«Եվրոպայի ժողովրդավար ուսանողներ» կազմակերպությունն ընդունել է Հայոց ցեղասպանությունը դատապարտող բանաձև
Այսօր Եվրոպական ժողովրդական կուսակցության ուսանողական կառույցը՝ «Եվրոպայի ժողովրդավար ուսանողներ» կազմակերպությունը (EDS) ընդունել է Հայոց ցեղասպանությունը դատապարտող բանաձև։ Բանաձևը EDS-ի խորհրդի հավաքի օրակարգ էր մտցվել Հայաստանի հանրապետական կուսակցության Երիտասարդական կազմակերպության առաջարկով, որն այս տարվա ամռանից եվրոպական ամենամեծ երիտասարդական այս կառույցի անդամ է։ Այս մասին հայտնում են ՀՀԿ Երիտասարդական կազմակերպության լրատվական ծառայությունից:
Բանաձևը դատապարտում է 19-րդ դարավերջին և 20-րդ դարասկզբին Օսմանյան կայսրության կողմից ցեղասպանական գործողություններն ընդդեմ հայերի, ասորիների և Պոնտոսի հույների։ Փաստաթղթով կոչ է արվում Թուրքիային առերեսվել պատմության հետ և ճանաչել Հայոց ցեղասպանությունը։ Նշվում է նաև, որ Ցեղասպանության ժխտումը Թուրքիայի իշխանությունների կողմից աշխարհում ծնում է նոր ոճիրներ։
«Եվրոպայի ժողովրդավար ուսանողներ» կազմակերպության նախագահ Գիորգոս Հաջիգիորգիոն ասել է, որ առաջին անգամ է EDS-ը պաշտոնական դիրքորոշում ներկայացնում ցեղասպանությունների վերաբերյալ. «Մեր խորհրդի հավաքի ընթացքում այսօր բազմաթիվ քննարկումներ եղան, և ձայների մեծամասնությամբ Ցեղասպանությունը դատապարտող բանաձևն ընդունվեց։ Մենք կոչ ենք անում Եվրամիության բոլոր երկրներին, որ նրանք ևս ճանաչեն ու դատապարտեն Ցեղասպանությունը։ Պետք է ասեմ, որ Եվրոպական Ժողովրդական կուսակցությունը նույնպես ունի իր պաշտոնական դատապարտող դիրքորոշումը հարցի շուրջ։ Բազմաթիվ երկրների խորհրդարաններ ճանաչել են Հայոց ցեղասպանությունը, և մեր ցանկությունն էր, որ EDS-ը ևս ունենա իր պաշտոնական տեսակետն այդ առումով»։
«Եվրոպայի ժողովրդավարական երիտասարդական համայնք» կազմակերպության (DEMYC) նախագահ Խավիեր Ուրտադո Միրան կարևորեց այն փաստը, որ Հայոց ցեղասպանության մասին խոսում է Եվրախորհրդարանում իշխող ուժի՝ Եվրոպայի ժողովրդական կուսակցության պաշտոնական ուսանողական կառույցը՝ EDS-ը։ «Պետք է ասեմ, որ DEMYC-ը նույնպես այս տարվա ապրիլին Երևանում ընդունեց Հայոց ցեղասպանությունը դատապարտող փաստաթուղթ։ Մենք այսօր դարձյալ այստեղ ենք՝ աջակցելու մեր հայ ընկերներին, որպեսզի այս հարցն ավելի լայնորեն քննարկվի միջազգային օրակարգում»,- նշել է Խավիեր Ուրտադո Միրան՝ ընդգծելով, որ այստեղ գտնվող եվրոպացի ուսանողները, վերադառնալով իրենց երկրներ, կխոսեն այս մեծ ոճրի մասին։ Նա իր խոսքն ամփոփել է Հայոց ցեղասպանության 100-րդ տարելիցի կարգախոսով՝ հիշում ենք ու պահանջում։
Այս օրերին Երևանում ՀՀԿ Երիտասարդական կազմակերպության հրավերով անցկացվում է EDS-ի խորհրդի հավաքը։
Հարակից հրապարակումներ`
- Նման հանդիպումները հնարավորություն են ընձեռում ծանոթանալու ապագայի նկատմամբ երիտասարդների պատկերացումներին. ՀՀ նախագահ
- Թուրքիան ժխտելով սկիզբ է դնում նոր ցեղասպանությունների. Վիգեն Սարգսյան
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը