Վանաձորի ինֆեկցիոնիստները բողոքում են. «Դա կարող է բերել լուրջ խնդիրների»
«Մենք այսօր հավաքվել ենք Վանաձորի մարզպեարանի դիմաց, որպեսզի մեր բողոքի ձայնը հասցնենք Առողջապահության նախարարին։ Նախագծով առաջարկվում է փակել Վանաձորի ինֆեկցիոն հիվանդանոցն ամբողջությամբ ու դրա փոխարեն առաջարկվում է նոր կառուցվող Բժշկական կենտրոնում ինֆեկցիոն բաժանմունք՝ ընդամենը 15 մահճակալով, որի պայմանները նախատեսված չեն եղել ինֆեկցիոն հիվանդանոցի համար»,-այս մասին երեկ՝ նոյեմբերի 10-ին, լրագրողների հետ զրույցում նշեց Վանաձորի ինֆեկցիոն հիվանդանոցի մանիպուլացիոն բժիշկ, ախտահանող Արմինե Դաբուզյանը՝ հավելելով, որ հիվանդանոցի կոլեկտիվն ու ազգաբնակչությունը պահանջում են պարզաբանել խնդիրը ու չփակել ինֆեկցիոն հիվանդանոցը։
Ըստ Արմինե Դաբուզյանի՝ նման որոշում կայացնելը հիվանդանոցի կոլեկտիվի համար մեծ անակնկալ է եղել, քանի որ մասնագետների հետ նախապես քննարկում չի եղել։ «Նրանք պարտավոր էին հաշվի նստել մարզի գլխավոր ինֆեկցիոնիստի՝ Ռոբերտ Չիլինգարյանի հետ, համաճարակաբանների հետ։ Մենք հավաքվել ենք այստեղ, քանի որ գիտենք՝ այսօր Բժշկական կենտրոնի բացումն է:
Առողջապահության նախարարն էլ է լինելու, մենք պարզապես ցանկանում ենք լսել նրա կարծիքը։ Ասում են՝ ուզում ենք բարելավել հիվանդանոցի պայմանները, բայց երբ 30 մահճակալը դարձնում են 15, դա ինքնստինքյան կրճատում է նշանակում, լիկվիդացնում են հիվանդանոցը։ Կրճատվելու է աշխատողների թիվը, կրճատվելու է սպասարկվող հիվանդների թիվը։ Դա լուրջ խնդիրների կարող է բերել»,-հավելեց Արմինե Դաբուզյանը՝ նշելով, թե համաճարակի դեպքում ամբողջ համակարգը կարող է կաթվածահար լինել։ Մեկ այլ բժշկի խոոսքով՝ Վանաձորի ինֆեկցիոն հիվանդանոցը ապահովված է տեխնիկական և սանիտարական բոլոր անհրաժեշտ պայմաններով՝ առանձին մուտքով, քլորատնով, առանձնացված լվացքատներով ու սանհանգույցներով։
«Մենք այդ ամենը ժառանգություն ենք ստացել 70-ականներից, պայմանները մոտեցրել ու հասցրել ենք նորմատիվներին, բայց այսօր փորձ է արվում այդ ամենը ավիրել ու դրա փոխարեն առաջարկվում է մի փոքրիկ ինֆեկցիոն բաժանմունք՝ 15 մահճակալով, որը նախագծով նախատեսված է եղել որպես ադմինիստրատիվ բաժանմունք, որը հարմարեցված չի եղել բուժական գործառույթների համար»,-նշեց նա՝ հավելելով, թե նորակառույց ԲԿ-ի ինֆեկցիոն բաժանմունքն ունի ընդամենը 2 զուգարան, որից, ենթադրաբար, պետք է օգտվեն և՛ անձնակազմը, և՛ հիվանդները, ինչն անհեթեթություն է ինֆեկցիոն հիվանդանոցի համար։
«Սա կապրիզ չէ, սա քմահաճույք չէ. եթե վերևներում գտնում են, որ մարզում ինֆեկցիոն հիվանդությունների խնդիրն այլևս վերացել է, խնդրեմ, կարող են փակել։
Հիվանդանոցն այսօր, ըստ նախատեսվածի, ունի 30 մահճակալ, բայց անհրաժեշտության դեպքում այն ունի ծավալվելու և մինչև 200 հիվանդ ընդունելու հնարավորություն։ Մենք ունեցել ենք նման փորձ, անցել ենք դրա միջով։ Հիվանդանոցն ունի նաև ստրատեգիական նշանակություն, ընկերնե՛ր»,-եզրափակեց կինը։
Նույնը մանրամասն՝ տեսանյութով.
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին