Ձեր վստահելի աղբյուրը

Նորընտիր Ազգային ժողովի առաջին նիստը կայանալու է մայիսի 18-ին: ՍԴ-ում ապրիլի 2-ի ԱԺ ընտրությունների արդյունքները վիճարկելու վերաբերյալ Կոնգրես-ՀԺԿ դաշինքի դիմումի քննությունից և որոշման հրապարակումից հետո լրագրողների հետ զրույցում ասաց Կենտրոնական ընտրական հանձնաժողովի նախագահ Տիգրան Մուկուչյանը:

«Օրենքով սահմանված կարգով Սահմանադրական դատարանի որոշման հրապարակումից՝ այսինքն այսօրվանից հաշված երրորդ հինգշաբթին է կայանալու Ազգային ժողովի առաջին նիստը»,- նշեց նա:

Տ. Մուկուչյանն ասաց, որ նախքան առաջին նիստը՝  ԱԺ անցած կուսակցությունների, դաշինքների ցուցակներում ընդգրկված այն անձիք, ովքեր չեն ցանկանում մանդատ ստանալ, պետք է դիմում ներկայացնեն ԿԸՀ, որից հետո կկազմվի արձանագրություն, թե ովքեր են ստանում մանդատներ:

Մինչ այս պահը, ԿԸՀ նախագահի խոսքով, մանդատից հրաժարվելու մասին որևէ դիմում չեն ստացել. «Ենթադրում եմ՝ այդ ամենը պայմանավորված էր Սահմանադրական դատարանում գործի քննությամբ: Երևի բոլորը սպասում էին վերջնական որոշմանը»:

Հիշեցնենք, որ  քվեարկության արդյունքերով Ազգային ժողով է անցել չորս քաղաքական ուժ՝ ՀՀԿ, «Ծառուկյան» դաշինք, «Ելք» դաշինք, ՀՅԴ:  Հայաստանի Հանրապետական կուսակցությունը ստացել է 58 մանդատ,  որից երեքն ազգային փոքրամասնությունների 3 ներկայացուցիչ (եզդի, ասորի,  քուրդ), «Ծառուկյան» դաշինքը ստանում է 31 մանդատ,  որից մեկը ռուս համայնքի ներկայացուցիչ, «Ելք» դաշինքը՝ 9 մանդատ, ՀՅԴ-ն՝ 7 մանդատ։