Լեռնային Ղարաբաղը չի կարող երբևէ ունենալ ավելի ցածր կարգավիճակ, քան ունի այսօր. Շարմազանով
Երկու երկրների հարաբերությունները զարգանում են համաչափ և բնականոն, սակայն ներուժ կա այդ հարաբերություններն առավել զարգացնելու համար: Այս մասին նշել է ԱԺ փոխնախագահ Էդուարդ Շարմազանովը՝ ընդունելով ՀԱՊԿ խորհրդարանական վեհաժողովի խորհրդի արտագնա նիստի շրջանակում Հայաստանի Հանրապետություն այցելած ՀԱՊԿ ԽՎ-ում Սերբիայի Հանրապետության խորհրդարանի մշտական պատվիրակության ղեկավար Միլովան Դրեցունին և Սերբիայի Հանրապետության խորհրդարանի նախագահի տեղակալ Վերոլյուբ Արսիչին: Տեղեկացնում են ԱԺ հասարակայնության և տեղեկատվության միջոցների հետ կապերի վարչությունից:
Հայկական պատվիրակության ղեկավարը նշել է, որ հայ և սերբ ժողովուրդներն ունեն մի շարք ընդհանրություններ. երկու ժողովուրդներն այժմ ապրում են անկախ երկրներում և նրանց միավորում են քրիստոնեական արժեքները: Էդուարդ Շարմազանովը նաև ընդգծել է, որ հայ ժողովուրդը չի մոռանում շուրջ երեք տասնամյակ առաջ հայ ժողովրդին պատուհասած աղետի՝ ավերիչ երկրաշարժի օրերին օգնության շտապող սերբ օդաչուներին, ովքեր զոհվեցին՝ կատարելով իրենց մարդասիրական առաքելությունը:
Էդուարդ Շարմազանովն առաջնային է համարել միջխորհրդարանական հարաբերությունների զարգացումն ու համագործակցությունը տարբեր միջազգային կառույցներում: Այս համատեքստում նա անհասկանալի է համարել ԵԽԽՎ նստաշրջանում հակահայկական երկու բանաձևերին սերբական պատվիրակության աջակցության փաստը:
Զրուցակիցներն անդրադարձել են նաև Լեռնային Ղարաբաղի հակամարտության և Կոսովոյի խնդրի կարգավորմանը, միջազգային ահաբեկչության դեմ պայքարի հարցին: Էդուարդ Շարմազանովը ԼՂ հակամարտության կարգավորման հարցի առնչությամբ նշել է, որ այն տարբերվում է Կոսովոյի խնդրից. ի տարբերություն Կոսովոյի՝ Լեռնային Ղարաբաղը որևէ առնչություն չունի տարածքային ամբողջականության սկզբունքի հետ, քանի որ այն երբևէ չի եղել Ադրբեջանի կազմում: Էդուարդ Շարմազանովը վերահաստատել է, որ Հայաստանը ԼՂ հակամարտության կարգավորումը տեսնում է բացառապես խաղաղ ճանապարհով, ԵԱՀԿ Մինսկի խմբի շրջանակում. «Ղարաբաղի ժողովրդի ինքնորոշման իրավունքի իրացումն այլընտրանք չունի, և Լեռնային Ղարաբաղը չի կարող երբևէ ունենալ ավելի ցածր կարգավիճակ, քան ունի այսօր»,-ասել է նա:
Ահաբեկչության դեմ պայքարը համարելով համընդհանուր նպատակ՝ Էդուարդ Շարմազանովը նշել է, որ ահաբեկչության հետևանքով Հայաստանում ապաստան է գտել շուրջ 20 հազար սիրիահայ:
Սերբիայի Հանրապետության խորհրդարանի նախագահի տեղակալ Վերոլյուբ Արսիչը շնորհակալություն է հայտնել ընդունելության համար և նշել, որ թեև երկու երկրների հարաբերություններն արագորեն զարգանում են, այնուամենայնիվ կան ոլորտներ, որոնք պետք է առավել ակտիվացնել: Վերոլյուբ Արսիչն անհրաժեշտ է համարել զարգացնել հատկապես միջխորհրդարանական կապերը և տնտեսական ոլորտը:
Անդրադառնալով հակամարտությունների կարգավորման հարցին` նա նշել է, թե Սերբիան փորձում է հակամարտությունները կարգավորել երկխոսության և խաղաղ կարգավորման ճանապարհով: Սերբիայի խորհրդարանի փոխնախագահը ևս նկատել է, որ ԼՂ հակամարտությունը և Կոսովոյի հիմնախնդիրը գտնվում են տարբեր հարթություններում:
Լրահոս
Տեսանյութեր
Փաշինյանն ընդամենը մի տհաճ խոչընդոտ է հայրենիք ունենալու ճանապարհին. Զոհված զինծառայողի մայր
