Ձեր վստահելի աղբյուրը

«Իլհամ Ալիևն իր կնոջը նշանակել է փոխնախագահ, որդուն փոխնախարար, ինչը հասարակության շրջանում բուռն քննարկումների առիթ է հանդիսացել: Այդ պատճառով շփման գծում սկսեց պրովակացիաներ՝ հասարակության հայացքն այլ ուղղությամբ շեղելու համար»,- «Այլատյացությունը և դրա հետևանքները մարդու իրավունքների տեսանկյունից» կլոր սեղան-քննարկման ժամանակ ասաց Հայաստանի Հանրապետությունում ապաստան ստացած Թալիշի ազգային շարժման ակտիվիստ, «Թալիշի Սադո» ընդդիմադիր թերթի թղթակից, «Թալիշի մշակույթի հանրապետական կենտրոնի» կառավարման խորհրդի անդամ Շահին Միրզոևը՝ պատասխանելով լրագրողի հարցին, թե՝ ինչո՞ւ է ադրբեջանական կողմը շփման գծում  վերջին օրերին գնացել իրավիճակի սրման:

Միրզոևը նաև նշեց, որ երբ երկրում սոցիալական խնդիրները  հասնում են գագաթնակետին, ժողովրդին ինչ-որ կերպ պատերազմով վախեցնելու համար, նման անհասկանալի ռազմական գործողությունների են գնում:  Այնուամենայնիվ՝ թալիշ ընդդիմադիր լրագրողը չի կարծում, որ  ավելի մեծամասշտաբ գործողությունների կգնա Ադրբեջանը: Շ. Միզոևի խոսքով, ինչքան էլ  ռազմական տեխնիկայով  հարուստ լինի երկիրը, ցանկացած ղեկավարի հիմնական զենքը ազգն է, իսկ Իլհամ Ալիևն ազգի կողմից աջակցություն չունի:

Նա նշեց, որ Հայաստանում իրեն լավ է զգում, խնդիրներ չկան, իսկ Ադրբեջանից ամեն օր սպառնալիքներ է ստանում. «Քնից արթնանում եմ ու մինչև քնելը սպառնալիքներ եմ ստանում: Նույնիսկ խորհրդարանից են սպառնալիքներ հնչում: Պատգամավորներ են եղել, ովքեր առաջարկել են  մահապատիժն ընդունել և ինձ մահապատժի ենթարկել: Եվ նրանք այդ կերպ ցանկանում են ղարաբաղյան խնդիրը լուծել խաղաղ ճանապարհով»:

Շ. Միզոևն ասաց, որ այսօր Ադրբեջանում գտնվող իր հարազատները վատ վիճակում են, ենթարկվում են վիրավորանքների: Նա նշեց, որ վերջերս մի երիտասարդ թալիշի, ով սպառնացել է, որ կգա Հայաստան,  բռնել են, նստեցրել սեղանի մոտ, դիմացը դրել Թուրքիայի դրոշը, սոցիալական ցանցերում ծիծաղի առարկա դարձրել:

Շ. Միրզոևն այն կարծիքին է, որ  Հայաստանի և Ադրբեջանի  հասարակությունները կարող են մերձենալ, պատրաստ են դրան,  բայց դա հնարավոր է այն դեպքում, երբ Իլհամ Ալիևի ռեժիմին վերջ գա: