Ձեր վստահելի աղբյուրը

Գերմանացի պատգամավորները ակնկալում են, որ Թուրքիան կթույլատրի Գերմանիայի օրենսդիրներին այցելել Թուրքիայի Ինջիրլիք ռազմաօդային բազայում տեղակայված 250 գերմանացի զինվորներին: Reuters գործակալության փոխանցմամբ,  հոկտեմբեր ամսին Գերմանիայի ԱԳՆ-ն այդ առիթով այցելություն է նախատեսում Թուրքիա:

Նախարարության խոսնակ Մատթիաս Շեֆերն ասել է, որ թուրք և գերմանացի պաշտոնյաները այս խնդրի շուրջ բակցություններ են վարել: Նա նաև նշել է, որ սպասում են թուրք պաշտոնյաների արձագանքին, որպեսզի իրենց օրենսդիրները հոկտեմբերին կարողանան մեկնել ռազմաբազա:

Հիշեցնենք, որ Թուրքիան արգելել էր գերմանացի օրենսդիրներին այցելել ռազմաբազա՝ ի պատասխան Բունդեսթագում Հայոց ցեղասպանությունը ճանաչող բանաձևի ընդունման: 

 «Ազատություն» ռադիկոյանն էլ անդրադառնալով թեմային, գրում է, որ Գերմանիայի կառավարությունը հայտարարում է, որ իրեն հեռու չի պահում Բունդեսթագում ընդունված Հայոց ցեղասպանությունը ճանաչող բանաձևից, միաժամանակ նշելով, որ բանաձևը իրավական պարտադիր ուժ չունի: 

Գերմանիայի կանցլեր Անգելա Մերկելը իր կուսակցության խորհրդարանական առաջնորդների հետ հանդիպմանը, ըստ աղբյուրի,  հայտարարել էր, որ իրեն հեռավորության վրա չի պահում Բունդեսթագում ընդունված Հայոց ցեղասպանությունը ճանաչող բանաձևից, որի պատճառով լարվածություն առաջացավ Թուրքիայի հետ հարաբերություններում: Մերկելի այս հայտարարության մասին հայտնել են հանդիպման մասնակիցները:

Խորհրդարանում քրիստոնեա-դեմոկրատական խմբակցության ղեկավար Վոլքեր Կաուդերը կուսակիցների հետ հանդիպմանը հայտնել է, որ ինքն այդ թեմայով զրուցել է Մերկելի հետ և Գերմանիայի կանցլերը շեշտել է իր դիրքորոշումը:

«Ռոյթերզ»-ի փոխանցմամբ, Կաուդերը նաև հայտնել է, որ մինչև Բունդեսթագի քվեարկությունը ներկուսակցական հավաքում Անգելա Մերկելը կողմ է քվեարկել բանաձևին, չնայած Բունդեսթագի հունիսի սկզբին տեղի ունեցած քվեարկությանը նա չի մասնակցել: Քվեարկությանը չէին մասնակցել նաև արտաքին գործերի նախարար Ֆրանկ-Վալտեր Շտայնմայերը և էկոնոմիկայի նախարար Սիգմար Գաբրիելը: Շտայնմայերը սոցիալ-դեմոկրատական կուսակցության անդամ է, Գերմանիայում իշխող դաշինքի գործընկերը:

Ուրբաթ օրը Գերմանիայի արտգործնախարար Ֆրանկ-Վալտեր Շտայմնայերը ասել է, որ Բունդեսթագի բանաձևը իրավական պարտադիր ուժ չունի: «Ռոյթերզ»-ի փոխանցմամբ, նրա հայտարարությունը կարող է ազդանշան լինել Թուրքիայի հետ հարաբերությունները ուղղելու համար:

Շտայնմայերը ուղիղ չի մեկնաբանել «Շպիգել օնլայնի» լուրը, որն ասում է, թե Գերմանիայի կառավարությունը պատրաստվում է իրեն հեռու պահել բանաձևից: Նման քայլի հնարավորության մասին արտգործնախարարը լրագրողներին ասել է․ - «Գերմանիայի խորհրդարանը ցանկացած բանաձև ընդունելու իրավունք և ազատություն ունի, բայց Բունդեսթագն ինքն ասել է, որ յուրաքանչյուր բանաձև չէ, որ իրավական պարտադիր ուժ ունի»:

Գերմանիայի արտգործնախարարության խոսնակ Մարտին Շեֆերը ամենօրյա բրիֆինգում հայտարարել․ - «Որևէ խոսակցություն չի կարող լինել այն մասին, որ Գերմանիայի կառավարությունը իրեն հեռու է պահում Բունդեսթագում Հայոց ցեղասպանությունը ճանաչելու մասին բանաձևից»:

«Գերմանիայի արտաքին գործերի նախարարը պաշտպանում է Բունդեսթագում ընդունված բանաձևը», - հայտարարել է խոսնակը:

Նա ասել է, որ դեռ սպասում են Թուրքիայի կառավարության արձագանքին Ինջիրլիքի ռազմակայան այցելելու՝ Գերմանիայի պատգամավորների խնդրանքին և հույս հայտնել, որ պատգամավորները շուտով հնարավորություն կունենան այցելելու Ինջիրլիքում գտնվող գերմանացի զինծառայողներին: