Ձեր վստահելի աղբյուրը

«Արմմոնո-2016» միջազգային 14-րդ փառատոնի շրջանակում ցուցադրված 26 ներկայացումը մեկը մյուսից լավն էր, ինչը կարևոր և հատկանշական է փառատոնի համար,- լրագրողների հետ հանդիպման ժամանակ ասաց ՀՀ մշակույթի նախարարության աշխատակազմի ժամանակակից արվեստի վարչության գլխավոր մասնագետ Նաիրա Հայրապետյանը:

Նա նշեց, որ մոնոներկայացումը բավականին բարդ ժանր է, դժվար է մեկ ժամ հանդիսատեսին պահել լարված, համոզվել, որ այն, ինչ կատարվում է բեմում, հավաստի է: Ն.Հայրապետյանի խոսքով, հայաստանցի մասնակիցների ներկայացումները, խաղը որևէ բանով չէին զիջել օտարազգի մասնակիցների բեմադրություններից:

Հիշեցնենք, որ «Արմմոնո»  միջազգային 14-րդ փառատոնը անցկացվել է ապրիլի 29-ից մայիսի 3-ը:   «Արմմոնո-2016» փառատոնն եզրափակել է Կ. Խոդիկյանի «Լույսը կբացվի» մոնոներկայացումը՝ դերասանուհի Կարինե Ջանջուղազյանի կատարմամբ: 

Փառատոնի տնօրեն Մարիաննա Մխիթարյանը տեղեկացրեց, որ այս տարի ցուցադրվեցին բազմատեսակ մոնոներկայացմումներ՝ մոնոպար, մոնոմնջախաղ, մոնոդրամա, մոնոստենդափ, ընդհանուր առմամբ` 26 ներկայացում  (Մեծ Բրիտանիա, Շվեյցարիա, Ֆրանսիա, Իսրայել, Բելառուս, Լեհաստան, Լիտվա, Ռուսաստան, Վրաստան և Հայաստան):

«Մեր փառատոնն անցկացվեց մեր երկրի համար բավականին դժվարին ժամանակաշրջանում, երբ շփման գծում իրավիճակը լարված է: Մեր հյուրերից որևէ մեկը մեզ չմերժեց, բոլորը եկան: Նրանք ընդգծում էին, որ ուզում են այս օրերին լինել մեր կողքին»,- նշեց նա:

Մ. Մխիթարյանն ասաց, որ փառատոնի շրջանակում հանդես եկած հայ դերասաններից շատերն  արդեն տարբեր երկրներից  հրավերներ են ստացել:

Նշենք, որ հիմնական ծրագրից զատ փառատոնում անցկացվել են նաև մի շարք այլ ծրագրեր՝ «Արմմոնո-Տրիումֆ», «Արմմոնո-Դեբյուտ», ինչպես նաև «Մեկ հեղինակի թատրոն» (2016թ. փառատոնի նորամուծություններից է). ցուցադրվել են հայ դրամատուրգ Կարինե Խոդիկյանի գործերից: Փառատոնի ծրագրում ներառված է եղել Նոբելյան մրցանակի դափնեկիր Սվետլանա Ալեքսիևիչի «Մարգարիտա և Աբուլֆազ» ստեղծագործության հիման վրա բեմադրված մոնոներկայացումը. այն նվիրված էր ՀՀ անկախության 25-ամյակին:

Նա նշեց, որ առանցքային են եղել երկու նախագիծ, որն իրականացվել են Լեհաստանի դեսպանատան հետ համատեղ («Վրոցլավը`եվրոպական մշակութային մայրաքաղաք»):
Նախագծի շրջանակում անցկացվել է 2 մոնոներկայացման ցուցադրություն Լեհաստանից և կայացել մեկ հայ-լեհական համատեղ մոնոներկայացման բեմադրություն-առաջնախաղը (Տադեուշ Ռուժևիչ՝ «Զվարճալի ծերունին»): Այս նախագծի շրջանակում անցկացվել է նաև դասախոսություն՝ նվիրված լեհ հեղինակի կյանքի և ստեղծագործական ժառանգությանը:

«Արմմոնո-2016» փառատոնի պատվավոր հյուրերի շարքում են եղել՝ Նինա Մազուրը (ՅՈՒՆԵՍԿՕ-ի մոնոներկայացումների միջազգային ֆորումի համանախագահ), մոնոփառատոնի տնօրեններ՝ Վեցլավ Գերասը (Լեհաստան), Յոլանտա Սուտովիչը (Գերմանիա), Մարիա Տանանան (Լիտվա), Վյաչեսլավ Տերեշենկոն (Ռուսաստան), Անդրեյ Նովիկովը (Բելառուս), Ալեքսանդրաս Ռուբինովասը (Լիտվա), ինչպես նաև անվանի թատերական փորձագետներ Մայքլ Կայթը (Իսրայել),  Նատալյա Ցվարցելիձեն (Վրաստան):

Փառատոնի շրջանակում Մոսկվայի Շչուկինի անվան թատերական ուսումնարանի ռեժիսուրայի ֆակուլտետի դեկան, դոցենտ Վ. Տերեշենկոն անցկացրել են վարպետության դաս` նվիրված արդի թատրոնի զարգացման նոր ուղղություններին:

Փատատոնն անկացվել է ՀՀ նախագահի տիկին Ռիտա Սարգսյանի հովանու ներքո, ՀՀ մշակույթի նախարարության և Հայաստանի թատերական գործիչների միության աջակցությամբ: