվտանգության հարցերին՝ նշեց, որ միջազգային փորձը ցույց է տալիս, որ նման ատոմակայանների շահագործման տևողությունը երկարացվում է 15 և ավելի տարի: « Օրինակ՝ Ռուսաստանի, Ֆինլանդիայի, Ուկրաինայի ատոմակայանների շահագործումը երկարացվել է 15 տարով է և հաջորդ փուլով ևս 15 տարով կերկարացվի: Եթե ատոմակայանի շահագործման տևողությունը 30 տարի է, ապա կարելի է այն մինչև 30 տարի էլ երկարացնել։ Մենք առայժմ ձեռնամուխ ենք եղել երկարացնելու 10 տարով»,- ասաց Վ.Պետրոսյանը:

Նրա խոսքերով՝ այդ 10 տարին հնարավորություն է տալիս ընտրելու, թե ինչպիսին պետք է լինի նոր միջուկային էներգաբլոկը։ «Հայաստանի անվտանգությունը մենք ապահովված կլինենք, եթե ունենանք ատոմային էլեկտրակայան: Այս տարիների ընթացքում պետք է առաջին հերթին վերանայվի նոր միջուկային էներգոբլոկի կառուցման ծրագիրը: Հիմա միջազգային շուկա են մտնում միջին ու ցածր հզորության ատոմային էլեկտրակայաններ։ Մենք ուզում ենք նման միջուկային էներգաբլոկ ունենանք՝ 300-600 մեգավատ հզորությամբ։ Նոր զարգացող երկրները ներկայումս գնում են նրան, որ անպայման ունենան միջուկային էներգաբլոկ՝ ոչ մեծ հզորության։ Հետևաբար, շուտով տարբեր էներգաբլոկներ կմտնեն շուկա, ու մինչև գործող էներգաբլոկի գործարկման ավարտը կընտրենք տեսակը ու կունենանք նոր էներգաբլոկ»,- ընդգծեց Վահրամ Պետրոսյանը»,- ասաց Վահրամ Պետրոսյանը:

Ըստ նրա՝ գործող ատոմակայանի շահագործման տևողության երկարացման աշխատանքները բաժանված են երկու փուլի: Առաջին փուլում իրականացվում են տարբեր սարքավորումների, շինությունների ստուգում՝ դիագնոստիկա: Հաջորդ փուլում, ըստ նրա, կորոշվի, թե ինչ սարքավորումներ պետք է փոխվեն։ «Սարքավորումների դիագնոստիկայի փուլը մոտենում է ավարտին, 2016-ին պատրաստ կլինի հաշվետվությունը, դրանից հետո կմեկնարկեն նոր տեխնիկայի գնման ու տեղադրման աշխատանքները, իսկ 2018-ի վերջին արդեն կավարտվեն Ատոմակայանի վերականգնման աշխատանքները: Կգնենք նոր սարքեր ու ատոմակայանի կյանքը կերկարացվի մինչև 2027թ-ը»,- նշեց նա։

Անդրադառնալով գործող ատոմակայանի անվտանգության մակարդակի բարձրացմանն ուղղված աշխատանքներին, Վ.Պետրոսյանն ասաց, որ վերջին տարիներին ռեակտորի վթարային պաշտպանության նոր համակարգ է մտցվել: Այսինքն՝ եթե առաջ աշխատում էր մեկ ուղեգծով, ապա ներկայումս երկակի պաշտպանություն է գործում. «Դա, կարծում եմ, որ շատ լուրջ միջոցառում է: Բացի այդ, թարմացվել են շոգեգեներատորները, որոնք արդեն մոտ 30 տարի աշխատում էին»:

Վ.Պետրոսյանը նշեց նաև, որ ՄԱԳԱՏԷ-ի կողմից Հայաստանը համարվում է որպես միջուկային տեխնոլոգիա ունեցող երկիր, ուստի Հայաստանը պետք է դա օգտագործի. «Ամենակարևորը՝ ունենք հիանալի կադրեր և պետք է այդ կադրերին պահպանենք, ինչպես նաև չհրաժարվենք ատոմային էներգետիկայից: Հայաստանի նման երկիր, որտեղ նավթ, գազ չկա, պետք է լինի ատոմակային էներգակայան»: