Ղրիմի հարցով Թուրքիայի հռետորաբանությունն ուժեղացվել է սիրիական գործոնով. թուրքագետ
Ղրիմի ու Թուրքիայի հակամարտությունը, որ մինչև վերջերս կարելի էր ընդամենը «ուր գնալ հանգստանալու» վերնագրել, գնալով քաղաքականում ու սրանում է. միայն վերջին օրերին դեպքերի ընթացքը այնպիսին է, որ Թուրքիան չմոռացավ Ղրիմի՝ ՌԴ-ին միանալու երեք տարին հիշատակել քննադատությամբ, արգելեց իր նավերին մտնել Ղրիմ, իսկ Ղրիմում զորքերի շարժը վերնագրվում է որպես «նախապատրաստում թուրքական պատերազմի» : Միևնույն ժամանակ Չավուշօղլուն հայտարարում է, թե Ռուսաստանի հետ տարաձայնությունները իրենք հարթել են:
Այս իրավիճակը մեկնաբանելու համար Panorama.am-ի թղթակիցը զրուցեց թուրքագետ Լևոն Հովսեփյանի հետ։
Վերջինս հերքեց հնարավորությունը, թե՝ Ղրիմը կարող է դառնալ Ռուսաստան-Թուրքիա հարաբերությունների վատացման անկյունաքար: Հովսեփյանը նշեց, որ թեև պաշտոնական Անկարան վերջին շրջանում կոշտացրել է Ղրիմի հարցում իր դիրքորոշումը և մարտի 16-ին արտգործնախարարության մակարդակով հայտարարել, որ թերակղզու միացումնը Ռուսաստանին անօրինական է, սակայն սա այն հարցը չէ, որն անդառնալիորեն կխզի երկու պետությունների հարաբերությունները։
«Ղրիմի հարցով Թուրքիայի հռետորաբանությունն ուժեղացվել է, և սա պետք է դիտարկել ռուս-թուրքական հարաբերություններում առկա գործընթացներով, մասնավորապես սիրիական գործոնով։ Սիրիայում էլ ի հայտ են եկել խնդիրներ, որոնք այս կամ այն կերպ ազդու են երկկողմ հարաբերությունների վրա։ Խոսքը, մասնավորապես, Սիրիայի հյուսիսում՝քրդական վերահսկողության տակ գտնվող շրջաններում, ռուսական ռազմական ներկայության մեծացման ու հաստատման մասին է»,- ասաց թուրքագետը։
Նրա համոզմամբ՝ հենց այս իրողություններից ելնելով էլ Թուրքիան, որպես հակակշիռ, սկսել է կրկին «խաղարկել» Ղրիմի գործոնը՝ արգելանքներ սահմանելով Ղրիմից Թուրքիա ժամանող նավերի վրա արգելանքներ դնելով։
«Ամեն դեպքում, չեմ կարծում, որ Ղրիմի գործոնը ռուս-թուրքական հարաբերություններում ճգնաժամի առիթ կհանդիսանա։ Սա առավելապես երկուստեք իրենց ունեցած լծակներն ըստ անհրաժեշտության օգտոգարծելու քաղաքականություն է։ Թուրքիայի համար, այդուհանդերձ, Ղրիմի գործոնը նաև աշխարհաքաղաքական կարևոր լծակ է՝ անհրաժեշտ պահին անհրաժեշտ ձևաչափով օգտագործելու համար»,- ընդգծեց Լևոն Հովսեփյանը։
Ամփոփելոց՝ թուրքագետը նշեց, որ Թուրքիայի շահերից չի բխում Ռուսաստանի հետ հարաբերություններում նոր ճգնաժամային փուլ թևակոխելը. «Ռուսաստանի հետ հարաբերությունների կարգավորումը և զարգացումը Թուրքիայի համար կարևոր գործոն է, եթե հաշվի առնենք Արևմուտքի, մասնավորապես ԵՄ անդամ երկրների հետ լարվածությունը, ՆԱՏՕ-ի հետ մի շարք անհամաձայնությունները և անվստահությունը, ինչպես նաև ԱՄՆ-ի իշխանությունների նկատմամբ առկա անորոշությունը։ Այս պարագայում Անկարային ձեռնտու չի լինի, որպեսզի որևէ ճգնաժամային իրավիճակ ստեղծվի, բայց մյուս կողմից նա կփորձի որոշ խաղաքարտեր օգտագործել Մոսկվայի դեմ»։