«Ծիծեռնակ» մրցանակաբաշխության կազմակերպիչները երաժշտական տոն են խոստանում
Երևանում մարտի 31-ին երաժշտական տոն է լինելու. այդ օրը տեղի է ունենալու «Ծիծեռնակ» ազգային երաժշտական մրցանակաբաշխությունը: Փետրվարի 13-ին լրագրողների հետ հանդիպմանը ՀՀ մշակույթի նախարար Արմեն Ամիրյանը նշեց, որ սա արդեն երկրորդ մրցանակաբաշխությունն է, որի նպատակն է ի մի բերել հայ ժամանակակից և դասական արվեստի լավագույն նմուշները, թե ինչ հաջողությունների են կարողացել հասնել թե կոմպոզիտորները, թե կատարողական արվեստի ներկայացուցիչները: Նախարարը նշեց, որ մրցանակաբաշխության կազմակերպիչների հետ միասին խոստանում են գեղեցիկ երաժշտական տոն: Նա հայտնեց, որ մրցանակաբաշխության տոմսեր քիչ քանակով են վաճառվելու, հիմնականում հրավիրատոմսեր են լինելու: Մրցանակ-արձանիկի հեղինակն է Նուռը, այժմ պատրաստվում են մրցանակները:
Մրցանակաբաշխության պրոդյուսեր, երգիչ Հայկոն նշեց, որ մրցանակաբաշխությունն ամփոփում է այն, թե ստեղծագործողներն ինչ են արել տարվա ընթացքում: Որպես մասնակիցներ ընտրվել են բոլոր բնագավառներում լավագույնները: «Հաշվի ենք առել ոչ միայն մեր, այլև հանրության կարծիքը, սոցցանցերում մասնագետների կարծիքը: Ես, լինելով փոփ ժանրի և կինոարտադրության մարդ, ուրախ եմ, որ ավելի շատ տեղ է տրված դասական երաժշտությանը, նվագախմբերին, ազգային ոճին ու պոպուլյար ժանրին, նրանց, ովքեր արժանի են դուրս գալ հեռուստատեսություն, արժանի են գնահատվելու»,- ասաց նա:
Մրցանակաբաշխության պրոդյուսեր Տիգրան Վիրաբյանն ուրախությամբ արձանագրեց, որ կարողացել են հավաքել մի ստեղծագործական խումբ, որում Հայաստանի լավագույն մասնագետներն են: «Մենք պիտի կարողանանք «Ծիծեռակը» դարձնել այնպիսի մրցանակաբաշխություն, որ ցանկացած ստեղծագործող, երբ առաջին նոտան է գրում, մտքում ունենա, որ այն կարող է դառնալ այս մրցանակաբաշխության հավակնոտ գործ»,- ասաց նա: Վիրաբյանը նշեց, որ մրցանակաբաշխության նպատակն է տարվա ընթացքում աչքի ընկած ստեղծագործողներին հավուր պատշաճի գնահատել: Նրա խոսքով՝ «Ծիծեռնակը» երկրորդ կյանք առավ, և պետք է ներկա թիմով կկարողանան այս մրցանակաբաշխությունը դարձնել Հայաստանում ամենասպասվող իրադարձությունը:
«Ծիծեռնակ»-ի գլխավոր բեմադրիչ-ռեժիսոր Արթուր Մանուկյանը խոստացավ՝ այդ օրը քաղաքում կլինի տոն, և բոլորն ամեն տարի կսպասեն այդ տոնին: «Կարծում եմ՝ պետք է այս մրցանակաբաշխությունը լինի մասշտաբային: Այն, ինչ պլանավորել ենք և սպասվում է, կարծում եմ՝ բոլորիդ գոհացնելու է: Լինելու է 25 մրցանակ, նաև հատուկ մրցանակներ, համերգային գեղեցիկ համարներ, շոու-ծրագիր, նաև կարմիր գորգ, որտեղով անցնելու են մեծանուն արտիստներ, սպասված հյուրեր»,- ասաց նա:
Թեպետ ժյուրիի կազմը փակ է, բայց կազմակերպիչները վստահեցնում են՝ այնտեղ լինելու են Հայաստանի լավագույն մասնագետները՝ 7 հոգանող կազմ, ինչպես, օրինակ՝ Արթուր Գրիգորյանը, Թոփչյանը և այլք, այժմ բանակցում են, որ մրցանակաբաշխությունը լինի ուղիղ եթերում, որովհետև հետո ինտրիգը կորչում է: Նրա խոսքով՝ նաև պատասխանատվություն է աշխատել ուղիղ եթերում, կարևոր է նաև, որ ոչ միայն հանդիսատեսը, այլև հեռուստադիտողը հաճույք ստանա համերգից: Կազմակերպիչները կարևորում են, որ այս մրցանակաբաշխությանը մասնակցելու հնարավորություն ստանան ստեղծագործողներ մարզերից, Արցախից և Սփյուռքից: