Ծնունդների, ամուսնությունների թիվն ավելանում է Մարտակերտում. պատերազմի ապրեցնող ուժը
Ապրիլյան պատերազմից մեկ տարի անց Մարտակերտում կյանքը եռում է։ Այստեղ երեխաներ են ծնվում, դպրոց գնում, գործարաններ են աշխատում, ապրիլյան պատերազմից տուժած բնակավայրերը վերականգնվում են, մարդիկ ապրում են բնականոն կյանքով:
Մարտակերտի շրջանում հունիսի 10-ից կսկսվի հացահատիկի բերքահավաքը:
Շրջանի վարչակազմի ղեկավար Վլադիկ Խաչատրյանը «Ռազմական լրագրություն» թեմայով դասընթացի շրջանակներում Արցախ այցելած լրագրողների հետ զրույցում ասաց, որ լավ բերք ունեն, բայց չի կարող ասել, թե այն որքան կկազմի:
«Պապս ասում էր՝ բերքի շատ ու քիչ չի լինում, եթե բերք կա՝ ուրախացի»,- հավելեց Վլադիկ Խաչատրյանը:
Նրա խոսքերով՝ գարնան ամիսներին իրականացրել են հակահրդեհային միջոցառումներ, որպեսզի հուլիս-օգոստոս ամիսներին հնարավոր լինի կանխարգելել հրդեհները, որոնց հիմնական պատճառը մարդկային գործոնն է, որոշ դեպքերում՝ ջերմային ռեժիմի բարձր լինելը:
«Մենք միջոցներ ենք ձեռնարկել, որ հրդեհը լինի տեղային, և մենք կարողանանք այն հանգցնել։ Հիմնական վտանգավոր տարածքները ցանքատարածություններն են, որոնք մոտ են առաջնագծին: Վտանգը ավելի մեծ է, երբ ադրբեջանցիները կրակ են վառում, և այն քամու ուղղությամբ անցնում է մեր տարածք, ինչը տարածվում է ցանքարատարածություններով: Իհարկե մենք կարողանում ենք հրդեհը մոբիլիզացնել, բայց, որպեսզի նման երևույթներ չլինեն, ամբողջ առաջնային գծի հետևի մասով աղային լուծույթ ենք լցրել՝ չորացնելով ամբողջ խոտատարածքը։ Նոր աճած խոտը սկավառակաձև փոցխում ենք՝ ստեղծելով հերկած տարածք, որպեսզի կրակը մեր տարածք չհասնի»,- ասաց Վլադիկ Խաչատրյանը:
Անդրադառնալով վերականգնողական աշխատանքերին՝ վարչակազմի ղեկավարը նշեց, որ Մատաղիսում ծավալուն շինարարական աշխատանքներ են իրականացվել, հրթիռակոծության հետևանքով վնասված տների տանիքներն ամբողջությամբ վերականգնել են, նույնիսկ հին թիթեղներով տների տանիքներն են նորոգել: Մարտակերտում ևս ամբողջությամբ ավարտվել են շինարարական աշխատանքները:
«Մարտակերտը, Թալիշը և Մատաղիսը գտնվում են անմիջապես հակառակորդի նշանառության տակ: Փառք ու պատիվ մեր ժողովրդին, որ չեն վախենում ապրել այստեղ: Բնականոն կյանքով են ապրում, մարդիկ զբաղված են առօրյա հոգսերով»,- նշեց նա:
Ինչ վերաբերում է Թալիշին, ապա այն ևս վերակառուցվում է: Գյուղում կառուցվում են գյուղապետարանի և հանդիսությունների շենքերը, կկառուցվի նոր դպրոց, մանկապարտեզ: «Քանի որ հին դպրոցն ուղիղ հակառակորդի նշանառության տակ է գտնվում, դրա համար նոր դպրոցն առավել անվտանգ վայրում կկառուցվի: Ամենակարևորը՝ նոր շինությունները կունենան ապաստարաններ, որոնցում կլինի սանհանգույց և այլն»,- ընդգծեց Վլադիկ Խաչատրյանը՝ հավելելով, որ Թալիշում նախատեսվում է կառուցել նաև նոր տներ՝ ապաստարաններով:
«Շատերն ասում են, թե ինչո՞ւ հին տները չեն վերակառուցվում, բայց կա նաև հոգեբանական պահ: Երեխան բակում խաղալուց անընդհատ տեսնելու է հակառակորդի դիրքը, ինչը կազդի երեխայի հոգեբանության վրա: Դրա համար կառուցում ենք այնտեղ, որտեղից վիզուալ տեսանելի չէ առաջնագիծը»,- ասաց Մարտակերտի վարչական շրջանի ղեկավարը:
Եզրափակելով խոսքը՝ Վլադիկ Խաչատրյանը նշեց, որ Մարտակերտում ծնունդների, ամուսնությունների թիվն ավելանում է. 2016 թվականին շրջանում ծնվել է 21, իսկ այս տարվա հունվար-մայիսին՝ 27 երեխա:
Ինչ վերաբերում է ամուսնություններին, ապա նախորդ տարվա մայիսին գրանցվել է 3 ամուսնություն, այս տարվա մայիսին՝ 9:
Հարակից հրապարակումներ`
- Թալիշի վերականգնման ծրագիր չունենք, ունենք Թալիշ կառուցելու մեծ ծրագիր. Արայիկ Հարությունյան
- Թալիշի բերքը կհավաքեն թալիշցիները, այլ ոչ թե ուրիշները. Վիլեն Պետրոսյան