Ձեր վստահելի աղբյուրը

16:25
Նիկոլ Փաշինյանի գլխավորած երթն այժմ Տիգրան Մեծ պողոտայով շարժվում է դեպի Հանրապետության հրապարակ:
Փաշինյանը հայտնեց, որ շարժմանն է միացել ՀՀ ոստիկանության կապիտան Գարիկ Թովմասյանը: 
Կապիտանը «Ազատություն» ռկ-ի հետ զրույցում ասաց, որ աշխատանքից դուրս է եկել և միացել է երթին: «Ուզում եմ կանգնել իմ ժողովրդի կողքին, որովհետև չեմ կարողանա մահակով ու վահանով դուրս գալ իմ ժողովրդի առաջ: Ես պայքարել եմ հանցագործության դեմ, հիմա չեմ կարող պայքարել իմ ժողովրդի դեմ, քանի որ ժողովուրդը հանցագործություն չի կատարել»,- ասաց կապիտանը:

15:10
«Ծառուկյան» խմբակցության պատգամավոր, Գագիկ Ծառուկյանի փեսա Դավիթ Մանուկյանը, որը խմբակցության անդամների հետ մասնակցում է Նիկոլ Փաշինյանի գլխավորած երթին, «Ազատության» հարցին՝  որն էր պատճառը, որ  կողմ է քվեարկել Սերժ Սարգսյանի վարչապետությանը, փորձում էր անընդհատ խուսափողական պատասխան տալ, սակայն պնդմանը՝ փոշմանե՞լ է, որ կողմ է քվեարկել, ասաց. «Եթե ժողովրդի մեծամասնության կամքը դա էր, որ Սերժ Սարգսյանը հրաժարական տար, ուրեմն այդպես է ճիշտը: Միգուցե ես փոշմանել եմ, այո»

14:45
 «Ծառուկյան» խմբակցության անդամ Նաիրա Զոհրաբյանը,  որը միացել է Նիկոլ  Փաշինյանի առաջնորդած երթին, «Ազատություն» ռկ-ի հետ զրույցում ասաց, որ իրենց խմբակցությունը կքննարկի միասնական թեկնածու ունենալու հարցը:

Հարցին՝ Փաշինյանի թեկնածությունը վարչապետի պաշտոնում իրեց  համար ընդունելի՞ է, Նաիրա Զոհրաբյանն արձագանքեց. «Ինձ համար անձնապես ընդունելի է և ես չեմ կարծում, որ մեր կուսակցությունում այդ թեկնածությանը դեմ լինեն: Բայց դա քննարկման խնդիր է»:

Դիտարկմանը, թե իրենց խմբակցությունում տեղի ունեցավ «երկփեղկում», քանի որ «Ծառուկյան» խմբակցության միայն 1/3-ն է դեմ քվեարկել Սերժ Սարգսյանի թեկնածությանը, Նաիրա Զոհրաբյանն ասաց, որ թե քաղաքացիները, թե լրագրողներն իրավունք ունեն իրենց այդ հարցն ուղղել:

«Ես, Վահե Էնֆիաջյանը, Միքայել Մելքումյանը, Իվետա Տոնոյանը, Շաքե Իսայանը, Լուիզա Սիմոնյանը, Գևորգ Պետրոսյանը, Հակոբ Նազարյանը, Նոնա Առուստամյանը քվեարկել ենք դեմ, և ես մնում եմ այն կարծիքին, որ իմ մյուս գործընկերները չպետք է կողմ  քվեարկեին: Ես իրավունք չունեմ որևէ մեկին մեղադրելու, քանի որ կայացվել էր ազատ քվեարկելու որոշում: Յուրաքանչյուրն ազատ է եղել իր խղճի առաջ, բայց իմ խիղճը, արժանապատվությունը ինձ թելադրել է քվեարկել դեմ»,- ասաց Նաիրա Զոհրաբյանը:

14:01
Երևանի տարբեր փողոցներում երթերը շարունակվում են: Վանաձորում, Գյումրիում, Իջևանում ևս բողոքի ակցիաներ են անցկացվում:

Նշենք, որ ցուցարարներին են միացել «Բարգավաճ Հայաստան» կուսակցության անդամները։

12:22
Երթի մասնակիցներին միացավ ԱԺ պատգամավոր Սասուն Միքայելյանը:

12:00
Ոստիկանությունը զրահատեխնիկա, ոստիկանական ուժեր է կենտրոնացրել Մելիք Ադամյան փողոց, որտեղ գտնվում է Հայաստանի Հանրապետական կուսակցության գրասենյակը:








11։49
«Ուզում են Կարեն Կարապետյանին նշանակել վարչապետ՝ մտածելով, որ ժողովուրդն այնքան միամիտ է, որ կհամաձայնվի մի հանրապետականին ուրիշ հանրապետականով փոխարինել»,- «Ազատություն» ռկ-ի հետ զրույցում ասաց Նիկոլ Փաշինյանը:

Լրագրողը հիշեցրեց վարչապետի պաշտոնակատար Կարեն Կարապետյանի հայտարարությունը, թե հրապարակում վարչապետ ընտրելը հակասում է օրենքին, Նիկոլ Փաշինյանը նշեց, որ նա լավ չի հասկացել:

«Վարչապետը պետք է ընտրվի Ազգային ժողովում, օրենքին համապատասխան պետք է առաջադրվի ԱԺ-ի խմբակցությունների կողմից, իսկ մինչ այդ ժողովուրդը հրապարակում պետք է համաձայնության տա որևէ թեկնածուի»,- ասաց նա:

Դիտարկմանը, թե «Ելք» խմբակցությունը կարող է առաջադրել որևէ թեկնածուի, Փաշինյանը դրական պատասխան տվեց:

Նիկոլ Փաշինյանը նաև ասաց, որ ՀՀԿ-ն իշխանություն չէ և չպետք է լինի: Ըստ նրա՝  եթե ՀՀԿ-ն անցկացնի արտահերթ ընտրություններ, կարծում է՝ իրենց առաջին ռեակցիան այն կլինի, որ ակտիվ կբոյկոտեն, և այդ ընտրությունները չեն կայանա: 

«Ժողովուրդը հաղթել է, և ժողովրդի հաղթանակի արդյունքները հիմա պետք է արձանագրեն»,- նշեց նա:

11։38
Երևանում  այսօր մեկնարկեցին բողոքի ակցիաները: Բժշկական համալսարանի և այլ բուհերի ուսանողները դուրս եկան երթի:

Հանրապետության հրապարակում էլ  մեկնարկել է «Իմ քայլը» նախաձեռնության առաջնորդ, ԱԺ պատգամավոր Նիկոլ Փաշինյանի գլխավորած բողոքի ակցիան: «ՀՀԿ հեռացիր» վանկարկումներով երթը շարժվում է Մաշտոցի պողոտայով:

Նշենք, որ ոստիկանների թիվը ևս ավելանում է: