«Խրամատում որդուս հայացքն ու ժպիտն էի որոնում». Կապիտան Ուրֆանյանի հուշ-երեկո
«Ես անպայման պետք է այցելեի Արցախ, տեսնեի այն վայրերը, որտեղ ապրել, ծառայել ու կռվել է որդիս»,-ապրիլյան քառօրյա մարտական գործողությունների հերոս, «Մարտական խաչ» 1-ին աստիճանի շքանշանակիր, կապիտան Արմենակ Ուրֆանյանի հիշատակին նվիրված հուշ-երեկոյի ժամանակ Panorama.am-ի հետ զրույցում ասաց հերոսի մայրը՝ տիկին Համեստը:
Նա պատմեց, որ կրտսեր որդուն մի կերպ է համոզել իրեն տանել Մարտակերտ, որտեղ հինգ տարի ապրել է Արմենակը. «Եղա այն հյուրանոցում, որտեղ ապրել է Արմենս, այն խանութում, որտեղից ամեն օր գնումներ է արել: Զորամաս այցելեցի, զրուցեցի նրա զինվորների, նրա տղաների հետ: Երբ Արմենին հարցնում էի՝ ինչպես են զինվորներդ, ասում էր՝ տղերքս լավ են...: Ես էլ տեսա ու զրուցեցի նրա զինվոր տղաներից մի քանիսի հետ»:
Կապիտանի մայրը եղել է նաև այն դիրքերում ու խրամատում, որտեղ հերոսաբար զոհվել է որդին. «Հույս ունեի, որ խրամատում որդուս կգտնեի, այնտեղ նրա հայացքն ու ժպիտն էի որոնում՝ նա հինգ տարի մեծացել էր այդ խրամատի մեջ»:
Արմենակի մոր՝ Արցախ այցելության ընթացքում նկարահանվել է «Բանակի մայրը» վավերագրական ֆիլմը, որի պրեմիերան տեղի ունեցավ հուշ-երեկոյի սկզբում: Ֆիլմի հեղինակն է Սոնա Տոնականյանը:
Մեզ հետ զրույցում Արմենակ Ուրֆանյանի մարտական ընկեր Արթուր Խաչատրյանը պատմեց, որ նրան վերջին անգամ տեսել է ապրիլի մեկին՝ մինչ մարտական հերթապահության մեկնելը:
«Լավ ընկեր էր, լավ հրամանատար, նրանից քաջություն կարելի էր սովորել: Արմենակն անգամ հրամանից հետո էլ հետ չի քաշվել, մինչև վերջ պահել է իր դիրքը: Մարտակերտի ուղղությունը հիմնականում նա է պահել իր երեք զինվորների՝ Ռոբերտ Աբաջյանի, Անդրանիկ Զոհրաբյանի ու Քյարամ Սլոյանի հետ միասին»,-կիսվեց ընկերը:
Նշենք, որ հուշ-երեկոն կազմակերպել էին «Ջավախք» հայրենակցական միությունը՝ ՀՀ Պաշտպանության նախարարության հետ համատեղ:
«Մեր նահատակված հերոսներին նվիրված նման միջոցառումները շարունակական կլինեն: Մատաղ սերունդն այսպիսի միջոցառումների շնորհիվ պետք է իմանա՝ ով է իսկական հարոսն ու իսկական լավ տղան»,-ասաց մեր զրուցակից «Ջավախք» հայրենակցական միության փոխնախագահ Արտուշ Գրիգորյանը:
Միջոցառման ընթացքում երգիչ Մասիս Հունանյանի կատարմամբ հնչեց Արմենակ Ուրֆանյանի համար գրված երգը:
Հարակից հրապարակումներ`
- Առաջարկ. Երևանյան երկու փողոց կոչել Ռոբերտ Աբաջյանի և Արմենակ Ուրֆանյանի անուններով
- Իրականություն, որը նման է լեգենդի. Արմենակ Ուրֆանյան
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ