Պանրի արտադրությունը նվազել է, արտահանումը՝ նույնպես
Քաղաքացիներն ահազանգում են՝ պանիրը թանկացել է: Գյուղատնտեսության փոխնախարար Աշոտ Հարությունյանը Panorama.am-ի հետ զրույցում բացատրում է՝ կովերի կաթնատվությունը գնալով պակասում է, մթերողները կաթն ավելի թանկ են սկսել առնել:
Պաշտոնյայի ներկայացրած տվյալների համաձայն, հունիս-օգոստոս ամիսներին միջին հաշվով հանրապետությունում կաթի մեկ լիտր մթերվել է միջինը 130-140 դրամի, իսկ օգոստոսից սկսած այդ գինը տատանվում է 140-160 դրամի սահմաններում:
Ստեփանավանի շրջանի բնակիչները մեզ հետ զրույցում ասացին, մեկ լիտր կաթն իրենցից խոշոր ընկերություններից մեկը սեպտեմբերի մեկից գնում է 120 դրամով, իսկ մինչ այդ՝ 110 դրամով:
«Խոսքը միջինացված գնի մասին է: Բարձրացումը պայմանավորված է կաթնատվության նվազմամբ, նախածնային վիճակում անասունները սկսում են քիչ կաթ տալ: Թանկացումը սեզոնային բնույթ ունի, կաթը շատ է լինում, էժան են մթերում, քչանում է, ստիպված թանկ են գնում»,-ասաց փոխնախարարը:
Փոխնախարարն ասաց՝ չի ուսումնասիրել, թե ինչքանով է համահունչ կաթի մթերման թանկացումը պանրի գնի բարձրացմանը:
Ա. Հարությունյանի հրապարակած տվյալների համաձայն, հանրապետությունում այս տարվա առաջին վեց ամիսներին նախորդ տարվա նույն ժամանակահատվածի համեմատ պանրի արտադրության ծավալները նվազել են:
«2016 թվականի առաջին վեց ամիսների ընթացքում արտադրվել է շուրջ 9450 տոննա պանիր: Նույն ընթացքում ներմուծվել է մոտ 465 տոննա պանիր, արտահանվել է 3330 տոննա: Այս տարվա առաջին վեց ամիսների ընթացքում արտադրվել է 9005 տոննա պանիր, ներմուծվել է 770 տոննա պանիր, արտահանվել է շուրջ 3160 տոննա պանիր, իսկ սեպտեմբերի մեկի դրությամբ շուրջ 5200 տոննա»,-ասաց Ա. Հարությունյանը:
Թե ինչով է պայմանավորված պանրի արտադրության նվազումը, փոխնախարարը հստակ պատասխան չունի, շուկան է շատ բան որոշում:
Նախարարության պաշտոնյան կարծում է, որ առաջիկա ամիսներին պանրի գնի բարձրացում էլ չի լինում:
«Պետք է մի բան հաշվի առնել, պանիրը հենց նույն օրը չեն արտադրում ու շուկա հանում: Աղաջրում պահելու խնդիր կա, տեխնոլոգիական հարցեր են, որոնց մեջ չեմ ուզում խորանալ: Ես ասեմ հետևյալը, ամառվա սեզոնին մթերված կաթի պանիրը դեռևս ամբողջությամբ չի իրացվել, այն դեռ պատրաստման փուլում է»,-ասաց նա:
Փոխնախարարը չի բացառում, որ շուկայում փոփոխությունների հետևանքով հնարավոր է, որ պանրի գինն իջնի: Անդրադառնալով արտահանման ծավալների նվազման հնարավոր պատճառներին, փոխնախարարն ասաց, շուկայի վերլուծության տվյալներ չունի, բայց հայկական պանիրից դժգոհություններ չկան:
«Մեր պանիրը համով է: Հայկական պանիրը համային հատկանիշներով չի զիջում նման կարգի պանիրներին»,-ասաց նա:
Ի դեպ, 2016-ի առաջին ութ ամիսների համեմատ 2017-ին կաթի արտադրությունն աննշան աճել է:
«2017 թվականի սեպտեմբերի 1-ին նախարոդ տարվա նույն ժամանակահատվածի համեմատ կաթի արտադրությունն ավելացել է 0.8 տոկոսով կամ չորս հազար կիտրով: Անցած տարվա 8 ամիսներին արտադրվել է 589 հազար լիտր կաթ, իսկ այս տարի մոտ 593 հազար լիտր»,-ասաց պաշտոնյան:
Ըստ նրա, դա պայմանավորված է թե կաթնատվության բարձրացմամաբ, թե անասնագլխաքնակի ավելացմամբ:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան