Ձեր վստահելի աղբյուրը

Տրետյակովյան պատկերասրահը շարունակում է նախապատրաստվել  հուլիսի 29-ին հանրահայտ նկարիչ Հովհաննես Այվազովսկու ծննդյան 200-ամյակին նվիրված ցուցահանդեսին: Հայաստանի Ազգային պատկերասրահից, Ռուսական թանգարանից բացի, Տրետյակովյան պատկերասրահն են տարվում նաև  Ղրիմից՝ Թեոդոսիայի պատկերասրահից Այվազովսկու կտավներ: Ռիա նովոստին գրում է, որ Թեոդոսիայի թանգարանից մոսկովյան Տրետյակովյան պատկերասրահ տարվել է  նկարչի 38 աշխատանք: Նկարները մոսկովյան մշակութային օջախում կմնան մինչև ցուցահանդեսի ավարտը:  

Տրետյակովյան պատկերասրահին տրված նկարները ապահովագրվել են:

Նախատեսված է, որ Տրետյակովյան պետական պատկերասրահում ներկայացվելու է Այվազովսկու 100 գեղանկար և 50 գրաֆիկական աշխատանք: Ցուցահանդեսը գործելու է մինչև նոյեմբերի 20-ը:

Ղրիմի մշակույթի նախարարը հայտարարել է, որ իրենք դիմել են Մոսկվայի, Սանկտ Պետերբուրգի թանգարաններ, նաև Այվազովսկու աշխատանքներն իրենց հավաքածուներում ունեցող կոլեկցիոներներին՝ առաջարկելով հաջորդ տարի բերել և ներկայացնել  ստեղծագործությունները Թեոդիայում կազմակերպելիք ցուցահանդեսում, երբ  լայնորեն նշվելու է նկարչի 200-ամյա հոբելյանը:

Հովհաննես Այվազովսկին ծնվել է 1817 թվականին  Ղրիմում՝ Թեոդոսիա քաղաքում, Ղրիմում, աղքատ հայ ընտանիքում։ Իր ընտանիքի ազգանունն Այվազյան էր։ Նկարչի նկարներից մի քանիսը կրում են այս ստորագրությունը՝ «Հովհաննես Այվազյան»: Այվազովսկու նախնիները Գալիցիայի հայերից էին, ովքեր XVII–րդ դարում Գալիցիա էին գաղթել Արևմտյան Հայաստանից։ Նրա՝ որպես նկարչի տաղանդը, իր համար ճանապարհ է բացել դեպի Սիմֆերոպոլ քաղաքի գիմնազիա, իսկ հետագայում՝ դեպի Սանկտ Պետերբուրգի գեղարվեստի ակադեմիա, որը Հովհաննես Այվազովսկին ավարտեց ոսկե մեդալով։
Ստեղծել է 6000-ից ավելի կտավ, հիմնականում ծովանկարներ, քանզի ծովը նրա տարերքն էր, հետաքրքրությունների և բնության հանդեպ մեծ սիրո կենդանի մարմնացում: Նա չի անտեսել նաև հայրենի բնաշխարհը, հայկական թեմատիկան: Աշխատել է շատ արագ, տեսողական վիթխարի հիշողությամբ։ Իր հաջողակ ստեղծագործական գործունեության ընթացքում վաստակած զգալի գումարներով Այվազովսկին բացել է արվեստի դպրոց և պատկերասրահ իր հարազատ Թեոդոսիա քաղաքում։
Հ.Այվազովսկին վախճանվել է 1900 թվականին։ Այվազովսկին թաղված է Թեոդոսիայում՝ հայոց միջնադարյան Սուրբ Սարգիս եկեղեցու բակում։ 1903 թ.նկարչի այրին մարմարե շիրմաքար է տեղադրել, որը իտալացի քանդակագործ Լ.Բիոջոլիի աշխատանքն է։ Շիրմաքարին գրաբար փորագրված են պատմահայր Մովսես Խորենացուխոսքերը. «Մահկանացու ծնեալ անմահ զիւրն յիշատակ եթող»։
Այվազովսկու գործերը աճուրդով վաճառվել են մինչև $2 միլիոն 125 հազար ամերիկյան դոլարով։

Հայ կերպարվեստում բնանկարի ժանրի հիմնադիրն է Հովհաննես Այվազովսկին: Ծովանկարիչ Հովհաննես Այվազովսկու արվեստը ժամանակի առաջադիմական գաղափարներն արտացոլող խոշոր մշակութային երևույթ է: Համաշխարհային հռչակ վայելող գեղանկարիչն ունեցել է հարյուր քսան անհատական ցուցահանդես, ներկայացրել իր արվեստը ոչ միայն Ռուսաստանում, այլ նաև եվրոպական երկրներում, Ամերիկայում: