Ձեր վստահելի աղբյուրը

Ազգագրագետ, կովկասագետ Հրանուշ Խառատյանի կարծիքով Հայաստանում խնդիր կա՝ ձևակերպելու, թե ինչ ենք հասկանում մշակութային անընդհատություն և ժառանգորդություն ասելով։ Մայիսի 25-ին ՀՀ վարչապետ Նիկոլ Փաշինյանի՝ մշակութային գործիչների հետ հանդիպմանը նա հորդորեց ազատվել մշակույթի նախարարության այն կադրերից, որոնք իրենց տեղում չեն։ «Ես վախենում եմ ծրագիր ներկայացնել այդ նախարարություն, այնտեղ գողանում են, գռեհկացնում, վաճառում ուրիշին, և այն ես հանդիպում եմ այլ հեղինակի գռեհկացրած ձևակերպման տակ»,- ասաց Խառատյանը։

Փաշինյանն արձագանքեց, թե Խառատյանը հայտարարեց այն խնդիրը, որն ուղղված էր Մշակույթի նախարարին, և նա այդ խնդիրը լսեց: «Մշակույթի նախարարությունը մի քիչ հին ընկալումներով է ձևակերպվել, որ նա պետք է նկարչին բացատրի՝ ինչպես նկարել, գրողին՝ ինչպես գրել, դերասանին՝ ինչպես խաղալ, մենք չենք կարծում, թե դա է մշակույթի նախարարության գործառույթը, նրա գործառույթը Հայաստանի և համաշխարհային մշակութային կյանքի հետ ՀՀ քաղաքացու հաղորդակցման ապահովումն է, հենց սա հաշվի առնելով ենք նշանակել Լիլիթ Մակունցին, նա կաշխատի այս ուղղությամբ»,- ասաց նա։

Վարչապետին խնդրեցին հետևել, որ մարզերն անտեսված չլինեն, ամեն բան կենտրոնացված չլինի միայն Երևանում: Փաշինյանը նշեց, թե իր խոսքում չի առանձնացրել Հայաստանի որևէ հատված, չի խոսել միայն Երևանի մասին։ «Մենք պետք է ապահովենք, որ մարզերում ևս լինի մշակութային կյանք, պետությունը պետք է ապահովի նորմալ վիճակում գտնվող համերգասրահներ, ցուցասրահներ, իսկ դրանք բովանդակությամբ լցնելը արվեստագետների խնդիրն է։ Այստեղ միայն Կառավարությունը չէ, նաև քաղաքապետարաններ կան, համայնքները՝ իրենց ղեկավարների հետ»,- ասաց նա:

Կառավարության ղեկավարը կարծիք հայտնեց, որ երևանյան կոլեկտիվները պետք է նաև հյուրախաղերի մեկնելու հնարավորություն ունենան, նշեց՝ տեղյակ է, որ որոշ թատրոններ մարզեր, հատկապես՝ սահմանամերձ գոտիներ մեկնելու լավ սովորույթ ունեն, բայց էլի է կարծում՝ մշակութային կյանքը պետք է փորձել դուրս հանել բարեգործության տրամաբանությունից: «Բարեգործությունը վատ չէ, բայց մեր խնդիրը պետք է լինի, որ քաղաքացին մշակույթի հետ հաղորդակցվելը կենսական խնդիր համարի՝ թե մարզերում, թե Երևանում»,- ասաց նա։

Կինովավերագրող Գագիկ Հարությունյանը հայտնեց՝ գոյություն ունի օրենք պաշտոնական փաստաթղթերի վերաբերյալ, բայց չկա օրենք, որ պաշտպանի մեր արխիվային փաստաթղթերը: Նա նշեց իրեն մտահոգող մի երևույթի մասին՝ բարձրաձայնեց Կոմիտաս վարդապետի կենսագրության կեղծման մասին, հայտնեց, որ կեղծ գրքեր են հրատարակում, գրադարաններին բաժանում։

Փաշինյանը նշեց՝ որևէ բան չի կարող ասել, բայց խոստացավ ծանոթանալ խնդրին։