Ձեր վստահելի աղբյուրը

«Մանկաբուժությունն ընդհանուր առմամբ, այդ թվում նաև մանկական վիրաբուժությունն ու նյարդավիրաբուժությունը բավականին լուրջ առաջընթաց են գրանցել Հայաստանում»,- այս մասին այսօր Երևանում մեկնարկած Մանկական վիրաբուժության և նյարդավիրաբուժության միջազգային համաժողովի բացման արարողությունից հետո լրագրողների հետ զրույցում ասաց ՀՀ Ազգային ժողովի նախագահ, հայտնի մանկական վիրաբույժ Արա Բաբլոյանը։

Նրա խոսքով՝ մանկական վիրաբուժության զարգացումը դինամիկ պրոցեսի մեջ է և Հայաստանը դեռ շատ անելիքներ ունի։

«Այս համաժողովը դրա օրինակն է, որ մենք պետք է հավաքվենք, կիսվենք փորձով, լավագույնը վերցնենք, բայց այն, որ Հայաստանում մանկական մահացության ցուցանիշները քայլ առ քայլ մոտենում են եվրոպական չափանիշներին, մեծ հպարտություն է մեզ համար՝ և որպես պետություն, և որպես  ժողովուրդ։ Մենք մպետք է ուրախ լինենք, որ կարողանում ենք անել ամեն ինչ երեխաների կյանքը փրկելու և առողջությունը բարելավելու համար։

Լրագրողի հարցին՝ «մեկ տարի անց տեղի կունենան ընտրություններ և նոր Ազգային ժողովի նախագահ կլինի, դուք Ձեզ դրանից հետո որտեղ եք պատկերացնում», Բաբլոյանը պատասխանեց. «Անկախ նրանից, թե ով կլինի խորհրդարանի նախագահ, կարևորը երեխաների առողջությունը պահպանելն է»։

Նշենք, որ Մանկական վիրաբուժության և նյարդավիրաբուժության միջազգային կոնֆերանսը կազմակերպվել է Մանկական Բժիշկների Հայկական Ասոցիացիայի, Մանկական Վիրաբույժների Ռուսական Ասոցիացիայի, Մոլդովայի Հանրապետության Մանկական Վիրաբուժության Ազգային Միության և Մանկական Նյարդավիրաբույժների Եվրասիական Ասոցիացիայի կողմից:

Կոնֆերանսին մասնակցելու ցանկություն են հայտնել մի շարք մասնագետներ Ռուսաստանից, Մոլդովայից, Ռումինիայից, Ուկրաինայից և Վրաստանից: Կքննարկվեն մանկական վիրաբուժության և նյարդավիրաբուժության ժամանակակից խնդիրները: Այս գիտական ֆորումը կնպաստի բժիշկների որակավորման բարձրացմանը, ինչպես նաև կհանդիսանա լավ հարթակ մասնագետների շփման և համագործակցության համար:

Բացման արարողությանը ողջույնի խոսքի ժամանակ Բաբլոյանը շնորհակալություն հայտնեց Հայաստան ժամանած բոլոր մասնագետներին. «Շնորհակալություն, որ եկել եք Հայաստան՝ կիսվելու փորձով և ծանոթանալու հայ մասնագետների ձեռքբերումներին, որոնք քիչ չեն, ինչի վկայությունն է նաև այն իրողությունը, որ այս համաժողովում նախատեսված 66 զեկուցումներից 11-ը հայաստանյան մասնագետներինն է լինելու»։

Երևանի Մխիթար Հերացու անվան պետական բժշկական համալսարանի ռեկոտր Արմեն Մուրադյանն էլ նշեց. «Հպարտանալու շատ տեղ կա, մենք կարող ենք ասել, որ ծայրահեղ ծանր դեպքեր անհնարին աշխատանքի ու հոգատարության ներքո կարողանում ենք երեխաներին փրկել, սակայն դեռևս մնում են բազմաթիվ հարցեր, որոնք մենք կարող ենք բարձրացնել և ստանալ դրանց պատասխանները»։

Ռուսաստանի Գիտությունների ակադեմիայի թղթակից անդամ, Մոսկվայի առողջապահության վարչության գլխավոր մանկական վիրաբույժ Ալեքսանդր Ռազումովսկին էլ հույս հայտնեց, որ այս երկօրյա համաժողովի ընթացքում կարողանան էլ  ավելի բարձր մակարդակի հասցնել մանկական վիրաբուժությունը թե իրենց երկրներում, թե Հայաստանում։