Ձեր վստահելի աղբյուրը

Նախօրեին մի խումբ արշավական երիտասարդներ  գնացել էին Գոշի լիճ՝  տեղում ծանոթանալու, թե ինչ է կատարվել լճի տարածքում:

«Միակ ուրախալի հանգամանքը, որին ականատես ենք եղել, տարածքում աշխատում էր անտառապահը»,- «Ազատություն» ռադիոկայանի եթերում ասաց «Հեռու Գոշից» նախաձեռնության անդամ Արմեն Ավագյանը: 



Նրա խոսքով, դրանից հետո տեսան այն, ինչ կատարվել է լճում. «Լրիվ քանդված վիճակ է: Ափի երկայնքով մոտ երկու մետր բարձրությամբ հանված էր տիղմը, որի վրա կային արմատախիլ արված ծառեր, ճյուղեր:

Նախարարը  մեզ հետ հանդիպման ընթացքում ասել էր, որ  ծառահատումներ չեն եղել, ընդամենը լճից դուրս են բերվել փտած ծառերը: Երեկ մենք տեղում ծանոթացանք, պարզվեց այլ բան. թրթուռավոր տեխնիկան մինչև լիճ հասնելը ճանապարհին  ինչ խանգարող ծառ եղել է, լավագույն դեպքում հատվել է, մնացած  բոլոր դեպքերում այդ մեծ ծառերն ուղղակի արմատախիլ արված են: Ունենք փաստեր, որոնք հակադարձում են  նախարարի ասածին:

Լճից վերև գտնվում է բնական աղբյուր, որտեղից բավականին լայն և շատ խորը փորված ջրագծի տեղ կա, որը համարյա հասնում է մինչև լիճ»,- պատմեց Ա. Ավագյանը:

Նա նաև ասաց, որ լճի տարածքից տեխնիկան հանված է:

Նախաձեռնության անդամ Սոֆյա Հովսեփյանը նշեց, որ այդ տարածքում կատարված բոլոր գործողությունները տանում են նրան, որ այդտեղ նորից բնական միջավայրը խաթարելով՝ արհեստական գործողություններ են կատարվում, հավանաբար ձկնաբուծություն կամ ինչ-որ բան:

«Այդ ամենը խաթարելու է բնական միջավայրը, խանգարելու է մեզ՝ արշավականներիս: Այդ տարածք զբոսաշրջիկների հոսքը մեծ էր, քանի որ գնում էին Գոշի լիճ տեսնելու այն, ինչ ստեղծվել է զուտ բնության կողմից: Դրսից եկողները մեզ առաջարկում էին տանել իրենց Գոշի լիճ: Այսօր եթե զբոսաշրջիկներին տանենք Գոշի լիճ, ապա բարբարոսություն կտեսնեն»,- ասաց նա:

Նրա խոսքով, ամենացավալին այն է, որ հերթական անգամ կատարվել են գործողություններ առանց տվյալ նախագծի շուրջ որևէ հանրային քննարկման:

«Կարծում եմ՝ խելամիտ կգտնվեն և տվյալ ՍՊԸ-ին կզրկեն լիցենզիայից, քանի որ տեղի է ունեցել ապօրինություն»,- ընդգծեց Ս. Հովսեփյանը: 

Ա. Ավագյանը ներկայացրեց  նախաձեռնության հիմնական պահանջները՝ օրենքով պատասխանատվության ենթարկել մեղավորներին, եթե նույնիսկ օրենքով թույլ տրվի էկոքոթեջների տեղադրումը, պետք է լինի լճից 50 մետր հեռավորության վրա՝ համայնապատկերը չփչացնելու համար




Հիշեցնենք, որ վերջին օրերին բնապահան ակտիվիստները բարձրաձայնում են Գոշ լճի հարակից տարածքում իրականացվող ապօրինի հողային աշխատանքների մասին: Բնապահպանության  նախարարությունից հայտնել են, որ «Դիլիջան» ազգային պարկ» ՊՈԱԿ-ի ռեկրեացիոն գոտու «Գոշ լիճ» տեղամասից` պետական սեփականություն հանդիսացող հողամասի  կառուցապատման իրավունքով  հանգստի գոտի կազմակերպելու և սպասարկման ծառայություններ մատուցելու նպատակով,  համաձայն 2015 թ, հունիսի 23-ին կնքված  պայմանագրի, օգտագործման է  տրվել «Վենդոռ» ՍՊԸ-ին: «Դիլիջան» ազգային պարկ» ՊՈԱԿ-ի և Բնապահպանական պետական տեսչության աշխատակիցների կողմից տեղում կատարված ուսումնասիրությունների արդյունքում պարզվել է, որ «Վենդոռ» ՍՊԸ-ն իրականացրել է տարածքը  չորացած փայտից և աղբից մաքրելու աշխատանքներ, որոնք այս պահին դադարեցված են: Կատարվում են ուսումնասիրություններ:

Արշավական երիտասարդներն ապրիլի 14-ին հավաքվել էին բնապահպանության նախարարության շենքի մոտ, իսկ ապրիլի 15-ին հանդիպել բնապահպանության նախարար Արծվիկ Մինայանի հետ՝ ներկայացնելով իրենց պահանջները: