Ձեր վստահելի աղբյուրը

Մեքենան ականի վրա պայթել է Մարտակերտի շրջանում՝ սահմանամերձ տարածքում: Պայթյունի հետևանքով զոհվել է երեք մարդ, երկուսը վիրավորվել են: Նրանք բոլորն էլ ականազերծման աշխատանքներ իրականացնող «The Helo Trust» միջազգային կազմակերպության աշխատակիցներ են, Արցախի քաղաքացիներ:

Panorama.am-ի հետ զրույցում  նման տեղեկություններ հայտնեց  Արցախի Հանրապետության նախագահի մամլո խոսնակ Դավիթ Բաբայանը:

«Այս պահին ամեն ինչ արվում է  վիրավորների կյանքը փրկելու, նրանց կյանքին սպառնացող վտանգները չեզոքացնելու համար»,-ասաց նա:

Բաբայանի խոսքով,  դեպքի վայրում աշխատում են արտակարգ իրավիճակների նախարարության, ոստիկանության աշխատակիցները:

Անդրադառնալով հարցին, թե տվյալ տարածքում նախկինում ականազերծման աշխատանքներ չե՞ն իրականացվել, Բաբայանն ասաց, որ տարիներ շարունակ նման աշխատանքներ կատարվում են:

«Դա այնպիսի աշխատանք է, որ կարող է մի տեղում ականազերծում անեն, պարզվի մի  այլ տեղ դեռ կա, քանի որ ականազերծման քարտեզները ոչնչացվել են թշնամու կողմից: Հիմա ամեն ինչ արվում է, որ ականապատված այդ տարածքները մաքրվեն»,-ասաց Բաբայանը:

Արցախի նախագահի խոսնակը նշում է, յուրաքանչյուր նման դեպք ուղերձ է, որ խաղաղության ու կայունության ուղղությամբ ջանքները պետք է շարունակվեն՝ հետագայում նման դեպքեր չլինեն. «Տուժածները մեր հայրենակիցներն են, ովքեր տարիներ շարունակ Արցախը մաքրում են պատերազմի հետևանքներից»: