Դավիթ Բաբայան. Ադրբեջանը հրաժարվում է իր զինվորից, որովհետև նա գերեվարվել է
«Տարօրինակ է, երբ նրանք հրաժարվում են իրենց զինծառայողից, ապա ի՞նչ է ստացվում, արդյոք նա եկել էր Արցախ՝ դիտելու «Վերջին բնակիչը» ֆիլմի շնորհանդե՞սը»,- անդրադառնալով Ադրբեջանի կողմից Թալիշի ուղղությամբ ձեռնարկած դիվերսիոն ներթափանցման փորձին և այդ կապակցությամբ Ադրբեջաանի ՊՆ-ի տարածած հայտարարությանը, «Panorama.am»-ի թղթակցի հետ զրույցում նշեց Արցախի հանրապետության նախագահի մամլո խոսնակ Դավիթ Բաբայանը:
«Դիվերսիոն ներթափանցումները ու ընդհանրապես խախտումները, որոնք հաջորդում կամ նախորդում են խնդրի կարգավորման դիվանագիտական որևէ գործողության, վաղուց արդեն դարձել են Ադրբեջանի բնավորության գիծը: Եվ այդ բոլոր խախտումները, ագրեսիվությունը առաջին հերթին ապացույցն է այն բանի, որ Ադրբեջանը ֆաշիստական երկիր է»,- նշեց խոսնակը և հավելեց, որ զինծառայողի օրինակը դրա վառ ապացույցն է:
Նշենք, որ Ադրբեջանի պաշտպանական գերատեսչությունը տարածել է հայտարարություն, ըստ որի, իբր հայկական ուժերի կողմից գերեվարված ադրբեջանցի Էլնուր Հյուսեին Զադեն, որպես կարգազանց զինծառայող, զորացրված է եղել զինված ուժերի շարքերից և ներկայումս տվյալ անձը հաշվառված չէ Ադրբեջանի զինված ուժերում:
«Այսինքն եթե Էլնուր Հյուսեին Զադեն գերի է ընկել, արդեն Ադրբեջանը անմիջապես հրաժարվել է նրանից, պիտակավորել է նրան՝ անվանելով զորացրված անհավասարակշիռ մարդ, որը խախտում է կարգը, փաստորեն ստացվում է, որ Ադրբեջանը հրաժարվել է իր հայրենիքի պաշտպանից: Եթե նա մահանար նրան կդասեին շեհիդների շարքին, Ալիևը, կինը, որդին, դուստրերը փեսաների հետ միասին կլացեին՝ ցույց տալով հանրությանը, որ մտահոգ են և ապրում են ժողովրդի հոգսերով, իսկ եթե զինվորը գերի է ընկել և ողջ է, ապա դա բավարար հիմք է նրան պիտակավորելու համար»,- նշեց Բաբայանը և հավելեց, որ սա ևս մեկ անգամ ցույց է տալիս այն անմարդկային անբարոյական կերպարը, որն ունի ալիևյան վարչակարգը:
Վերլուծելով հայտարարությունը՝ Բաբայանը նշեց, թե ստացվում է այնպես, որ ադրբեջանական կողմին ավելի շահեկան է ունենալ զոհված հերոսներ, «շիզոֆրենիկ» հերոսներ, ինչպես Սաֆարովն է:
«Եթե զինծառայողը գերիեվարվել է, դա չի նշանակում, որ նա դավաճան է, բայց նրանք հրաժարվում են»,- նշեց խոսնակը և հավելեց, որ սա հստակ ցույց է տալիս, որ Ադրբեջանի համար իր զինվորի կյանքը գրոշի արժեք չունի:
Բաբայանի խոսքով, Ադրբեջանի այս հայտարարությունը նաև իր անթույլատրելի գործողությունները սրբագրելու փորձ է, քանզի Վիենայի և Սանկտ-Պետերբուրգի գագաթնաժողովների ժամանակ ձեռք բերված պայմանավորվածությունների արդյունքում ստանձնած պարտավորությունները սահմանային խախտումների հետաքննության մեխանիզմների ներդրման առնչությամբ ադրբեջանական կողմը հետևողականորեն տապալում է, իսկ այս տապալված դիվերսիոն փորձը ու դրա արդյունքը առիթ է տալիս ՄԽ համանախագահներին և միջազգային հանրությանը արդեն ոչ թե հորդորել կամ կոչ անել այդ մեխանիզմների ներդրման ուղղությամբ քայլ կատարելու վերաբերյալ, այլ ուղղակիորեն պահանջել:
«Ադրբեջանը չի ցանկանում կատարել այդ պարտավորությունները, քանզի խախտողներն իրենք են: Որևէ ձևով դժվար է փոփոխություններ մտցնել և շտկել իրավիճակը: Սակայն միջազգային հանրությունը պետք է կտրուկ միջոցներ ձեռնարկի»,- նշեց նա: