Ձեր վստահելի աղբյուրը

«Այս հարցը ինձ չպետք է ուղղեք, խափանման միջոց փոխելու հարցը  լուծում է դատախազը»,- կառավարության նիստից առաջ պատասխանելով լրագրողների հարցին, թե օրենսդիրների ստորագրահավաքը հնարավոր է ազդեցություն ունենա Ռոբերտ Քոչարյանի խափանման միջոցը փոխելու վրա, ասաց ՀՔԾ ղեկավար Սասուն Խաչատրյանը։

Լրագրողների այն հարցին, թե Ձեր կարծիքով, լինելով ազատության մեջ կխոչընդոտի արդյոք Ռոբերտ Քոչարյանը քննությանը,  Սասուն Խաչատրյանը պատասխանեց. «Խափանման միջոցը ընտրվում է ելնելով այն անհրաժեշտությունից, որ ապահովվի մեղադրյալի պատշաճ վարքագիծը վարույթի ընթացքում, ինչ է նշանակում դա, թյուր կարծիք կա, որ դա ընդամենը փախուստի դիմելու հավանականությունն է, բայց միշտ մոռացվում է 2-րդ, իմ կարծիքով, առավել  կարևոր հանգամանքը, որ պատշաճ վարքագծի բաղադրիչը մեղադրյալի կողմից վարույթի մասնակցող անձանց վրա ապօրինի ազդեցությունը բացառելն է, հենց այս կարևոր նախապայմանից ելնելով, ես գտնում եմ, որ Ռոբերտ Քոչարյանին կալանքի տակ պահելը անհրաժեշտ է այս պահին»։

Ռոբերտ Քոչարյանի փաստաբանների հայտարարությունից մեջբերելով լրագրողները հարցրեցին, այն, որ ՀՀ 2-րդ նախագահը որպես վկա է կանչվել հարցաքննության, ապա դարձել մեղադրյալ, արդյոք օրենքի խախտում չէ, ՀՔԾ պետն ասաց. «Քրեական դատավարությունը դինամիկ պրոցես է, այսինքն՝ ապացույցների ձեռքբերումը տեղի է ունենում անընդհատ, ամեն ժամ, ամեն օր, կուզեք ամեն վայրկյան, անձի կարգավիճակը  գնահատվում է այդ ապացույցների համակցության հիման վրա։ Որևէ խախտում չկա, անմիջապես այն պահին, երբ արդեն պետք էր քննչական գործողություն կատարվեր, նրան ծանուցվել է, որ ունի  մեղադրյալի կարգավիճակ, հակառակ դեպքում, երբ նա հարցաքննվեր որպես վկա, դա կլիներ խախտում»։ 

Լրագրողները Սասուն Խաչատրյանին նաև հիշեցրեցին, որ Ռոբերտ Քոչարյանի փաստաբանները  քաղաքական հետապնդում են որակել, բացի այդ նշել, որ իրավական անգրագիտություն է տեղի ունեցել քննիչների կողմից, մեղադրանքի հետ կապված էլ ասել, որ հիմնավորում չկա. «Ես չեմ իջնում իրենց մակարդակին և անձնական  վիրավորանքներով իրենց պատասխանել չեմ ցանկանում։ Մեղադրանքի որոշումը, այնքան պարզ է, այնքան հստակ և հիմնավորված, որ ինձ համար անհասկանալի են և տեղ-տեղ նաև ծիծաղելի այդ մանիպուլյացիաները, որոնք փորձում են անել պաշտպանական կողմի ներկայացուցիչները, ինչպես նաև այդ քաղաքական հայտարարությունները։ Ինչո՞ւմ է մեղադրվում Ռոբերտ Քոչարյանը։ Նա մեղադրվում է  Սահմանադրական կարգը բռնի տապալելու մեջ։ Նման մեղադրանք առաջադրելու համար հիմք է հանդիսացել բանակի ներգրավումը քաղաքական գործընթացներում։ Բանակի ներգրավումը  քաղաքական գործընթացներում  արգելված էր ինչպես նախկին, այնպես էլ Սահմանադրության ներկայիս խմբագրությամբ, բանակի ներգրավումը, զինված ուժերի ներգրավումը քաղաքական գործընթացներին անթույլատրելի է։ ԶՈՒ ներգարվումը կարող էր լինել միայն այն դեպքում, երբ  հայտարարված լիներ Ռազմական դրություն, ինչպես գիտեք, Ռազմական դրություն հայտարարված չի եղել»։ 

Հաջորդ հարցին էլ, թե կարող է արդյոք ՌԴ արձագանքը ազդեցություն ունենալ քննչական մարմինների հետագա գործողությունների վրա, Սասուն Խաչատրյանն ասաց, որ ՀՔԾ պետն այն պաշտոնյան չէ, որ մեկնաբանի այլ երկրի պաշտոնյայի ասածը. «Իմ մասով ասեմ, որ քաղաքական հետապնդման մասին խոսք անգամ լինել չի կարող լինել»։

Հնարավոր է, և ադյոք անհրաժեշտություն տեսնում է  ՀՔԾ պետը, որպեսզի հարցաքննվեն նաև Սերժ Սարգսյանն ու Հովիկ Աբրահամյանը հարցին էլ պատասխանեց. «Անհրաժեշտությունը տեսնում է քննիչը, հարցաքննելու կամ չհարցաքննելու պարագայում նույնպես պետք է հիմնավորված լինի։ Ես մի քանի անգամ այդ մասին ասել եմ, եթե քրեական գործով բացահայտման ենթակա հանգամանքների մասին, որևէ պաշտոնատար անձ կարող է որևէ նշանակելի տեղեկություն հայտնել, նա հարցաքննվելու է»։