Ձեր վստահելի աղբյուրը

Եվրոպայի խորհրդի խորհրդարանական վեհաժողովի գարնանային նստաշրջանում այսօր ելույթով հանդես եկավ Եվրոպական հանձնաժողովի նախագահ Ժան-Կլոդ Յունկերը։

Յունկերն իր ելույթում անդրադարձավ Եվրամիության և Եվրոպայի խորհրդի միջև արդյունավետ համագործակցությանը, որն ուղղված է մարդու իրավունքների, օրենքի գերակայության և ժողովրդավարության տարածմանն ու ամրապնդմանը ողջ Եվրոպայում։ Յունկերը նշեց, որ ժողովրդավարությունը կարող է արմատներ գցել յուրաքանչյուր տեղում։

Ժան-Կլոդ Յունկերի ուղերձի հիմնական կետերից էր Եվրամիության և Թուրքիայի միջև հակասական միգրացիոն համաձայնագիրը։ Յունկերը կոչ արեց չվախենալ միգրանտներից, քանի որ այս մարդիկ իրենց հետ Եվրոպա են բերում իրենց տաղանդն ու գիտելիքները։

Ելույթից հետո խորհրդարանականները հնարավորություն ունեցան հարցեր ուղղել Եվրոպական հանձնաժողովի նախագահին։

Ժան-Կլոդ Յունկերին հարց ուղղելու իր իրավունքը, իհարկե, բաց չթողեց Ադրբեջանի պատգամավոր Գանիրա Պաշաևան և ընկավ, այսպես ասած, իր իսկ պատրաստած ծուղակը։

Պաշաևայի ավանդական դարձած հարցին, թե «Հայաստանը շարունակում է օկուպացված պահել Ադրբեջանի տարածքները, որ Ադրբեջանն ունի 1 մլն տեղահանված անձինք ու Հարավային Կովկասում իրավիճակի սրումը նաև վտանգ է Եվրոպայի համար, և որպես նախագահ ինչ է  անում Յունկերը Լեռնային Ղարաբաղի հակամարտության համար», խիստ զայրացրեց Յունկերին։ Յունկերը նշեց, որ իրեն կանչել են այստեղ և ցանկանում են, որ ինքը ամբողջ խորությամբ պատասխանի բոլոր հարցերին, ինչը հնարավոր չի։

«Ինչ վերաբերում է Ադրբեջանին, այն, ինչ կարող եմ ասել՝ դադարեցրե՛ք կրակել, դադարեցրե՛ք կռվել։ Սա է այն ամենը, ինչ խնդրում եմ»,-զայրացած պատասխանեց Յունկերը։


Panorama.am-ի թղթակիցը՝  Ստրասբուրգից։