Մեր երկրում Թրամփից հարուստ առնվազն հինգ միլիարդատեր կա. Արամ Մանուկյան
«Ձեր ներկայացրած ծրագիրը բացարձակ ադեկվատ չէ այսօրվա իրավիճակին: Բյուջեն քաղաքական փաստաթուղթ է, որը պետք է քաղաքական լուծումներ առաջարկի, մինչդեռ դուք տնտեսության հիվանդ կողմերին չեք անդրադառնում, չեք բարձրաձայնում ոչ կոռուպցիայի, ոչ մենաշնորհի, ոչ ազատ մրցակցության մասին»,- այս մասին այսօր ԱԺ-ում ընթացող 2017թ. պետական բյուջեի լրամշակված նախագծի քննարկման ժամանակ ասաց ՀԱԿ խմբակցության քարտուղար Արամ Մանուկյանը՝ դիմելով ֆինանսների նախարար Վարդան Արամյանին:
«Ո՞րն է ձեր կառավարության կոնցեպտը: Չէ՞ որ իրավիճակը ճգնաժամային է, ո՞րն է ձեր տարբերությունը նախորդ կառավարությունից»,- հարցրեց պատգամավորը:
Ֆինանսների նախարար Վարդան Արամյանն ասաց, որ բյուջեն քաղաքական փաստաթուղթ լինելուց բացի, նաև մակրոտնտեսական գործիք է տնտեսական կայունություն ապահովելու համար, որի նպատակը տնտեսական աճի հիմքերն ուժեղացնելն է:
Վարդան Արամյանը նշեց, կոռուպցիայի դեմ պայքարը արծարծված է կառավարության ծրագրի որոշ գործողություններում:
Արամ Մանուկյանն արձագանքեց. «Այն, ինչ ասում եք, դրանք անհրաժեշտ են, բայց դուք մեր հիվանդ տնտեսությանը նայում եք որպես երկար՝ 50 տարվա բուժում անցնող համակարգ, նրան տալիս եք մրսածության դեղեր, իսկ համակարգը փտախտի մեջ է, և ձեր արած քայլերը, լինելով անգամ ճիշտ, ադեկվատ չեն մեր քայքայվող տնտեսությանը: Մի երկիր, որտեղ պաշտոնապես 40 տոկոս ստվեր կա՝ դրա մասին բացարձակ չեք ասում: Մեր երկրում առնվազն հինգ հոգի Թրամփից հարուստ միլիարդատերեր կան, էդ ո՞նց են առաջացել, չ՞է որ դա համակարգային հիվանդության արդյունք է, մրսածության արդյունք չի: Դուք այդ ռակը թողած՝ մրսածության կաթիլներ եք տալիս: Դրանով այս երկիրը ուշքի չի գա»:
Վարդան Արամյանն էլ ասաց, որ կառավարության ծրագրով նախատեսում են եկամուտների արդյունավետ վերաբաշխում՝ հարուստների հարցը լուծելու համար:
ԲՀԿ պատգամավոր Միքայել Մելքումյանն էլ հայտարարեց, որ իր ներկայացրած 101 առաջարկից միայն 6-7-ն է ընդունվել բյուջեի նախագծում: Պատգամավորը, դիմելով ֆինանսների նախարարին, նշեց. «Արամ Մանուկյանի հետ համաձայն եմ, այո՛, դուք մրսած եք, ու տնտեսության մեջ ոչ թե մրսածության դեղեր պետք է տալ, այլ պետք են դեղեր, որ կկայունացնեն տնտեսությունը: Այնպես չլինի, որ բուժումը շատ անկումային վիճակում սկսեք»:
