Պատգամավոր. Հայաստանում մինչև հիմա ձևավորված բոլոր կոալիցիաներն ունեցել են արհեստածին մոտեցում
«Եթե երկրում կա մի քաղաքական ուժ, որը մեծամասնություն է, ունի այնքան քաղաքական կշիռ, որ բավարարում է իր տեսլականն առաջ տանելուն ու այդ պարագայում գնում է փոքր ուժերի հետ կոալիցիաների ձևավորման, նշանակում է, որ այդպես իրենք ցանկանում են կիսել պատասխանատվությունը: Բայց այդ դեպքում այդ պատասխանատվությունն ավելի շատ լղոզման է նման լինում»,- լրագրողների հետ հանդիպման ժամանակ ասաց ԱԺ պատգամավոր Թևան Պողոսյանը:
Ըստ նրա, Հայաստանում մինչև հիմա ձևավորված բոլոր կոալիցիաներն ունեցել են այս արհեստածին, արհեստական մոտեցումը:
Թ. Պողոսյանի կարծիքով, փոքր կուսակցություններին կոալիցիայում լինելը կնպաստի իրենց ծրագրերը կյանքի կոչելուն, իրենց շարքերն ամրապնդելուն, ցույց տալու, որ իրենք ունակ են ճիշտ բանակցել:
«Արդեն մի քանի օրից կամ մեկ օրից պարզ կլինի, թե ՀՀԿ-ՀՅԴ համագործակցության շրջանակում ինչ է ստանալու ՀՅԴ-ն»,- ասաց պատգամավորը:
Պատասխանելով հարցին, թե արդյո՞ք այդ կոալիցիան կշարունակի գործել 2017 թվականի ընտրություններից հետո, Թ. Պողոսյանն ասաց, որ նույնիսկ կարող է խորանալ. «Եթե ՀՅԴ-ն ասում է, որ իրենց համագործակցությունը միտված է նրան, որ սահմանադրական բարեփոխումներն իրականում կյանքի կոչվեն, պետք է ընտրություններից հետո շարունակվեն, քանի որ հենց ընտրություններից հետո են իսկապես կյանքի կոչվելու այդ բարեփոխումները: Եթե չշարունակվի, նշանակում է, որ կշարունակվի ամենաբացասական մշակույթը, որ ձևավորվել էր մինչև հիմա՝ արհեստական կոալիցիաները»:
Պատգամավորի խոսքով, կոալիցիայի գլխավոր հիմքը պետք է լինի այն, որ երկու կողմերը գիտակցեն՝ կիսվող պատասխանատվությունը հիմնվում է իրական արժեքների վրա: