Փորձագետը նշել է պատճառներ, թե ինչու Իսրայելի խորհրդարանը չընդունեց Հայոց ցեղասպանության մասին որևէ փաստաթուղթ
«Նախօրեին Իսրայելի Քնեսեթում Հայոց ցեղասպանության բանաձևի մերժումը կանխատեսելի էր և պայմանավորված էր միաժամանակ մի քանի գործոններով՝ ինչպես ներիսրայելական օրակարգով, այնպես էլ տարածաշրջանային գործընթացներով»,- այս մասին Panorama.am-ի թղթակցի հետ զրույցում նշեց Մերձավոր Արևելքի հարցերով փորձագետ Արմեն Պետրոսյանը՝ մեկնաբանելով փետրվարի 14-ին Իսրայելի խորհրդարանում Հայոց ցեղասպանության ճանաչման վերաբերյալ օրինագծի քվեարկության արդյունքները:
Փորձագետի կարծիքով՝ օրինագծի քվեարկության հետ կապված նման հանգուցալուծումը կանխատեսելի էր և տեղավորվում էր միաժամանակ Իսրայելի ներքին և արտաքին քաղաքական ուղեգծի ներկա որոշ իրողությունների տրամաբանության մեջ.« Նշվածի համատեքստում նախ և առաջ հարկ է հիշել այն ժամանակահատվածը և քաղաքական իրավիճակը, երբ կրկին քաղաքական օրակարգ բերվեց Հայոց ցեղասպանության ճանաչման հարցը: Իսկ դա 2017թ. դեկտեմբերի կեսերին էր՝ պայմանավորված ԱՄՆ նախագահ Դոնալդ Թրամփի՝ Երուսաղեմն Իսրայելի մայրաքաղաք ճանաչելու և ամերիկյան դեսպանատունն այնտեղ տեղափոխելու որոշման դեմ իրականացվող արշավով, որի առանցքային դրոշակակիրը Թուրքիան էր: Այդ երկրի իշխանությունները տարբեր մակարդակներում և տարբեր հարթակներում սուր քննադատության էին ենթարկում ոչ միայն ԱՄՆ-ի վարչակազմին, այլև Իսրայել պետությանն ու նրա իշխանություններին՝ բնորոշելով պետությունը որպես ահաբեկչությանն աջակցող, իսկ նրա կառավարությանը՝ խաղաղ բնակչությանը սպանող: Հենց այդ մեղադրանքների ֆոնին էլ, ինչպես թուրք-իսրայելական հարաբերությունների լարվածության նախկին շրջափուլերում, քաղաքական և քարոզչական հարթություններում, որպես Անկարային համարժեք պատասխան, օգտագործվեց Հայոց ցեղասպանությունը ճանաչելու թեմայի ակտիվացման հակաքայլը»:
«Մինչդեռ ընթացիկ տարվա հունվարի վերջից՝ հատկապես պայմանավորված Սիրիայի քրդաբնակ Աֆրին շրջանում Թուրքիայի կողմից նախաձեռնված «Ձիթենու ճյուղ» ռազմագործողության իրողությամբ, թուրքական իշխանությունների հակաամերիկյան հռետորաբանության մեջ թեմատիկ փոփոխություն տեղի ունեցավ. Երուսաղեմի խնդիրը փոխարինվեց Վաշինգտոնի կողմից քուրդ ահաբեկիչներին աջակցելու մեղադրանքներով, իսկ Երուսաղեմի հարցի մասին այսօր հիշատակում են հիմնականում պաղեստինյան կազմակերպությունները: Այսինքն՝ նման իրավիճակում, երբ Երուսաղեմի հետ կապված կրքերը հանդարտվել էին, Իսրայելի կողմից Թուրքիայի իշխանությունների հռետորաբանությունը կրկին գրգռելը՝ մանավանդ տարածաշրջանում Թել Ավիվի ունեցած այլ սկզբունքային և առաջնային խնդիրների համատեքստում անտրամաբանական կլիներ. նշվածին, անշուշտ, պետք է հավելել նաև իսրայելաթուրքական գազային նախագծերի առկայությունը, որոնք, չնայած երկկողմանի հարաբերությունների սրմանը, այսուհանդերձ դեռևս շարունակում են օրակարգում մնալ», - նշեց Պետրոսյանը:
Ներիսրայելական իրողությունների հետ կապված փորձագետը պարզաբանեց, որ այս անգամ նախագիծը Քնեսեթ էր ներկայացրել էր ընդդիմադիր «Յեշ Ատիդ» կուսակցությունը, որը նոր փաստաթուղթ չէր և դրա հեղինակը նախկին պատգամավոր Արյե էլդադն է: Իսկ Իսրայելի ներքաղաքական կայնքում այսօր առկա իրողությունները և հատկապես «Յեշ Ատիդի» ու երկրում իշխող «Լիքուդ» կուսակցության գլխավորած կոալիցիայի հարաբերություններն այնքան են սրվել, որ Յաիր Լապիդի գլխավորած կուսակցության ներկայացրած որևէ նախաձեռնություն չէր կարող հաջողություն ունենալ։
Փորձագետը նաև հավելեց. «Փաստորեն ևս մեկ անգամ ականատես եղանք Իսրայելի կողմից հայ ժողովրդի ազգային ողբերգության քաղաքական շահարկման հաջողված փորձի, որը հերթական բիծն է ավելացնում Իսրայել պետության բարոյական նկարագրում»:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ