Ադրբեջանը շփման գծում կիրառել է «Սև նետ» և «ԻՍՏԻԳԼԱԼ» տիպի դիպուկահար հրացաններ
Նոյեմբերի 11-ի ժամը 12:15-ի սահմաններում ղարաբաղա-ադրբեջանական հակամարտ զորքերի շփման գծի հյուսիսարևելյան (Յարըմջա) և հյուսիսային (Թալիշ) ուղղություններով հակառակորդի կողմից ձեռնարկված ականանետային հարվածները որոշակի ընդմիջումներով շարունակվել են մինչև 15:30-ը: Ինչպես տեղեկացնում են ԼՂՀ ՊԲ մամուլի ծառայությունից, այդ ընթացքում ադրբեջանական զինուժի կողմից հայ դիրքապահների ուղղությամբ արձակվել է 37 արկ, որից 13-ը 60 միլիմետրանոց, իսկ 24-ը՝ 82 միլիմետրանոց ականանետերից:
Բացի ականանետային հարվածներից, շփման գծի արևելյան (Ակնա) ուղղությամբ հակառակորդը կիրառել է նաև տարբեր տրամաչափի հրաձգային զինատեսակներ, այդ թվում՝ «Սև նետ» (8 կրակոց) և «ԻՍՏԻԳԼԱԼ» (25 կրակոց) տիպի խոշոր տրամաչափի դիպուկահար հրացաններ:
«ՊԲ առաջապահ ստորաբաժանումները ուշադիր հետևել և հետևում են հակառակորդի կողմից ձեռնարկվող գործողություններին և անհրաժեշտության դեպքում ձեռնարկում համապատասխան միջոցներ պետական սահմանի անառիկ պաշտպանությունն ապահովելու ուղղությամբ:
Այս պահի դրությամբ իրավիճակն առաջնագծում համեմատաբար հանգիստ է»,- նշվում է ՊԲ-ի տարածած հաղորդագրությունում:
Հարակից հրապարակումներ`
- Դավիթ Բաբայանը՝ առաջնագծի մասին. Արտառոց իրավիճակ չէ
- Հակառակորդը արկակոծում է Թալիշի և Յարըմջայի ուղղությամբ տեղակայված մարտական դիրքերը. ՊԲ
- Հակառակորդի նահախահարձակ ակտիվությունը ճնշելու համար ՊԲ-ն դիմել է պատասխան գործողությունների