Ձեր վստահելի աղբյուրը

Հանրությունը տեղյակ չէ, թե ինչ խնդիրների առաջ կարող է կանգնել, եթե իր անձնական տվյալները չպաշտպանվեն: Այդ մասին այսօր լրագրողների հետ հանդիպման ժամանակ հայտարարեց տեղեկատվական անվտանգության փորձագետ Սամվել Մարտիրոսյանը:

Մինչդեռ, ըստ փորձագետի, այդ խնդիրները գնալով շատանում են:

«Եթե նայենք կիբերհանցագործությունների գծով վերջին մեկ տարվա վիճակը, ապա կտեսնենք, որ Հայաստանում մենք որակական աճ ենք ապրում. եթե մի քանի տարի առաջ հարձակումները խառը բնույթի էին ու մարդիկ հիմնականում ֆլեշկայով վիրուս էին ստանում ու դա խաթարում էր համակարգչի աշխատանքը, ապա այսօր վիճակը փոխվել է: Այսօր բավականին լուրջ տնտեսական վնաս է կրում Հայաստանի բնակչությունը, որովհետև առաջինը շատ մեծ տարածում են ստացել կրիպտովիրուսները. գաղտնագրում են համակարգչի միջի տեղեկությունները ու դա վերականգնելու համար գումար են ուզում», -ներկայացրեց Մարտիրոսյանը:

Այս ոլորտում, փորձագետի խոսքով, անձնական տվյալները շատ արագ են թիրախ դառնում հակերային հարձակումների համար: Նրա կատարած ուսումնասիրությունները ցույց են տվել, որ Հայաստանում հակերային հարձակումների թիրախը կոնկրետ մարդիկ են.«Հակերները օգտագործում են անձնական տվյալների արտահոսքը»:

Վերջին ամիսներին կիբերհանցագործությունների ոլորտում հակերային հարձակումներն արվում են կոնկրետ Հայաստանի վրա, ինչը փորձագետը մտահոգիչ է համարում:

«Տեքստերը հայերեն են, ոստիկանության անունից տարածվում է պատուհանիկ, որը հայտնվում է շատերի համակարգիչների վրա և պահանջում գումար, որպեսզի քրեական գործ չհարուցվի պոռնոգրաֆիկ նյութեր դիտելու համար: Ցավոք, շատ մարդիկ հավատում են, որովհետև շատ նորմալ հայերենով է գրված: Ակնհայտ է, որ գրողը հայերեն լավ իմացող է և նշանակում է, որ հենց Հայաստանն է թիրախ ընտրված», ներկայացրեց Մարտիրոսյանը:

Փորձագետը պնդում է՝ ինչքան անձնական տվյալների արտահոսք կատարվեց, ապա այդ կոնկրետ մարդը կհայտնվի հակերների թիրախում, ինչը կարող է լուրջ վնասներ բերել:

Ըստ բանախոսի, անձնական տվյալների պաշտպանության կարիք ունեն նաև երեխաները, քանի որ վերջին շրջանում սոցիալական ցանցերում շատ են նրանց լուսանկարներով «պրոֆիլներ» ստեղծում:

«Երեխաների տվյալները սոցցանցերում պետք է պաշտպանված լինեն ու դրան պետք է հետևեն և դպրոցում, և ընտանիքում: Երեխաները պետք է անծանոթների հետ չընկերանան, որովհետև այդ դեպքում նրանց տվյալները դառնում են անհասանելի: Իրենց պրոֆիլը պետք է փակ լինի և այլն: Սրանք բաներ են, որոնք հանրության մեջ չեն քննարկվում, և իրավիճակը բարձիթողի է», -նկատեց Մարտիրոսյանը: