Ձեր վստահելի աղբյուրը

«Ադրբեջանը քանի գնում ավելի սանձարձակ է դառնում և որոշ դեպքերում ԵԱՀԿ  Մինսկի խումբն է այդ առիթները տրամադրում», - այս մասին այսօր լրագրողների հետ հանդիպման ժամանակ ասաց քաղաքագետ Ալեքսանդր Մանասյանը՝ անդրադառնալով ղարաբաղա-ադրբեջանական շփման գծում առկա լարվածությանը:

«Եթե հիշում եք, Ջեյմս Ուորլիքը անընդհատ ասում էր, որ ստատուս քվոն անտանելի է, պետք է փոխվի: Հիմա Ադրբեջանը դա հիմք է ընդունում»,- նշեց  քաղաքագետը: 

Ալեքսանդր Մանասյանը նշեց, որ և քառօրյա պատերազմի ժամանակ, և վերջին օրերին սահմանի իրադարձությունները ցույց են տալիս, որ Ադրբեջանը կրում է պարտություն պարտության հետևից, բայց դա չի նշանակում, որ չի ուժեղացնի իր սպառազինությունը:

Ալեքսանդր Մանասյանի խոսքերով՝ Հայստանը պետք է ակտիվ աշխատանքներ տանի  դիվանագիտական, քարոզչական դաշտում: Ըստ նրա՝ անհրաժեշտ է փոխել դիսկուրսի լեզուն:
Քաղաքագետի խոսքերով՝ Մինսկի խմբի կողմից հակամարտության կարգավորման հիմքում դրված սկզբունքները ինքնին ենթադրում են, որ Լեռնային Ղարաբաղի հակամարտության կարգավորումը  Ադրբեջանի ներքին գործը չէ:  «Մենք վաղուց պետք է դա ասեինք, բայց, փառք Աստծո, դա բաց տեքստով հնչեց համանախագահող երկրներից մեկի արտգործանախարարի կողմից»,- ասաց քաղաքագետը:

Հիշեցնենք, որ ՌԴ արտաքին գործերի նախարար Սերգեյ Լավրովի 2016թ. ամփոփիչ մամուլի ասուլիսի ժամանակ ադրբեջանցի լրագրողը հետաքրքրվել էր, թե ինչպիսի՞ն կլինի Մոսկվայի դիրքորոշումը, եթե Ադրբեջանը սկսի «ազատել իր օկուպացված տարածքները», արդյոք Մոսկվան ա՞չք կփակի, թե՞ «կմիջամտի Ադրբեջանի ներքին գործերին»: Ի պատասխան ՌԴ արտգործնախարարն ասել էր, որ Լեռնային Ղարաբաղի հակամարտության կարգավորումը վերացական չէ և «բացառապես Ադրբեջանի ներքին գործերի թեմա չէ», դրա վերաբերյալ «որոշումների մի ամբողջ հավաքածու» գոյություն ունի:

Քաղաքագետ Ալեքսանդր Մանասյանի խոսքերով՝ Լավրովի  այդ արտահայտությունը ռուսական լրատվամիջոցները շատ չեն քննարկել, քանի որ դա բաց ձևով Ադրբեջանին ուղղված փաստարկ էր, որը հերքում է Բաքվի բոլոր մյուս փաստարկները: Քաղաքագետը գտնում է, որ Հայաստանի խնդիրը այս պարագայում պետք է  այն, որ բաց չթողնենք այդ դրույթը քաղաքական և լրատվական դաշտից, կարողանանք  դա օգտագործել:

Անդրադառնալով  ՀՀ նախագահ Սերժ Սարգսյանի Բրյուսել կատարած այցելությանը և այնտեղ նրա արած հայտարարություններին ՝  Ալեքսանդր Մանասյանն ասաց, որ շատ կարևոր շեշտադրում եղավ Նախագահի կողմից: Նախ` Նախագահը խոսքում շատ զուսպ կոշտացման մոտեցում կար` բաց տեքստով չհակադրվելով:  «Դրանից բացի, Դոնալդ Տուսկն էլ նշեց, որ ստատուս քվոն շատ անկայուն է: Դրա ենթատեքստն այն է, որ մինչև ղարաբաղյան խնդրի լուծումը, պետք է ստատուս քվոն կայունացնել»,- ընդգծեց քաղաքագետը: