Ձեր վստահելի աղբյուրը

13:33
Ակցիայի մասնակիցներն արդեն ԲԴԽ-ի մոտ են: Նրանք ցանկանում են իրենց բողոքը հայտնել Խորհրդին, որպեսզի վերջինս կասեցնի դատավոր Ալեքսանդր Ազարյանի լիազորությունները:

Հիշեցնենք, որ  Վերաքննիչ քրեական դատարանը, դատավոր Ալեքսանդր Ազարյանի նախագահությամբ,  օգոստոսի 13-ին հրապարակեց ՀՀ երկրորդ նախագահ Ռոբերտ Քոչարյանի խափանման միջոցը փոխելու հարցով որոշումը։

Ակցիայի մասնակիցներից մեկը հայտարարեց, որ գլխավոր դատախազությունից ստացել են պատասխան, որ ըստ իրենց՝ չի եղել որևէ հիմք բացարկ ներկայացնելու դատարանին, ապա ակցիայի մասնակիցները պետք է համապատասխան դիմում ստորագրեն և  ներկայացնեն ԲԴԽ-ին, որպեսզի կասեցվի դատավոր Ալեքսանդր Ազարյանի լիազորությունները:

13:11
Ակցիայի մասնակիցները հայտարարեցին, որ Դատախազությունից գնում են Բարձրագույն դատական խորհրդի շենքի մոտ և այնտեղ էլ իրենց հետագա քայլերի մասին հայտարարություն կանեն:

13:00
Գլխավոր դատախազության հատկապես կարևոր գործերով քննության նկատմամբ հսկողության վարչության պետ Վահագն Մուրադյանը հանդիպեց դատախազության շենքի դիմած հավաքվածներին։

«Ժողովրդի անունից լիազորվել ենք մեր բողոքը հայտնել, որ Ռոբերտ Քոչարյանի հանդեպ օր առաջ միջնորդությունը Գլխավոր դատախազությունը ներկայացնի Վճռաբեկ դատարան։ Ուզում ենք իմանալ՝ նախապատրաստվու՞մ են նյութեր»,- դիմելով դատախազության ներկայացուցչին՝ ասաց ակտիվիստներից մեկը։

Մուրադյանը պատասխանեց. «Մենք երեկ էլ ենք տարածել հաղորդագրություն, որ դեռևս Վերաքննիչ դատարանի որոշումը չենք ստացել, մեկ-երկու օրվա ընթացքում որոշումը կստանանք, այդ հարցը կքննարկենք և որոշման մեջ նշված հարցերի հետ կապված համահունչ բողոք կտանենք»։

Նա հավելեց, որ իրենց դիրքորոշումը Վերաքննիչ դատարանում հայտնել են։

Լրագրողների հարցին, թե մտադրություն ունե՞ն բողոք տանելու Վճռաբեկ դատարան, նա պատասխանեց. «Մտադրություն ունենք, ուղղակի պետք է որոշումը ստանանք, որպեսզի դրան համահունչ լինի ամեն ինչ»։

12։50
ՀՀ գլխավոր դատախազության մոտ հավաքվել են նաև Մարտի 1-ի զոհերի հարազատները: Գոռ Քլոյանի հայրը՝ Սարգիս Քլոյանն ասաց, որ իր անչափահաս երկու թոռները չեն իմացել՝ ինչ է հայրիկ բառը. «Մեկը 40 օրական էր, մյուսը՝ 2 տարեկան և նրանք չեն իմացել, թե ինչ բան է պապա բառը: Հիմա մեկը 12 տարեկան է, մյուսը՝ 10: Ռոբերտ Քոչարյան, դու ոնց ես տանելու իմ էրեխեքի այս դժբախտությունը, որ չգիտեն՝ ինչ է «պապա» բառը»:

Նա նշեց՝  երեկ երբ իմացել է, որ Վերաքննիչ քրեական դատարանի կողմից  ազատ է արձակվել Ռոբերտ Քոչարյանը, ճնշումը բարձրացել է, հիմա սպասում են Վճռաբեկ դատարանի որոշմանը:

Սարգիս Քլոյանն ասաց, որ իրենք դատախազության առաջ հավաքվել են պահանջով՝  ձերբակալել Ռոբերտ Քոչարյանին:

12:34
Այժմ քաղաքացիները «Քոչարյան, մարդասպան» վանկարկումներով քայլում են դեպի Գլխավոր դատախազություն:

12.30
Նշենք, որ սրահում պառկել էր ակտիվիստ Վարդգես Գասպարին՝ ձեռքին Մարտի 1-ի զոհերի լուսանկարով փոքրիկ պաստառ։

12։17 
«Հեղափոխությունը Հայաստանում տեղի է ունեցել ու այն արդեն անշրջելի է, իշխանությունները գործում են Հայաստանում ըստ սահմանադրությամբ տրված իրենց լիազորությունների, որոնց շրջանակում փորձում են իրականացնել երկրում արդարադատություն։ Բայց բացի իշխանություններից, ՀՀ-ում կան ազատ, անկախ քաղաքացիներ, որոնք ամեն վայրկյան պատրաստ են արդարադատության վերականգնման պրոցեսի մեջ ունենալ իրենց մասնակցությունը։ Մենք չենք պատրաստվում մեր երկրում հանդուրժել որևէ անարդարություն»,- հայտարարեց Դավիթ Պետրոսյանը։

Ակցիայի մասնակիցներից մեկն էլ լրագրողների հետ զրույցում նշեց, որ Ռոբերտ Քոչարյանի մամուլի ասուլիսն արդեն խափանված է. «Հարկ եմ համարում ասել, որ արդեն կարող ենք հեռանալ»։

12։12
Քիչ անց պետք է մեկնարկեր ՀՀ երկրորդ նախագահ Ռոբերտ Քոչարյանի մամուլի ասուլիսը: Ասուլիսի սրահ ներխուժեցին մի խումբ քաղաքացիներ, այդ թվում որոշ ակտիվիստներ, «ԵՊՀ ռեստարտ» նախաձեռնության անդամ, ուսանող Դավիթ Պետրոսյանը:

Այս պահին նրանք տարբեր վանկարկումներով փորձում են խոչընդոտել ասուլիսը: