Ձեր վստահելի աղբյուրը

ԱԺ նախագահ Արա Բաբլոյանը հունվարի 23-ին ընդունել է Հայաստանում Լիբանանի Հանրապետության արտակարգ և լիազոր դեսպան Մայա Դաղերին:

Ողջունելով դեսպանին խորհրդարանում՝ Արա Բաբլոյանը նշել է՝ թեև հայ-լիբանանյան դիվանագիտական հարաբերությունները քսանհինգ տարվա պատմություն ունեն, բայց բարեկամական կապերը՝ դարերի:

ԱԺ նախագահը շնորհակալություն է հայտնել Լիբանանի ժողովրդին հայկական համայնքի նկատմամբ տարիներ շարունակ ցուցաբերած ջերմ վերաբերմունքի համար: Խոսելով տարածաշրջանում տիրող իրավիճակի մասին՝ Արա Բաբլոյանն իր մտահոգությունն հայտնել վերջին տարիներին Սիրիայում տեղի ունեցող իրադարձությունների շուրջ և նշել, որ հարցերը պետք է լուծվեն քաղաքական ճանապարհով:

ԱԺ հանրային կապերի վարչության փոխանցմամբ, ԱԺ նախագահը պատրաստակամություն է հայտնել աջակցելու երկու երկրների խորհրդարանների հարաբերությունների աշխուժացմանը՝ նշելով նաև, որ Հայաստանը և Լիբանանը մեծ ներուժ ունեն տնտեսության, առողջապահության, կրթության, մշակույթի և այլ բնագավառներում համագործակցությունը զարգացնելու համար:
Հայաստանում Լիբանանի Հանրապետության արտակարգ և լիազոր դեսպան Մայա Դաղերը շնորհակալություն է հայտնել ընդունելության համար:

Տիկին Դաղերը, անդրադառնալով լիբանանցի և հայ ժողովուրդների դարավոր և ամուր բարեկամությանը, ընդգծել է հայկական համայնքի կարևոր դերն ու նշանակությունը Լիբանանի հասարակական-քաղաքական կյանքում: Մայա Դաղերը փաստել է, որ հայ պատգամավորներն արդյունավետ գործունեություն են ծավալում Լիբանանի խորհրդարանում:

Դեսպանը պատրաստակամություն է հայտնել նպաստելու խորհրդարանական բարեկամական խմբերի գործունեության աշխուժացմանը և երկու երկրների համագործակցության ընդլայնմանն ուղղված քայլերին:

Հանդիպման ավարտին Արա Բաբլոյանը հաջողություն է մաղթել Մայա Դաղերին մեր երկրում դիվանագիտական առաքելության իրականացման գործում: