«Երևակ» կրթահամալիրի սաները մասնագիտական այց են կատարել ՎիվաՍել-ՄՏՍ

Հասարակություն 13:30 29/11/2017 Հայաստան

Որպես Հայաստանում պատասխանատու գործարար մշակույթի մոդել ձևավորած ընկերություն, ՎիվաՍել-ՄՏՍ-ը երիտասարդներին մշտապես հնարավորություն է ընձեռում ավելի լավ ճանաչել գործարար կառավարման իր մշակույթը՝ հետագա մասնագիտական կողմնորոշման հարցում նրանց առավելագույն օգտակար լինելու նպատակով:

ՎիվաՍել-ՄՏՍ-ի գլխամասային գրասենյակում կազմակերպվող՝ արդեն ավանդույթ դարձած «բաց դռների օր» միջոցառման շրջանակներում, ընկերությունը հյուրընկալել էր «Երևակ» կրթահամալիրի ավագ դպրոցի 10-րդ և 11-րդ դասարանների սաներին:

Ընկերությունից հայտնում են, որ հանդիպման ժամանակ աշակերտները հնարավորություն են ունեցել ծանոթանալու ՎիվաՍել-ՄՏՍ-ի պատմությանը և հեռառահաղորդակցության ոլորտում ընկերության արձանագրած հաջողություններին:

Մասնավորապես՝ «Երևակ» կրթահամալիրի սաները շրջել են գրասենյակով, այցելել են գործառնական առանցքային ստորաբաժանումներ, այդ թվում նաև՝ Զանգերի ու սպասարկման կենտրոնները: Շրջայցի ավարտին դպրոցականները հանդիպել են ՎիվաՍել-ՄՏՍ-ի գլխավոր տնօրենի հետ: Ռալֆ Յիրիկյանը դպրոցականներին խորհուրդներ է տվել մասնագիտական կողմնորոշման և ընտրության գործում ու պատասխանել նրանց հարցերին:

«Ճանաչողական այսօրինակ հանդիպումները շատ կարևոր են փորձի փոխանակման, մասնագիտության ճիշտ ընտրության և երիտասարդներին՝ ընկերության հաջողված օրինակով առաջնորդելու տեսանկյունից: Տարբեր ոլորտներում ընդգրկված՝ ընկերության փորձառու մասնագետների հետ շփվելու և նրանցից խորհուրդներ ստանալու հնարավորությունները միտված են երիտասարդների մտահորիզոնի ընդլայնմանն ու անփոխարինելի են հետագա մասնագիտական կրթության վերաբերյալ պատկերացում կազմելու հարցում»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

ՎիվաՍել-ՄՏՍ-ը մշտապես կիսում է իր փորձը այն երիտասարդների հետ, որոնք ցանկանում են տեղեկություններ ստանալ հեռահաղորդակցության ոլորտի, կառավարման մշակույթի և ոլորտին առնչվող մասնագիտությունների վերաբերյալ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: