Արցախյան խնդրում Իրանի հավասարակշիռ դիրքորոշումը օգնում է առաջ տանել մեր շահերը. իրանագետ
Երուսաղեմը Իսրայելի մայրաքաղաք ճանաչելու ԱՄՆ նախագահի քայլը սադրիչ էր: Այդ քայլով Մերձավոր Արևելքում կրկին բորբոքվում է լարվածության այնպիսի օջախ, ինչպիսին իսրայելա-պաղեստինյան հակամարտությունն է: Լրագրողների հետ այսօր կայացած հանդիպման ժամանակ այս մասին ասաց իրանագետ Վարդան Ոսկանյանը:
«Ստացվում է, որ Մերձավոր Արևելքում մի հակամարտություն հաջողվում է զիջել, (խոսքը սիրիական հակամարտության մասին է), մինչդեռ փորձ է արվում բորբոքել ծխացող մեկ այլ հակամարտություն»,- ասաց նա՝ միաժամանակ հավելելով, որ Թրամփի վրա ազդում է բավական հզոր հրեական լոբբին:
Վարդան Ոսկանյանը հիշեցրեց, որ Երուսաղեմը երեք կրոնների մայրաքաղաք է, որին ամենամեծ հռչակը բերել է քրիստոնեությունը:
«Հետևաբար, խնդրի կարգավորման գործընթացում հաշվի չառնել քրիստոնյաների ճակատագիրը, կոպտագույն սխալ կլինի: Այդ քրիստոնյաների թվում են նաև հայերը՝ Երուսաղեմում իրենց հսկայական ներկայությամբ»,- ասաց նա:
Անդրադառնալով հայ-իրանական հարաբերություններին՝ իրանագետը շեշտեց՝ անցնող տարվա չափազանց կարևոր իրադարձություններից մեկն էլ ՀՀ պաշտպանության նախարարի՝ Իրան կատարած այցն էր:
«Շատ կարևոր է, որ Հայաստանն ու Իրանը պաշտպանական ոլորտում ունենան զարգացող հարաբերություններ: Ոլորտն անշուշտ փակ է և տեղեկատվության հսկայական հոսք ակնկալելը դժվար կլինի, սակայն գործակցային որոշ հեռանկարներ, ձեռքբերումներ և պայմանավորվածություններ առկա են:
Ինչ վերաբերում է Արցախյան հակամարտության համատեքստում Իրանի դիրքորոշմանը, ապա պետք է հիշել՝ Իրանն իր սահմանի երկայնքով ունի բազմաթիվ հակամարտություններ՝ բազմաթիվ կողմերի ներգրավմամբ: Եթե ԼՂ հակամարտությունը Հայաստանի համար առաջնային կարևորության է, ապա Իրանի համար ամենևին էլ այդպես չէ:
Սա այդ երկրի համար հերթական հակամարտություններից մեկն է: Այնուամենայնիվ, այս հարցում Իրանի հավասարակշիռ դիրքորոշումը օգնում է առաջ տանել մեր շահերը՝ հաշվի առնելով այն հանգամանքը, որ Ադրբեջանը փորձում է պարբերաբար Արցախյան հակամարտությունը ներկայացնել որպես կրոնական ենթատեքստ ունեցող հակամարտություն»,- շեշտեց բանախոսը:
Վերջում Վարդան Ոսկանյանը նշեց, որ Իրանում ադրբեջանամետ լոբբիստական խմբերն ակնհայտորեն թուլացել են: Ասվածի վկայություն նա համարեց Արցախի ԱԳ նախարարի՝ Իրանի նախագահի քաղաքական թիմը ներկայացնող թերթին վերջերս հարցազրույց տալը:
«Սա ցուցիչ է առ այն, որ Իրանում դիրքորոշումները փոխվել են: Սա նախևառաջ հայկական կողմի ջանքերի արդյունքն է: Բայց այդ ջանքերն ապարդյուն կլինեին, եթե Իրանը չունենար Հայաստանի հետ համընկնող շահեր: Խոսքը նախևառաջ արցախա-իրանական սահմանի անփոփոխ մնալու, տարածաշրջանում խաղաղապահ ուժեր մտցնելը բացառելու մասին է»,- նշեց իրանագետը:
Հարակից հրապարակումներ`
- Արցախը բարձր է գնահատում ԼՂ հակամարտության հարցում Իրանի հավասարակշռված դիրքորոշումը. Դավիթ Բաբայան
- «Մենք բարձր ենք գնահատում ղարաբաղյան հիմնախնդրի կարգավորման վերաբերյալ Իրանի սկզբունքային դիրքորոշումը»
- Սերժ Սարգսյան. Բարձր ենք գնահատում Իրանի հավասարակշռված դիրքորոշումը