Ձեր վստահելի աղբյուրը

Հայաստանի Ազգային պատկերասրահում բացվեց գեղանկարչուհի Արփենիկ Նալբանդյանի ծննդյան 100-ամյակին նվիրված հոբելյանական ցուցահանդեսը:

Ցուցահանդեսի համակարգող Հասմիկ Բադալյանի ներկայացմամբ՝ ստեղծագործական կարճատև ժամանակահատվածում նկարչուհին ստեղծել է 300 գեղանկար: Ցուցահանդեսում այսօր ներկայացված է 73-ը՝ Ազգային պատկերասրահի, ընտանիքի  և մասնավոր հավաքածուներից: Կան աշխատանքներ, որոնք առաջին անգամ են ներկայացվում հանրությանը:

«Կենդանության օրոք Արփենիկ Նալբանդյանը երկու ցուցադրություն է ունեցել, 1967 և 2001-ին ունեցել է հետմահու անհատական ցուցահանդեսներ: Ընդմիջումները մեծ են: Համաձայնեք, որ նկարչուհին, ով վաղուց համալրել է հայ դասականների շարքը, պետք է հաճախակի ցուցադրվի:

73 աշխատանքով ներկայացրել ենք Արփենիկ Նալբանդյանի ողջ ստեղծագործական ուղին: Սա յուրահատուկ ինքնակենսագրություն է: Ներկայացնում ենք թբիլիսյան՝ ուսանողական ժամանակաշրջանի աշխատանքները՝ ներծծված Ալեքսանդր Բաժբեուկ-Մելիքյանի շնչով, երևանյան առաջին շրջան, որն առանձնանում է թեմատիկ բազմազանությամբ և լուսաօդային հագեցած միջավայրով, 1950-60-ականների դիմանկարների ու բնանկարների շարք:
Դիմանկարներն առանձնանում են հոգեբանական և վերլուծական նրբերանգներով:

Դիտելով այդ նկարները՝ հաղորդակից կլինեք Արփենիկ Նալբանդյանի ընդհանուր մտքերին, խոհերին, կհասկանաք նրա արարման, ստեղծարար աշխարհը»,- ասաց արվեստաբանը:

Նկարիչ Մասիս Գրիգորյանը, ով եղել է Արփենիկ Նալբանդյանի ուսանողը, ներկայացնելով իր դասախոսին ասաց, որ նա ոչ միայն  հոյակապ գեղանկարիչ էր, այլ նաև հոյակապ մանկավարժ:

«Նա շատ  մտերիմ էր մեզ հետ, հետաքրքրվում էր մեր կյանքով, ինչպես ենք անցկացնում ժամանակը: Հնարավորություն դեպքում մեզ շատ էր օգնում:  Թող ներեն այսօրվա հայ նկարչուհիները, ովքեր շատ տաղանդավոր են, շնորհալի, բայց, իմ կարծիքով,  Արփենիկ Նալբանդյանի տեղը մինչև օրս մնացել է դատարկ: Տխուր փաստ է»,- ասաց Մ.  Գրիգորյանը:

Արփենիկ Նալբանդյանի որդին՝  ՀՀ արվեստի վաստակավոր գործիչ , նկարիչ, Գեղարվեստի  ռեկտոր Արամ Իսաբեկյանը  նախ շնորհակալություն հայտնեց բոլոր ներկաներին, ապա նշեց. «Արփենիկ Նալբանդյանն իսկապես  արժանի է, որ հիշենք  իրենք: Նա իր արվեստով, շռայլ ու լայն վրձնահարվածներով կարող է հրապուրել մարդկանց»:

Ցուցահանդեսի բացմանը ներկա էր  մշակույթի նախարար Արեմն Ամիրյանը, կրթության և գիտության նախարար Լևոն Մկրտչյանը, արվեստագետներ, արվեստաբաններ:
Հոբելյանական ցուցահանդեսի առթիվ հրատարակվել է պատկերագիրք: Ցուցահանդեսը կտևի մինչև դեկտեմբերի 28-ը:

Արփենիկ Նալբանդյանը ծնվել է 1916 թ. Վրաստանում, մասնագիտական կրթություն ստացել Թիֆլիսի Գեղարվեստի ակադեմիայում: 1941թ. ամուսնանալով Էդուարդ Իսաբեկյանի հետ` Նալբանդյանը տեղափոխվել է Երևան և ներգրավվել երկրի մշակութային կյանքում: 1946 թվականից (հիմնադրման սկզբից) մինչև կյանքի վերջը դասավանդել է Երևանի գեղարվեստա-թատերական ինստիտուտում: 1948 թվականին և 1952 թվականին ընտրվել է Քաղխորհրդի պատգամավոր։ 1957 թվականին հաստատվել է որպես դոցենտ, Մոսկվա: 1941 թվականից մասնակցել է հանրապետական և միութենական ցուցահանդեսների։ Արփենիկ Նալբանդյանը մահացել է 1964 թվականի մայիսի 17-ին Երևանում: