Ձեր վստահելի աղբյուրը

2016 թվականին ապրիլյան պատերազմի հետևանքով վիրավորված զինծառայողներից  3-ը շարունակում են վերականգնողական բուժում ստանալ: Այս մասին այսօր լրագրողների հետ հանդիպման ժամանակ ասաց ՀՀ զինված ուժերի ռազմաբժշկական վարչության պետ, գնդապետ Կամավոր Խաչատրյանը:

Նրա խոսքերով՝ ապրիլյան պատերազմի ժամանակ Երևանի զինվորական հոսպիտալ էր տեղափոխվել ծայրահեղ ծանր վիճակում գտնվող 9 զինծառայող: Նրանք հիմնականում վիրավորում էին ստացել գլխի, ողնաշարի շրջանում: «Ներկայումս վերականգնողական բուժում շարունակում են ստանալ նրանցից 3-ը: Երկուսը Զինվորական կենտրոնական հոսպիտալում են, մեկը` «Արթմեդ» բժշկական կենտրոնում: Բացի այդ, ևս 6 հոգի կարիք ունեն շարունակական վերականգնողական բուժման»,- ասաց Կամավոր Խաչատրյանը:

Ռազմաբժշկական վարչության պետը հայտնեց, որ  ապրիլի 4-ին Թալիշի մարտական գործողությունների ժամանակ վիրավորված զինծառայող Ավետիս Զարգարյանին, ամենայն հավանականությամբ, վաղը կտեղափոխեն Մոսկվա՝ վերականգնողական բուժումը շարունակելու համար:

Կամավոր Խաչատրյանը նշեց, որ Կառավարության կողմից կա որոշում, համաձայն որի, մարտական հերթապահություն իրականացնելիս վնասվածք ստացած  ցանկացած զինծառայող, որի բուժումը հնարավոր չէ իրականացնել Հայաստանում, կարող է պետական հովանու ներքո բուժումը շարունակել արտերկրի ցանկացած կլինիկայում:

Անդրադառնալով ապրիլյան պատերազմի ժամանակ վիրավորված երկու զինծառայողներին՝ Արման Լազգյանին և Ռուբեն Առաքելյանին, որոնք բուժումը շարունակում են Գերմանիայում, Կամավոր Խաչատրյանն ասաց, որ նրանց մոտ զգալի փոփոխություններ դեռ չկան:

Նրա խոսքերով,  և Արմանը, և Ռուբենը, ստացել էին կյանքի հետ անհամատեղելի վնասվածքներ, սակայն հայ բժիշկների շնորհիվ  նրանց կյանքը փրկվել է: «Եթե ասենք, որ Գերմանիա տեղափոխվելով լուրջ հաջողություններ են գրանցվել, այդպես չէ: Ի դեպ, քննադատություններ հնչեցին Հայաստանի բժիշկների հասցեին: Ես հստակ կարող եմ մի բան ասել. այնպես չէ, որ մենք մեր գործը չգիտենք կամ նորմալ չենք կատարում: Նրանցից շատերը կյանքի հետ անհամատեղելի վիրավորումներ են ունեցել, նրանց կյանքը փրկվել է հենց Հայաստանի բժշկական հիմնարկներում: Երկու զինվորների բուժման ընթացքին հետևում ենք և նրանց վիճակի մեջ էական տեղաշարժեր չկան»,- ասաց Կամավոր Խաչատրյանը:

Բուժվարչության պետը նշեց, որ 2016 թվականը լարված տարի էր ինչպես Զինված ուժերի, այնպես էլ ռազմաբժշկության համար:

Տարին սկսվել էր համաճարակային իրավիճակի սրացմամբ, սակայն, ըստ նրա, իրենց հաջողվել է հաղթել այդ համաճարակը. 2016 թվականի ընթացքում ԶՈՒ-ում  համաճարակային հիվանդություններից մահվան դեպքեր չեն գրանցվել:

Կամավոր Խաչատրյանի խոսքերով՝ համաճարակային իրավիճակից դուրս գալուց հետո անմիջապես սկսվել են  ապրիլյան մարտական գործողությունները, որոնց ընթացքում հայկական կողմն ունեցել է 125 վիրավոր, իսկ ապրիլյան պատերազմին հաջորդող օրերին վիրավորվել է ևս 34 զինծառայող: Ընդհանուր առմամբ՝ վիրավորների թիվը կազմում է 159-ը:

Կամավոր Խաչատրյանը նշեց, որ վիրավորներից միայն երեքն են մահացել հոսպիտալում:

Ըստ նրա՝  ապրիլյան գործողությունների ժամանակ ռազմաբժշկական զորամասերում կազմակերպված աշխատանքը եղել է լիարժեք, որի արդյունքում գերազանցել են բոլոր ցուցանիշները, որոնք որ առ այսօր հայտնի են ռազմաբժշկական ծառայությանը:

«Ապրիլյան ռազմական գործողությունների ընթացքում բժշկական ռեզերվային միջոցներն ամբողջությամբ չենք օգտագործել, ընդամենը 10 տոկոսն է օգտագործվել: Մենք այդ օրերին գերազանցել ենք բոլոր ցուցանիշները թե հիվանդներին տեղափոխելու, թե հոսպիտալներում կազմակերպվող բուժական միջոցառումների առումով: Բժիշկները պահպանել են գոյություն ունեցող «ոսկյա մեկ ժամվա» սկզբունքը, այսինքն՝ ցանկացած վիրավորի մեկ ժամվա ընթացքում տրամադրվել է կազմակերպված բուժօգնություն, ինչի արդյունքում  հոսպիտալային օղակում գրանցվել է մահացության 3 դեպք, որից մեկի ժամանակ զինծառայողը հոսպիտալ է տեղափոխվել արդեն մահացած»,- ասաց նա: